କେନ୍ଦୁଝର, ୭।୮(ସ୍ବ.ପ୍ର.): ଦୃଢ଼ ଆତ୍ମବିଶ୍ୱାସ ହିଁ ସଫଳତା ଆଣିଥାଏ। ପିଲାମାନେ କାହାକୁ ଭୟ ନ କରି ନିଜ ସ୍ବରକୁ ଶାଣିତ କରିପାରିଲେ ନିଜକୁ ତଥା ଅନ୍ୟମାନଙ୍କୁ ସୁରକ୍ଷା ଦେଇପାରିବେ। ବିଶେଷକରି ଝିଅ ପିଲାମାନେ ଏ ଦିଗରେ ଅଧିକ ଯତ୍ନବାନ ହେବା ଜରୁରୀ। କେନ୍ଦୁଝର ପାନ୍ଥନିବାସଠାରେ ୟୁନିସେଫ, ଧରିତ୍ରୀ ଓ ପିକ୍କର ମିଳିତ ଆନୁକୂଲ୍ୟରେ ଆୟୋଜିତ ଶିଶୁ ସୁରକ୍ଷା ଓ ସାମ୍ବାଦିକତା ସମ୍ପର୍କିତ କର୍ମଶାଳାରେ ଉପସ୍ଥିତ ଅତିଥିମାନେ ଏହି ପରାମର୍ଶ ଦେଇଛନ୍ତି।
ଦିନ ଧରି ଚାଲିଥିବା ଏହି କର୍ମଶାଳାର ଶନିବାର ଦ୍ୱିତୀୟ ଦିନରେ ପିଲାମାନଙ୍କୁ ଶିଶୁ ସାମ୍ବାଦିକତା ଉପରେ ଧରିତ୍ରୀ ପକ୍ଷରୁ ପ୍ରଶିକ୍ଷଣ ଦିଆଯାଇଥିଲା। ଉପବାର୍ତ୍ତା ସମ୍ପାଦକ ଲାଲା ସୁନୀଲ କୁମାର ରଥ ଯୋଗଦେଇ ପିଲାମାନଙ୍କୁ ସାମ୍ବାଦିକତା କ’ଣ, ଏହାର ନିୟମ, ଖବରର ପ୍ରକାରଭେଦ ସମ୍ପର୍କରେ ସବିଶେଷ ଧାରଣା ଦେଇଥିଲେ। ପିଲାମାନେ ନିଜର ପାରିପାର୍ଶ୍ୱରେ ଦେଖୁଥିବା ସମସ୍ୟାକୁ କିପରି ବିଭାଗୀୟ କର୍ତ୍ତୃପକ୍ଷଙ୍କ ନିକଟରେ ପହଞ୍ଚାଇ ଲୋକଲୋଚନକୁ ଆଣିପାରିବେ ସେ ସମ୍ପର୍କରେ ବିଶଦ୍ ଭାବେ ଧାରଣା ଦେଇଥିଲେ। ଏହି କାର୍ଯ୍ୟକ୍ରମରେ ଜିଲା ଶିଶୁ ସୁରକ୍ଷା ଅଧିକାରିଣୀ ଦେବାଙ୍ଗନା ବାରିକ ଯୋଗଦେଇ ପିଲାମାନଙ୍କୁ ସେମାନଙ୍କ ପାଇଁ ସମ୍ବିଧାନରେ ରହିଥିବା ମୌଳିକ ଅଧିକାର ସମ୍ବନ୍ଧରେ ଅବଗତ କରାଇ ମାନସିକ ସ୍ତରରେ ଶକ୍ତିଶାଳୀ ହେବାକୁ ଗୁରୁତ୍ୱ ଦେଇଥିଲେ। କର୍ମଶାଳାର ଦ୍ୱିତୀୟ ଅଧିବେଶନରେ ଧରିତ୍ରୀର ଯାଜପୁର ଜିଲା ପ୍ରତିନିଧି ହର୍ଷବର୍ଦ୍ଧନ ବେହେରା ଓ ଯୋଡ଼ା ପ୍ରତିନିଧି ମାନସ ରଞ୍ଜନ ମହାନ୍ତି ଯୋଗଦେଇ ପିଲାମାନଙ୍କୁ ଦଳଗତ ଆଲୋଚନା ମାଧ୍ୟମରେ ବିଦ୍ୟାଳୟ ପରିସରରେ ସେମାନେ ସମ୍ମୁଖୀନ ହେଉଥିବା ସମସ୍ୟା, ତା’ର ସମାଧାନ ଏବଂ ସଫଳତା ଉପରେ ଆଲୋକପାତ କରିଥିଲେ। କର୍ମଶାଳାରେ ୟୁନିସେଫର କମ୍ୟୁନିକେଶନ ଆଡଭୋକେସି ରାଧିକା ଶ୍ରୀବାସ୍ତବ, ପିକ୍କ ସଙ୍ଗଠନର ସମ୍ପାଦକ ରଞ୍ଜନ କୁମାର ମହାନ୍ତି, କାର୍ଯ୍ୟନିର୍ବାହୀ ନିର୍ଦ୍ଦେଶିକା ଅନୁରାଧା ମହାନ୍ତି ଓ ଧରିତ୍ରୀର କେନ୍ଦୁଝର ଜିଲା ପ୍ରତିନିଧି ନରେଶ ଚନ୍ଦ୍ର ପଟ୍ଟନାୟକ ଉପସ୍ଥିତ ଥିଲେ।