ଚମ୍ପୁଆ,୩୦ା୧୨(ଡି.ଏନ.ଏ): ଦୈନିକ ପରିବା ବଜାର ଥାଉ ଥାଉ ବେପାରୀଙ୍କର କିଣାବିକାର ଆଡ଼ା ପାଲଟିଛି ଚମ୍ପୁଆ ବସ୍ଷ୍ଟାଣ୍ଡ। ବେପାରୀମାନେ ବସ୍ଷ୍ଟାଣ୍ଡ ଭିତରେ ଚାଷୀଙ୍କଠୁ କାରବାର କରୁଛନ୍ତି। ଏପରିକି ବସ୍ ରହୁଥିବା ସ୍ଥାନ ଗୁଡିକ ମଧ୍ୟ ସକାଳ ସମୟରେ ବେପାରୀମାନଙ୍କ କବ୍ଜାରେ ରହୁଛି। ଏଠାରେ ଦିନକୁ ଦିନ ବେପାରୀଙ୍କର ପାର୍ଦୃଭାବ ବୃଦ୍ଧି ପାଉଥିଲେ ମଧ୍ୟ ନିୟନ୍ତ୍ରିତ ବଜାର କମିଟି ପକ୍ଷରୁ କୌଣସି ଅଙ୍କୁଷ ଲଗାଯାଉ ନାହିଁ। ପରିବା କିଣାବିକା ଦ୍ୱାରା ଦୈନିକ ବସ୍ଯୋଗେ ଯାତ୍ରା କରୁଥିବା ଯାତ୍ରୀମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି।
ସୂଚନାଯୋଗ୍ୟ, କେନ୍ଦୁଝର ଜିଲା ଚମ୍ପୁଆ ନିୟନ୍ତ୍ରିତ ବଜାର କମିଟି ପକ୍ଷରୁ ଚମ୍ପୁଆ ଦୈନିକ ପରିବା ହାଟ ଖୋଲାଯାଇଛି। କିଣାବିକା ପାଇଁ ପିଣ୍ଡିମାନ ନିର୍ମାଣ କରାଯିବା ସହିତ ପରିବା ବିକ୍ରେତାମାନଙ୍କ ପାଇଁ ବ୍ୟବସ୍ଥା କରାଯାଇଛି। ଦୈନିକ ନିୟନ୍ତ୍ରିତ ବଜାର କମିଟିର କର୍ମଚାରୀମାନେ ଏଠାରେ ପରିବା ବିକ୍ରେତାଙ୍କଠାରୁ ଧାର୍ଯ୍ୟ ମହାସୁଲ ଆଦାୟ କରୁଛନ୍ତି। କିନ୍ତୁ ବେପାରୀମାନେ ଉକ୍ତ ପରିବା ବଜାରରେ ନ ରହି ବସ୍ଷ୍ଟାଣ୍ଡ ଭିତରେ ଚାଷୀଙ୍କଠାରୁ ପରିବା କିଣାବିକା କରୁଛନ୍ତି। କେତେକ ବେପାରୀ ଚାଷୀଙ୍କୁ ମିଛସତ କହି କମ ଦରରେ ପରିବା କିଣିବା ନିମନ୍ତେ ବସ୍ଷ୍ଟାଣ୍ଡର ମୁଖ୍ୟ ଫାଟକଠାରେ ଜଗି ରହୁଛନ୍ତି। ଏନେଇ ବିରୋଧ କଲେ କେତେକ ବେପାରୀ ବସ୍ରେ ମାଲ ପରିବହନ କରିବୁ କହି ଭୂଅଁା ବୁଲାଉଛନ୍ତି। ମାତ୍ର ମହାସୁଲ ଆଦାୟକାରୀ ତାଙ୍କୁ ତାଗିଦ୍ କରିବା ବଦଳରେ ତାଙ୍କଠାରୁ ଯାଇ ମହାସୁଲ ଆଦାୟ କରିବା ଦେଖିବାକୁ ମିଳିଛି। ଏ ନେଇ ବସ୍ଷ୍ଟାଣ୍ଡ ଦାୟିତ୍ୱରେ ଥିବା ସୁପରଭାଇଜର ବିଶ୍ୱମ୍ବର ସାହୁଙ୍କୁ ପଚାରିବାରୁ କହିଛନ୍ତି, ବାରମ୍ବାର ମନା କଲା ପରେ ବି ବେପାରୀମାନେ କଥା ଶୁଣୁନାହାନ୍ତି। ବିଭିନ୍ନ ଆଳ ଦେଖାଉଛନ୍ତି। ଏପରିକି ଅନେକ ସମୟରେ ସେମାନେ ଗାଳିଗୁଲଜ କରୁଥିବା ମଧ୍ୟ ସେ କହିଥିଲେ।