ଜେନେଭା,୧୩।୧୧ : ଆଫଗାନିସ୍ତାନରେ ହୋଇଥିବା କ୍ଷମତା ଦଖଲ, ୟୁକ୍ରେନରେ ଚାଲିଥିବା ଯୁଦ୍ଧ ଏବଂ ମଧ୍ୟ ପୂର୍ବରେ ସଙ୍କଟ ଯୋଗୁଁ ଲକ୍ଷ ଲକ୍ଷ ଲୋକ ବିସ୍ଥାପିତ ହୋଇଛନ୍ତି। ଆସୁଥିବା ଶୀତ ଏହି ବିସ୍ଥାପିତ ଲୋକଙ୍କ ପାଇଁ ଏକ ବଡ଼ ସମସ୍ୟା ସୃଷ୍ଟି କରିବାର ଆଶଙ୍କା ରହିଛି। ମିଳିତ ଜାତିସଂଘ ମାନବ ଅଧିକାର ଆୟୋଗ ଏବଂ ଜାତିସଂଘର ଶରଣାର୍ଥୀ ଏଜେନ୍ସି ଏ ସମ୍ପର୍କରେ ଚେତାବନୀ ଦେଇଛନ୍ତି।
ଉଭୟ ଏଜେନ୍ସି ପକ୍ଷରୁ କୁହାଯାଇଛି ଯେ ଆଗାମୀ ଶୀତ ପୃଥିବୀର ବିଭିନ୍ନ ଅଞ୍ଚଳର ବିସ୍ଥାପିତଙ୍କ ପାଇଁ ଅତ୍ୟନ୍ତ ବିପଜ୍ଜନକ ହେବ। ରିପୋର୍ଟରେ କୁହାଯାଇଛି ଯେ ଗତ ବର୍ଷ ଅପେକ୍ଷା ଚଳିତ ବର୍ଷର ଶୀତ ଅଧିକ ଆହ୍ବାନମୂଳକ ହେବାକୁ ଯାଉଛି।
ରିପୋର୍ଟରେ କୁହାଯାଇଛି ଯେ ୟୁକ୍ରେନ ଯୁଦ୍ଧରେ ବିସ୍ଥାପିତ ହୋଇଥିବା ଲୋକମାନେ ଅସହାୟ ଭାବେ ଶୀତର ସମ୍ମୁଖୀନ ହେବାକୁ ବାଧ୍ୟ ହେବେ। ଲୋକମାନେ ଭଙ୍ଗା ଘର ଏବଂ ଅଟ୍ଟାଳିକାରେ ରହିବାକୁ ବାଧ୍ୟ ହେବେ ଯାହା ଶୀତରୁ ରକ୍ଷା କରିବା ପାଇଁ ପର୍ଯ୍ୟାପ୍ତ ନୁହେଁ । ଏହା ବ୍ୟତୀତ ଆଫଗାନିସ୍ତାନର ଅନେକ ଅଞ୍ଚଳରେ ତାପମାତ୍ରା ମାଇନସ୍ ୨୫ ଡିଗ୍ରୀ ସେଲସିୟସ ପର୍ଯ୍ୟନ୍ତ ଖସିଯିବାର ସମ୍ଭାବନା ରହିଛି। ଯେଉଁଥିପାଇଁ ବିସ୍ଥାପିତମାନଙ୍କ ସଙ୍କଟ ମଧ୍ୟ ବଢ଼ିଯିବାର ଆଶଙ୍କା ରହିଛି।
ମିଳିତ ଜାତିସଂଘ ମାନବ ଅଧିକାର ଆୟୋଗ କହିଛି ଯେ ମଧ୍ୟ ପୂର୍ବରେ ବିସ୍ଥାପିତ ସିରିଆ ଏବଂ ଇରାକୀମାନେ ପୁଣି ଥରେ ବରଫ ଝଡର ସମ୍ମୁଖୀନ ହେବେ। ଏହିପରି ବିସ୍ଥାପିତ ପରିବାରଗୁଡିକ ଖାଦ୍ୟ ଏବଂ ଏକ ଉଷ୍ମ ସ୍ଥାନ ବାଛିବା ବ୍ୟତୀତ ଅନ୍ୟ କୌଣସି ବିକଳ୍ପ ପାଇବେ ନାହିଁ। କୁହାଯାଇଛି ଯେ ଏହିପରି ବିସ୍ଥାପିତ ଲୋକମାନେ ସର୍ବଦା ନିଜ ଆଶ୍ରୟସ୍ଥଳକୁ ଗରମ ରଖିବା ପାଇଁ, ଉଷ୍ମ ପୋଷାକ ଏବଂ ଖାଦ୍ୟ ପାଇଁ ସଂଘର୍ଷ କରିଥାନ୍ତି।
ରିପୋର୍ଟ ଅନୁଯାୟୀ, ସିରିଆ ଏବଂ ଇରାକରୁ ୩.୪ ଲକ୍ଷ ଶରଣାର୍ଥୀ ଏବଂ ଲେବାନନ, ଜୋର୍ଡାନ, ଇରାକ, ଇଜିପ୍ଟର ଆଭ୍ୟନ୍ତରୀଣ ବିସ୍ଥାପିତ ଲୋକଙ୍କୁ ଶୀତରୁ ସୁରକ୍ଷା ପାଇଁ ଅଧିକ ଜରୁରୀ ସହାୟତା ଆବଶ୍ୟକ ହେବ। ରିପୋର୍ଟରେ ଦର୍ଶାଯାଇଛି ଯେ ଲେବାନନରେ ହୋଇଥିବା ଭୟଙ୍କର ଆର୍ଥିକ ସଙ୍କଟ ସମସ୍ତଙ୍କୁ ଦାରିଦ୍ର୍ୟତାକୁ ଠେଲି ଦେଇଛି। ପ୍ରତି ୧୦ ଜଣ ସିରିଆ ଶରଣାର୍ଥୀଙ୍କ ମଧ୍ୟରୁ ନଅ ଜଣ ଅତ୍ୟଧିକ ଦାରିଦ୍ର୍ୟରେ ଜୀବନ ବିତାଉଛନ୍ତି। ଏହି ଲୋକମାନେ ଖାଦ୍ୟ ଏବଂ ଚିକିତ୍ସା ସହାୟତା ଠାରୁ ବଞ୍ଚିତ ହେଉଛନ୍ତି।