ଭୁବନେଶ୍ୱର,୧୯।୯(ବ୍ୟୁରୋ): ଇନ୍ଫୋସିଟି ଥାନା ଅଞ୍ଚଳରେ ଥିବା ଏକ କଲ୍ୟାଣ ମଣ୍ଡପରୁ ଜଣେ ଯୁବକଙ୍କ ସନ୍ଦେହଜନକ ଅବସ୍ଥାରେ ଝୁଲନ୍ତା ମୃତଦେହ ମିଳିଛି। ସେହେଲେ ଯାଜପୁର ଅଞ୍ଚଳର ପ୍ରକାଶ ବଳ। ପ୍ରକାଶ ଇଭେଣ୍ଟ ମ୍ୟାନେଜର ଭାବେ କାର୍ଯ୍ୟ କରନ୍ତି। ତେବେ ଟଙ୍କା ପାଇଁ ପ୍ରକାଶଙ୍କୁ ହତ୍ୟା କରାଯାଇଥିବା ପରିବାର ଲୋକେ ଥାନା ଅଭିଯୋଗ କରିଛନ୍ତି। ପୋଲିସ ଏକ ହତ୍ୟା ମାମଲା ନଂ.୨୦୧/୨୧ ରୁଜୁ କରି ତଦନ୍ତ ଚଳାଇଛି।
ମୁତାବକ, ଶୁକ୍ରବାର ରାତି ପ୍ରାୟ ୯ଟାରେ ପ୍ରକାଶଙ୍କ ଫୋନ ନ ଲାଗିବାରୁ ମଣ୍ଡପର ଅନ୍ୟ କର୍ମଚାରୀମାନେ ଖୋଜାଖୋଜି କରିଥିଲେ। ରୁମ୍ ବାହାରେ ତାଙ୍କର ଚପଲ ପଡିଥିବାବେଳେ ସେ ମାସ୍କ ପିନ୍ଧା ଅବସ୍ଥାରେ ଭିତରେ ଏକ ରଶିରେ ଝୁଲୁଥିବା ଦେଖି ଥାନାକୁ ଖବର ଦେଇଥିଲେ। ପୋଲିସ ପହଞ୍ଚତ୍ ତାଙ୍କୁ ଉଦ୍ଧାର କରି ହସ୍ପିଟାଲକୁ ନେଇଥିଲା। ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ପ୍ରକାଶଙ୍କ ପରିବାର ଲୋକେ ପହଞ୍ଚତ୍ ଥାନାରେ ଅଭିଯୋଗ କରିଥିଲେ। ତାଙ୍କ ମା’ ଓ ଭାଇଙ୍କ କହିବାନୁସାରେ, ପ୍ରକାଶ ଚାକିରି ଛାଡ଼ି ଇଭେଣ୍ଟ ମ୍ୟାନେଜମେଣ୍ଟ ବ୍ୟବସାୟ କରୁଥିଲେ। କିଛିଦିନ ତଳେ ପ୍ରକାଶ ଘରକୁ ଟଙ୍କା ମାଗିଥିଲେ। କାହିଁକି ଟଙ୍କା ଦରକାର ବୋଲି ମା’ ପଚାରିବାରୁ ପ୍ରକାଶ କହିଥିଲେ, ସେ ଟଙ୍କା ଧାର କରିଛନ୍ତି। ଏଥିପାଇଁ ତାଙ୍କୁ ମାରି ଦେବାକୁ ଧମକ ଦିଆଯାଉଛି। ଏକଥା ଶୁଣିବା ପରେ ଘର ଲୋକେ ତାଙ୍କୁ ୩୦ହଜାର ଟଙ୍କା ଦେଇଥିବାବେଳେ ଏବେ ତାଙ୍କ ମୃତ୍ୟୁକୁ ସହଜରେ ଗ୍ରହଣ କରିପାରୁ ନାହାନ୍ତି ପରିବାର ଲୋକେ। ଅନ୍ୟପକ୍ଷରେ ମୃତଦେହ ନିକଟରୁ ପୋଲିସ ଏକ ସୁଇସାଇଡ୍ ନୋଟ୍ ମଧ୍ୟ ଜବତ କରିଛି। ତାହା ପ୍ରକାଶଙ୍କର କି ନୁହେଁ, ତାହାର ଯାଞ୍ଚ ପାଇଁ ଲାବ୍କୁ ପଠାଇବ ପୋଲିସ। ଏପଟେ ପାରିପାର୍ଶ୍ୱିକ ସ୍ଥିତିକୁ ଦେଖିଲେ ପ୍ରକାଶଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି। ପ୍ରକାଶ ରଶିରେ ଝୁଲୁଥିବାବେଳେ ଗୋଡ଼ ତଳେ ଲାଗିଛି। ଗୋଡ଼କୁ ଲାଗି ଖଟ ଓ ଚେୟାର ରହିଥିଲା। ହତ୍ୟା ପରେ ତାଙ୍କୁ ରଶିରେ ଝୁଲାଇ ଆତ୍ମହତ୍ୟା ରୂପ ଦିଆଯାଇଥିବାବେଳେ ତଦନ୍ତକୁ ବାଟବଣା ପାଇଁ ହତ୍ୟକାରୀମାନେ ଏପରି ସୁଇସାଇଡ୍ ନୋଟ୍ ପ୍ରସ୍ତୁତ କରିଛନ୍ତି ବୋଲି ପ୍ରକାଶଙ୍କ ଭାଇ କହିଛନ୍ତି। ତେବେ ଏଭଳି ଅଭିଯୋଗକୁ କଲ୍ୟାଣ ମଣ୍ଡପ କର୍ତ୍ତୃପକ୍ଷ ଖଣ୍ଡନ କରିଥିବାବେଳେ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ଥାନା ଅଧିକାରୀ ସମିତା ମିଶ୍ର କହିଛନ୍ତି।