ନ୍ୟୁୟର୍କ,୨୧।୧୧ : ଆମେରିକାର ପଶ୍ଚିମ ନ୍ୟୁୟର୍କରେ ଶନିବାର ପ୍ରବଳ ତୁଷାରପାତ ଜାରି ରହିବାରୁ କେତେକ ଅଞ୍ଚଳ ୬ଫୁଟ୍ ବରଫ ତଳେ ପୋତିହୋଇଯାଇଛି। ଫଳରେ ଯାନବାହାନ ଚଳାଚଳ ବନ୍ଦ ରହିବା ସହ ବଫାଲୋ ଅଞ୍ଚଳରେ ଅନେକ ବିମାନ ଚଳାଚଳ ବାତିଲ ହୋଇଛି।
ତୁଷାରପାତରେ ହୃଦ୍ଘାତ ହୋଇ ୨ ଜଣଙ୍କ ମୃତ୍ୟୁ ଘଟିଥିବା କାଉଣ୍ଟି ଅଧିକାରୀ କହିଛନ୍ତି। ତୁଷାର ଝଡ଼ରୁ ୨୮୦ ଜଣଙ୍କୁ ଉଦ୍ଧାର କରିବା ଆବଶ୍ୟକ ପଡ଼ିଥିଲା ବୋଲି ନ୍ୟୁୟର୍କ ଗଭର୍ନର କାଥି ହୋଚୁଲ୍ କହିଛନ୍ତି। ଉଦ୍ଧାର କାର୍ଯ୍ୟରେ କର୍ମଚାରୀମାନେ ନିୟୋଜିତ ହୋଇଛନ୍ତି। ତୁଷାର ଝଡ଼ ସମୟରେ ଅନେକ ହାଇଓ୍ବେକୁ ବନ୍ଦ କରିଦିଆଯିବା ସହ ଲୋକମାନଙ୍କୁ ଘରୁ ନ ବାହାରିବାକୁ ପରାମର୍ଶ ଦିଆଯାଇଥିଲା। ଫଳରେ ଝଡ଼ଜନିତ ଦୁର୍ଘଟଣା ରୋକାଯାଇପାରିଛି ବୋଲି ଗଭର୍ନର କହିଛନ୍ତି।
ଜାତୀୟ ପାଣିପାଗ ସେବା ବିଭାଗ ସୂଚନା ଅନୁଯାୟୀ ଅର୍ଚାର୍ଡ ପାର୍କରେ ୭୭ ଇଞ୍ଚ ବହଳର ବରଫ ପଡ଼ିଥିବାବେଳେ ଓ୍ବାଟରଟାଉନ ନିକଟରେ ଥିବା ନାଚୁରାଲ ବ୍ରିଜ୍ ଅଞ୍ଚଳରେ ୭୨.୩ ଇଞ୍ଚ ବରଫ ପଡ଼ିଛି।
