ଜୟପୁର,୯ା୧୦: ରାଜସ୍ଥାନର ସିକରରେ ଥିବା ବ୍ୟାଙ୍କ ଲୁଟିବା ପାଇଁ ଜଣେ ଦୁର୍ବୃତ୍ତ ଆସିଥିବା ବେଳେ ପୋଲିସ ହାତରେ ଧରା ପଡ଼ିଛନ୍ତି। ଫଳରେ ଡକାୟତି ଉଦ୍ୟମ ପଣ୍ଡ ହୋଇଛି। ସିକର ଉଦ୍ୟୋଗ ନଗର ଥାନା ଅନ୍ତର୍ଗତ କାନାଡା ବ୍ୟାଙ୍କକୁ ଜଣେ ଅପରାଧୀ ଲୁଟିବା ପାଇଁ ଆସିଥିଲେ। ଶୁକ୍ରବାର ସକାଳେ ବ୍ୟାଙ୍କ ଖୋଲିବା ପରେ ଲୁଟେରା ଜଣଙ୍କ ହାତ ହତିଆର ଧରି ବ୍ୟାଙ୍କରେ ପଶି କର୍ମଚାରୀମାନଙ୍କୁ ଭୟଭୀତ କରାଇଥିଲେ। ଏଥିସହିତ ୧ କୋଟିରୁ ଅଧିକ ଟଙ୍କା ଏବଂ ୧୫ରୁ ୨୦ କିଲୋଗ୍ରାମ ସୁନା ଗହଣା ନେଇଯାଇଥିଲେ। ଯେତେବେଳେ ଏହି ଦୁର୍ବୃତ୍ତଜଣକ ବ୍ୟାଙ୍କରେ ଲୁଟିବା ପାଇଁ ପଶିଥିଲେ ଠିକ୍ ଏହାର ଗୋଟିଏ ମିନିଟ୍ ପୂର୍ବରୁ ବ୍ୟାଙ୍କ ମ୍ୟାନେଜର ତାଙ୍କ ଭିଣୋଇ ଡ. ମହେଶ ଶରଣଙ୍କ ସହ ଫୋନ୍ରେ କଥା ହେଉଥିଲେ। ଦୁର୍ବୃତ୍ତଜଣକ ବ୍ୟାଙ୍କରେ ପଶି ଲୁଟ୍ ଆରମ୍ଭ କରିବା ସମୟରେ ବ୍ୟାଙ୍କ ମ୍ୟାନେଜର ଫୋନ୍ କାଟି ନ ଥିଲେ। ଯାହାକି ତାଙ୍କର ଭିଣୋଇ ବ୍ୟାଙ୍କ ଭିତରେ ଯାହା ସବୁ ହେଉଛି ଶୁଣିପାରୁଥିଲେ। ସେ ସଙ୍ଗେ ସଙ୍ଗେ ପୋଲିସକୁ ଜଣାଇଥିଲେ। ପରେ ଏସ୍ଆଇ କଞ୍ଚନ, କନଷ୍ଟେବଳ ଦୁର୍ଗା ରାମ, ଦେବୀଲାଲ ଏବଂ ଡ୍ରାଇଭର ରାୟ ବାହାଦୂର ବ୍ୟାଙ୍କରେ ପହଞ୍ଚିଥିଲେ। ପୋଲିସକୁ ଦେଖି ଖାଲି ବନ୍ଧୁକ ଚାଳନା କରି ଖସି ପଳାଇଯିବାକୁ ଚେଷ୍ଟା କରୁଥିବା ଲୁଟେରା ଜଣକ ପୋଲିସ ହାତରେ ସହଜରେ ଧରା ପଡ଼ିଯାଇଥିଲେ।