ନୂଆଦିଲ୍ଲୀ, ୧୦।୧୦(ପି.ଟି.(୦
ମହିଳା ଟି୨୦ ଚ୍ୟାଲେଞ୍ଜ କ୍ରିକେଟ ଟୁର୍ନାମେଣ୍ଟ ଆସନ୍ତା ମାସରେ ୟୁନାଇଟେଡ ଆରବ ଏମିରେଟ୍ସ(ୟୁଏଇ)ରେ ଅନୁଷ୍ଠିତ ହେବ। ଏଥିରେ ୩୦ରୁ ଊର୍ଦ୍ଧ୍ୱ ଖେଳାଳି ଅଂଶଗ୍ରହଣ କରିବେ। ଖେଳାଳିମାନଙ୍କୁ ଚଳିତମାସ ୧୩ ତାରିଖରେ ମୁମ୍ବାଇରେ ଏକତ୍ରିତ ହେବାକୁ କୁହାଯାଇଛି। ଖେଳାଳିମାନଙ୍କୁ କ୍ୱାରାଣ୍ଟାଇନ୍ ଔପଚାରିକତା ପୂରଣ କରିବାକୁ ଥିବାରୁ ୩ ଦଳର ପ୍ରସ୍ତୁତିକୁ ନେଇ ପ୍ରଶ୍ନ ଉଠିଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ପକ୍ଷରୁ ଏପର୍ଯ୍ୟନ୍ତ ଦଳ ଘୋଷଣା କରାଯାଇ ନ ଥିଲେ ହେଁ ଅନ୍ତର୍ଜାତୀୟ ଖେଳାଳି ଏବଂ କେତେକ ଘରୋଇ ଖେଳାଳିଙ୍କୁ ସେମାନଙ୍କ ଚୟନ ସମ୍ପର୍କରେ ଅବଗତ କରାଯାଇଛି। ଦେଶର ବିଭିନ୍ନ ଭାଗରୁ ଖେଳାଳିମାନେ ମୁମ୍ବାଇରେ ଏକତ୍ରିତ ହେବାପରେ ଏକସପ୍ତାହରୁ ଊର୍ଦ୍ଧ୍ୱ କ୍ୱାରାଣ୍ଟାଇନ୍ରେ ରହିବେ। ଏହି ସମୟ ମଧ୍ୟରେ ସେମାନେ ଏକାଧିକଥର କୋଭିଡ ଟେଷ୍ଟ ଦେବେ। ରିପୋର୍ଟ ନେଗେଟିଭ୍ ଥିବା ଖେଳାଳିମାନେ ଚଳିତମାସ ୨୨ ତାରିଖରେ ୟୁଏଇ ଯିବା ସମ୍ଭାବନା ରହିଛି। ସେଠାରେ ସେମାନେ ଆଇପିଏଲ ଖେଳାଳିଙ୍କ ଭଳି ୬ ଦିନ ପାଇଁ କ୍ୱାରାଣ୍ଟାଇନ୍ରେ ରହିବେ। ୩ ଥର ଆରଟି-ପିସିଆର ଟେଷ୍ଟ ନେଗେଟିଭ୍ ହେବାପରେ ଖେଳାଳିଙ୍କୁ ବାୟୋ-ବବ୍ଲ ଅଞ୍ଚଳକୁ ପ୍ରବେଶ ସୁଯୋଗ ମିଳିବ। ଟୁର୍ନାମେଣ୍ଟ ନଭେମ୍ବର ୪ରୁ ୯ ପର୍ଯ୍ୟନ୍ତ ଅନୁଷ୍ଠିତ ହେବ। ଟି୨୦ ଅନ୍ତର୍ଜାତୀୟରୁ ଅବସର ଘୋଷଣା କରିଥିବା ମିଥାଲି ରାଜ ଓ ଝୁଲଣ ଗୋସ୍ବାମୀ ମଧ୍ୟ ଏହି ଟୁର୍ନାମେଣ୍ଟରେ ସାମିଲ ହେବେ। ଖେଳାଳିମାନଙ୍କୁ ବିଭିନ୍ନ ନୀତି ନିୟମ ସମ୍ପର୍କରେ ଅବଗତ କରାଇବା ପାଇଁ ଏକ ହ୍ବାଟ୍ସଆପ୍ ଗ୍ରୁପ କରାଯାଇଛି। କେତେକ ୧୯ ବର୍ଷରୁ କମ୍ ଖେଳାଳିଙ୍କୁ ମଧ୍ୟ ସାମିଲ କରାଯାଇଛି। ତିନୋଟି ଆଇପିଏଲ ଭେନ୍ୟୁ ମଧ୍ୟରୁ ଛୋଟ ଶାରଜାରେ ୪ଟିଯାକ ମ୍ୟାଚ ଖେଳାଯିବ। ସେଠାରେ ୧୨ଟି ଆଇପିଏଲ ମ୍ୟାଚ ଆୟୋଜନ ହେବାର କାର୍ଯ୍ୟକ୍ରମ ରହିଛି। ମୁମ୍ବାଇ ଓ ୟୁଏଇରେ କ୍ୱାରାଣ୍ଟାଇନ୍ ଅବଧି କାଟିବାପରେ ଖେଳାଳିମାନେ ପରିବେଶ ସହିତ ଖାପଖୁଆଇବା ପାଇଁ ଏକସପ୍ତାହରୁ କମ୍ ସମୟ ପାଇବେ। ଖେଳାଳିମାନେ ୬ ମାସରୁ ଊର୍ଦ୍ଧ୍ୱ ଖେଳି ନ ଥିବାବେଳେ ଏତେ କମ୍ ସମୟ ମଧ୍ୟରେ ପ୍ରସ୍ତୁତ ହେବାକୁ ନେଇ ପ୍ରଶ୍ନ ଉଠିଛି। ଆଇପିଏଲ ଖେଳାଳିମାନେ ମାସେ ଆଗରୁ ୟୁଏଇରେ ପହଞ୍ଚତ୍ଥିଲେ।