ବମ୍ବେ: ଗତ ଶୁକ୍ରବାର ରିଲିଜ ହୋଇଥିବା ଫିଲ୍ମ ‘ଦ କଶ୍ମୀର ଫାଇଲ୍ସ’ ବକ୍ସ ଅଫିସରେ ନୂଆ କୀର୍ତ୍ତିମାନ ରଚୁଛି। ଦର୍ଶକମାନେ ଏହାକୁ ବେଶ ପସନ୍ଦ କରୁଥିବା ବେଳେ ଦିନକୁ ଦିନ ଏହାର ବ୍ୟବସାୟ ବଢ଼ିବାରେ ଲାଗିଛି। କଶ୍ମୀର ପଣ୍ଡିତମାନଙ୍କ ଉପରେ ଆଧାରିତ ସତ୍ୟ ଘଟଣାକୁ ପରଦାରେ ଦେଖାଇଥିବାକୁ ନେଇ ନିର୍ଦ୍ଦେଶକ ବିବେକ ଅଗ୍ନିହୋତ୍ରୀଙ୍କ ପ୍ରଶଂସା କରାଯାଉଛି। ଏସବୁ ଭିତରେ ଖୁବ୍ କମ୍ ଲୋକ ଜାଣନ୍ତି ଫିଲ୍ମର ସଫଳତା ବିବେକଙ୍କ ପାଇଁ ଭିନ୍ନ କାରଣକୁ ନେଇ ସ୍ବତନ୍ତ୍ର ମଧ୍ୟ ଥିଲା। କାରଣ ତାଙ୍କ ସ୍ତ୍ରୀ ପଲ୍ଲବୀ ଜୋଶୀ ଏଥିରେ ମୁଖ୍ୟ ଭୂମିକାରେ ଥିଲେ।
୧୯୯୭ରେ ପଲ୍ଲବୀଙ୍କୁ ବିବାହ କରିଥିଲେ ବିବେକ। ଏକ କନ୍ସର୍ଟରେ ପରସ୍ପରକୁ ଭେଟିଥିଲେ ସେ। ପ୍ରଥମ ଦେଖାରେ କିନ୍ତୁ ବିବେକଙ୍କୁ ଗର୍ବି ବୋଲି ଭାବିଥିଲେ ପଲ୍ଲବୀ। ହେଲେ ପରବର୍ତ୍ତୀ ସମୟରେ ଉଭୟ ଅନେକ ପ୍ରୋଜେକ୍ଟରେ ଏକାଠି କାମ କରିଥିଲେ। ଧିରେ ଧିରେ ସମ୍ପର୍କ ଆଗକୁ ବଢ଼ିଥିଲା। ତିନି ବର୍ଷ ଧରି ପରସ୍ପରକୁ ଡେଟ୍ କରିବା ପରେ ସେମାନେ ବିବାହ କରିଥିଲେ।
ପଲ୍ଲବୀ ପିଲାଦିନୁ ଅଭିନୟରେ ରୁଚି ରଖିଥିଲେ। ଶିଶୁ କଳାକାର ଭାବେ ସେ ଅନେକ ବଲିଉଡ ଫିଲ୍ମରେ କାମ କରିଛନ୍ତି। ୯୦ ଦଶକରେ ଦୁରଦର୍ଶନରେ ପ୍ରସାରିତ ହେଉଥିବା ଅନେକ ଟେଲିଭିଜନ ଧାରାବାହିକରେ ସେ ଅଭିନୟ କରିଛନ୍ତି। ଧାରାବାହିକ ‘ଅଳ୍ପବିରାମ’ରେ ସେ ବଳାତ୍କାର ପୀଡ଼ିତାଙ୍କ ଭୂମିକାରେ ନଜର ଆସିଥିଲେ। ବଲିଉଡ୍ ଏବଂ ଧାରାବାହିକ ଛଡ଼ା ସେ ମରାଠୀ ଚଳଚ୍ଚିତ୍ରରେ କାମ କରିଛନ୍ତି। ଫିଲ୍ମ ‘ଦ ତାଶକଣ୍ଡ ଫାଇଲ୍ସ’ ପାଇଁ ସେ ଜାତୀୟ ପୁରସ୍କାର ମଧ୍ୟ ଜିତିଛନ୍ତି।