ନୂଆଦିଲ୍ଲୀ, ୧୯।୪ : ଜମ୍ମୁ- କଶ୍ମୀର ର ଲାଇନ ଅଫ କଣ୍ଟ୍ରୋଲ ଏଲ୍ଓସି) ରେ ପୁଣି ଆତଙ୍କବାଦୀ ସକ୍ରିୟ ହେବାରେ ଲାଗିଛନ୍ତି। ପାକିସ୍ତାନ ଫରଓ୍ବାର୍ଡ ଫୋଷ୍ଟ ନିକଟରେ ଅବସ୍ଥିତ ଲଞ୍ଚ୍ ପ୍ୟାଡ୍ରେ ଏବେ ୬୦ ରୁ ୮୦ ଆତଙ୍କବାଦୀ ଉପସ୍ଥିତ ଅଛନ୍ତି। ଭାରତରେ ଅନୁପ୍ରବେଶ ପାଇଁ ସେମାନେ ସୁଯୋଗକୁ ଅପେକ୍ଷା କରି ରହିଥିବା ଅଧିକାରୀମାନେ ମଙ୍ଗଳବାର ସୂଚନା ଦେଇଛନ୍ତି। ସେମାନେ ଆଫଗାନିସ୍ତାନରୁ ଫେରିଥିବା ଆତଙ୍କବାଦୀ ବୋଲି ଅନୁମାନ କରାଯାଉଛି। ସେମାନଙ୍କୁ ଏଠାରେ ତାଲିମ ଦିଆଯାଉଛି ।
ଗ୍ରୀଷ୍ମ ମାସରେ ସେମାନେ ଭାରତରେ ଅନୁପ୍ରବେଶ କରିବାକୁ ଚେଷ୍ଟା କରିବାର ଯୋଜନା ପ୍ରସ୍ତୁତ କରୁଛନ୍ତି। ତେବେ, ଏହି ଆତଙ୍କବାଦୀମାନଙ୍କୁ ଭାରତ ପଠାଇବା ପୂର୍ବରୁ ପାକିସ୍ତାନକୁ ଦୁଇଥର ଚିନ୍ତା କରିବାକୁ ପଡ଼ିବ ବୋଲି ଭାରତୀୟ ଅଧିକାରୀ କହିଛନ୍ତି। ଇସଲାମାବାଦ ଏବେ ମଧ୍ୟ ଫାଇନାନ୍ସିଆଲ ଆକ୍ସନ ଟାସ୍କ ଫୋର୍ସ (ଏଫଏଟିଏଫ୍) ର ଗ୍ରେ ତାଲିକାରେ ଅଛି ବୋଲି ଅଧିକାରୀମାନେ ମତ ଦେଇଛନ୍ତି।
ଅଧିକାରୀମାନେ କହିଛନ୍ତି ଯେ ଆତଙ୍କବାଦୀ ଭିତ୍ତିଭୂମି ଭାଙ୍ଗିବା ପରେ ହିଁ ପାକିସ୍ତାନର ନିଷ୍ଠାପରତା ଆକଳନ କରାଯାଇପାରିବ। ଏଲ୍ଓସିରେ ଅସ୍ତ୍ର ବିରତିର ସୁଯୋଗ ନେଇ ପାକିସ୍ତାନ ସୀମାପାର ଆତଙ୍କବାଦୀ ଲଞ୍ଚ୍ ପ୍ୟାଡ୍ ଗୁଡ଼ିକୁ ସୁଦୃଢ଼ କରିଥିବା ଅଧିକାରୀମାନେ କହିଛନ୍ତି। ଅଧିକାରୀ କହିଛନ୍ତି ଯେ ୨୦୧୯ ରେ ପାକିସ୍ତାନ ଭାରତୀୟ ସେନାର କଠୋର ଆଭିମୁଖ୍ୟ ପରେ ଏହି ଲଞ୍ଚ ପ୍ୟାଡରୁ ଦୂରରେ ରହିଥିଲା।
ଫିଲ୍ଡ ୟୁନିଟ ଗୁପ୍ତଚର ଇନପୁଟ ଏବଂ ନୀରିକ୍ଷଣ ଅନୁଯାୟୀ, ଏହି ଲଞ୍ଚ ପ୍ୟାଡରେ ଏବେ ୬୦ରୁ ୮୦ ଆତଙ୍କବାଦୀ ଉପସ୍ଥିତ ଅଛନ୍ତି। ଏହା ଗତ ବର୍ଷ ଅଗଷ୍ଟରୁ ପୁଣି ସକ୍ରିୟ ହେବାରେ ଲାଗିଛି। ସୂଚନା ଅନୁଯାୟୀ, ଏହି ଆତଙ୍କବାଦୀମାନେ ପାକିସ୍ତାନୀ ଆତଙ୍କବାଦୀ ହୋଇପାରନ୍ତି ଯେଉଁମାନେ ଆଫଗାନିସ୍ତାନ ଯୁଦ୍ଧରୁ ଫେରିଛନ୍ତି। ଅଧିକାରୀ କହିଛନ୍ତି ଯେ ଭାରତୀୟ ସେନା ପକ୍ଷରୁ ଏଲ୍ଓସିରେ ରଣନୀତିକ କାର୍ଯ୍ୟକ୍ରମକୁ ବଜାୟ ରଖାଯାଇଥିବାବେଳେ ଆତଙ୍କବାଦୀମାନେ ଯେଭଳି ଅନୁପ୍ରବେଶ ନକରନ୍ତି ସେଥିପ୍ରତି ତୀକ୍ଷ୍ଣ ନଜର ରଖାଯାଇଛି।
ସମସ୍ତ ପ୍ରକାରରଆହ୍ବାନର ମୁକାବିଲା ପାଇଁ ଆଣ୍ଟି-ଇନଫିଲଟ୍ରେଶନ ଗ୍ରୀଡ ଏବଂ ପାଟ୍ରୋଲିଂକୁ କଡ଼ାକଡ଼ି କରାଯାଇଛି ବୋଲି ଅଧିକାରୀମାନେ କହିଛନ୍ତି।