ଆନନ୍ଦପୁର,୨୩ା୧୧(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡକୁ ଜିଲା ଦାବିରେ ବୁଧବାର ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ୩ ଘଣ୍ଟିଆ ଗଣଧାରଣା ଦିଆଯାଇଥିଲା। ଏହା ସହିତ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଆନନ୍ଦପୁର ଉପଜିଲାପାଳ ଅନୀଲ କୁମାର ସେଠୀଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ୧୯୯୩ ବିଭକ୍ତିକରଣ କରାଯାଇ ନୂତନ ଭାବେ ୧୭ ଜିଲା ଗଠନ କରାଯାଇଥିବାବେଳେ କେନ୍ଦୁଝର ଜିଲାର ଆନନ୍ଦପୁର ଉପଖଣ୍ଡକୁ ଉପେକ୍ଷା କରାଯାଇଥିଲା। ଆନନ୍ଦପୁର ଉପଖଣ୍ଡର ସୀମାବର୍ତ୍ତୀ ଅଞ୍ଚଳର ଜିଲା ସଦରମହକୁମାକୁ ୧୫୦ କି.ମି. ଦୂରତା ହୋଇଥିବାରୁ ଲୋକମାନେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ଏପରିକି ଆନନ୍ଦପୁର ଜନସାଧାରଣ ବିଶେଷ କରି ଶିକ୍ଷା, ସ୍ବାସ୍ଥ୍ୟକୁ ନେଇ ଜିଲା ସଦରମହକୁମା ଅପେକ୍ଷା ଉପକୂଳ ଜିଲା ଉପରେ ନିର୍ଭର କରିଆସୁଛନ୍ତି। ଆନନ୍ଦପୁର ଉପଖଣ୍ଡ ଭୌଗୋଳିକ, ଭାଷାଗତ, ପରମ୍ପରାଗତ, ସାଂସ୍କୃତିକ, ସାମାଜିକ ତଥା ରୀତିନୀତି ଦୃଷ୍ଟିରୁ କେନ୍ଦୁଝରଠାରୁ ସମ୍ପୂର୍ଣ୍ଣ ଭିନ୍ନ। ଏହା ସହିତ ଆନନ୍ଦପୁରର ଜନସାଧାରଣ ଜିଲା ପ୍ରଶାସନିକ ସେବା ଉପଲବ୍ଧି କରିବାରେ ଶାରୀରିକ, ଆର୍ଥିକ ତଥା ମାନସିକ ଭାବେ ଅବହେଳା ହୋଇଆସୁଛି। ଆନନ୍ଦପୁର ଉପଖଣ୍ଡର ଭୌଗୋଳିକ ସ୍ଥିତିକୁ ତର୍ଜମା କରାଯାଇ ୨୦୧୮-୧୯ରେ ଅତିରିକ୍ତ ୪ଟି ଜିଲା ମାନ୍ୟତା ପାଇବାକୁ ନେଇ ତପତ୍ରତା ପ୍ରକାଶ ପାଇଥିଲା। ଏହି ୪ଟି ଜିଲା ମଧ୍ୟରେ ଆନନ୍ଦପୁରର ନାମ ସର୍ବାଗ୍ରେ ରହିଥିଲା। ହେଲେ ପରବର୍ତ୍ତୀ ପର୍ଯ୍ୟାୟରେ ଏହି ଜିଲା ମାନ୍ୟତା କେବଳ ଫାଇଲରେ ପଡ଼ିରହିଥିଲା। ଯାହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଲାଗିରହିଥିଲା। ଚଳିତ ୨୦୨୨ ପଦ୍ମପୁର ଉପନିର୍ବାଚନ ପରିପ୍ରେକ୍ଷୀରେ ଜିଲା ସଂଖ୍ୟା ବୃଦ୍ଧି ପ୍ରସଙ୍ଗ ଉପସ୍ଥାପନ ହେବା ପରେ ଆନନ୍ଦପୁରବାସୀଙ୍କ ମଧ୍ୟରେ ତତ୍ପରତା ବୃଦ୍ଧି ପାଇବା ସହିତ ଏହାକୁ କାର୍ଯ୍ୟକାରୀ କରିବା ଦିଗରେ ଅଣ୍ଟା ଭିଡ଼ିଥିବା ଦେଖାଯାଇଛି।