ଭୁବନେଶ୍ୱର,୧୮।୧୦: ଦେଶର ପ୍ରମୁଖ ଘରୋଇ ବାଣିଜି୍ୟକ ସଂସ୍ଥା ହିଣ୍ଡାଲ୍କୋ ପକ୍ଷରୁ ଭାରତର ପ୍ରଥମ ସମସ୍ତ ଆଲୁମିନିୟମ ଫ୍ରେଟ-ରେଳ ରେକ୍ ଚଳାଚଳର ଶୁଭାରମ୍ଭ କରାଯାଇଛି। ଯାହା ପଣ୍ୟ ପରିବହନକୁ ଆଧୁନିକୀକରଣ କରିବା ଏବଂ ଭାରତୀୟ ରେଲଓ୍ବେ ନିମନ୍ତେ ବିପୁଳ ଅଙ୍ଗାରକାମ୍ଳ ନିର୍ଗମନକୁ ରୋକିବା ପାଇଁ ରାଷ୍ଟ୍ରର ଆକାଂକ୍ଷିତ ଯୋଜନାକୁ ତ୍ୱରାନ୍ବିତ କରିବାରେ ସହାୟକ ହେଉଛି। ଏହି ରେକ୍ଗୁଡିକ ସମ୍ପ୍ରତି ଚଳାଚଳ କରୁଥିବା ଷ୍ଟିଲ୍ ରେକ୍ ତୁଳନାରେ ୧୮୦ ଟନ୍ ହାଲୁକା ଏବଂ ୫-୧୦% ଅଧିକ ଭାର ବହନ କରିପାରିବ। ଏପରିକି କମ୍ ଶକ୍ତି ବ୍ୟବହାର କରିବା ସହ ରେଳ ଡବା ଏବଂ ରେଳ ଗୁଡିକ ପ୍ରତି ତୁଳନାମତ୍କ ଭାବେ ଅତି ନଗଣ୍ୟ କ୍ଷୟକ୍ଷତିର ପ୍ରଭାବ ପକାଇବ ବୋଲି ଆଶା କରାଯାଇଛି। ସେହିଭଳି ଓଡ଼ିଶାର ଲପଙ୍ଗାସ୍ଥିତ କମ୍ପାନୀର ଆଦିତ୍ୟ ସ୍ମେଲଟରକୁ କୋଇଲା ପରିବହନ କରିବାକୁ ଥିବା ଏହି ନୂତନ ୬୦- ୱାଗନ ରେକ୍ର ଚଳାଚଳକୁ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ନିକଟରେ ଉଦଘାଟନ କରିଥିଲେ।
ଏ ସମ୍ପର୍କରେ ହିଣ୍ଡାଲ୍କୋ ଇଣ୍ଡଷ୍ଟ୍ରିଜର ଏମ୍ଡି ସତୀଶ ପାଇ କହିଛନ୍ତି, ଭାରତର ପ୍ରଥମ ଆଲୁମିନିୟମ ଫ୍ରେଟ ରେକ୍ ଚଳାଚଳ ଶୁଭାରମ୍ଭ ହେବା, ରାଷ୍ଟ୍ରଗଠନ ଦିଗରେ ଏକ ସ୍ମାର୍ଟ ଏବଂ ଦୀର୍ଘସ୍ଥାୟୀ ସମାଧାନ ଯୋଗାଇଦେବା ନିମନ୍ତେ ଆମର ସାମର୍ଥ୍ୟ ଏବଂ ପ୍ରତିବଦ୍ଧତାର ନିଦର୍ଶନ ହୋଇଛି। ଭାରତୀୟ ରେଳବାଇର ଲଜିଷ୍ଟିକ୍ସକୁ ଅଧିକ ଦକ୍ଷ କରି ଗଢିତୋଳିବା ଏବଂ ଆମତ୍ନିର୍ଭର ଭାରତ ଗଠନ ଲକ୍ଷ୍ୟ କ୍ଷେତ୍ରରେ ଅବଦାନ ରଖିବା ନିମନ୍ତେ ହିଣ୍ଡାଲକୋ ସ୍ଥାନୀୟ ସମ୍ବଳକୁ ନେଇ ବିଶ୍ୱସ୍ତରୀୟ ସର୍ବୋତ୍ତମ ପ୍ରଯୁକ୍ତିକୁ ଏକତ୍ରିତ କରାଇବାରେ ଅଗ୍ରଦୂତ ହୋଇଛି।