ଅଗରତାଲା,୨୩।୯: ତ୍ରିପୁରାରେ ଭାଜପାକୁ ଏକ ଝଟ୍କା ଲାଗିଛି। ରାଜ୍ୟର କାର୍ବୁକ ବିଧାନସଭାର ବିଧାୟକ ବୁର୍ବା ମୋହନ ଦଳରୁ ଇସ୍ତଫା ଦେଇଛନ୍ତି। ସେ ଟିପ୍ରା ମୋଥା ପାର୍ଟିରେ ଯୋଗଦେଇପାରନ୍ତି ବୋଲି ଚର୍ଚ୍ଚା ହେଉଛି। ଶୁକ୍ରବାର ବୁର୍ବା ମୋହନ ତ୍ରିପୁରା ବିଧାନସଭା ସଦସ୍ୟତାରୁ ଇସ୍ତଫା ଦେଇଛନ୍ତି। ସୂଚନାଯୋଗ୍ୟ, ଗୋମତି ଜିଲା କାର୍ବୁକର ବିଧାୟକ ତାଙ୍କ ଇସ୍ତଫା ପତ୍ରରେ ବିଧାନସଭା ସଦସ୍ୟତା ଛାଡିବା ପାଇଁ ନିଜର ବ୍ୟକ୍ତିଗତ କାରଣ ଦର୍ଶାଇଛନ୍ତି। ଅନ୍ୟପଟେ ବିଧାନସଭା ବାଚସ୍ପତି ରତନ ଚକ୍ରବର୍ତ୍ତୀ ଏନେଇ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ଶୁକ୍ରବାର କାର୍ବୁକ ବିଧାନସଭା ନିର୍ବାଚନମଣ୍ଡଳୀରୁ ଭାଜପା ବିଧାୟକ ଥିବା ବୁର୍ବା ତାଙ୍କୁ ଭେଟିଥିଲେ। ଏଥିସହ ବ୍ୟକ୍ତିଗତ କାରଣ ଦର୍ଶାଇ ତାଙ୍କ ଇସ୍ତଫା ପତ୍ର ପ୍ରଦାନ କରିଛନ୍ତି ବୋଲି ବାଚସ୍ପତି କହିଛନ୍ତି। ଏହି ସମୟରେ ତାଙ୍କ ସହ ଟିପ୍ରା ମୋଥା ପାର୍ଟିର ଅଧ୍ୟକ୍ଷ ପ୍ରଦୋତ କିଶୋର ମାଣିକିଆ ଦେବବର୍ମା ସାମିଲ ଥିଲେ।
