ଲକ୍ଷ୍ନୌ,୧୬ ।୯: ଉତ୍ତର ପ୍ରଦେଶର ରାଜଧାନୀ ଲକ୍ଷ୍ନୌରେ ଏକ ବଡ ଦୁର୍ଘଟଣା ଘଟିଛି । ଏଠାରେ ଥିବା ହଜରତଗଞ୍ଜ ଅଞ୍ଚଳରେ ଏକ କାନ୍ଥ ଭୁଷୁଡି ପଡିବା ଫଳରେ ୯ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । କୁହାଯାଉଛି କି ଏହା ଏକ ଘରର କାନ୍ଥ ଥିଲା । ଏହି ଘଟଣାରେ ଦୁଇଟି ଶିଶୁଙ୍କର ବି ମୃତ୍ୟୁ ହୋଇଛି । ଘଟଣାର ସୂଚନା ମିଳିବା ପରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମୃତକଙ୍କ ପରିବାର ପ୍ରତି ସମବେଦନା ଜଣାଇଛନ୍ତି । ଏହାସହ ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ଅନୁକମ୍ପା ରାଶି ବି ଘୋଷଣା କରିଛନ୍ତି ।
କୁହାଯାଉଛି କି ପ୍ରବଳ ବର୍ଷା ଯୋଗୁ ଏହି ଦୁର୍ଘଟଣା ଘଟିଛି । ଗୁରୁବାରଠାରୁ ଲକ୍ଷ୍ନୌରେ ଲଗାଣ ବର୍ଷା ଜାରି ରହିଛି । ଭୁଷୁଡି ପଡିଥିବା କାନ୍ଥକୁ ଉଠାଇବା କାମ ତୁରନ୍ତ ଆରମ୍ଭ କରାଯାଇଛି । ନିଜେ ମୁଖ୍ୟମନ୍ତ୍ରୀ ଜିଲାପାଳ, ପୋଲିସ ଓ ବରିଷ୍ଠ ଅଧିକାରୀଙ୍କୁ ଘଟଣାସ୍ଥଳ ପରିଦର୍ଶନ କରିବାକୁ ନିର୍ଦ୍ଦେଶ ଦେଇଛନ୍ତି । ବର୍ଷା ଲାଗି ରହିଥିବାରୁ ଉଦ୍ଧାର କାର୍ଯ୍ୟରେ ବାଧା ଉପୁଜୁଛି । ଉକ୍ତ ଘରଟି ପ୍ରାୟ ୧୦୦ ବର୍ଷ ପୁରୁଣା ବୋଲି କୁହାଯାଉଛି । ତେଣୁ ଏହା ବିପଦ ସଙ୍କୁଳ ଅବସ୍ଥାରେ ରହିଥିଲା । କାନ୍ଥ ତଳେ ୧୦ ଜଣ ଚାପି ହୋଇଯାଇଥିବା ଅନୁମାନ କରାଯାଉଛି ।
