ଢେଙ୍କାନାଳ ଅଫିସ, ୫।୧୧: ଶିଳ୍ପରେ ସମୃଦ୍ଧ। ପର୍ଯ୍ୟଟନ ସମ୍ଭାରରେ ଭରପୂର। ରାଜନୈତିକ ଏବଂ ପ୍ରଶାସନିକ ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ। ଏସବୁ ବଢ଼ାଇଛି ଢେଙ୍କାନାଳର ଗୁରୁତ୍ୱ। ହେଲେ ରାଜ୍ୟର କେନ୍ଦ୍ରସ୍ଥଳରେ ଅବସ୍ଥିତ ଏହି ଜିଲାର ପ୍ରଶାସନିକ ପରିଚାଳନା ବ୍ୟବସ୍ଥା ଢିଲା ପଡ଼ିଛି। ଦୀର୍ଘଦିନ ଧରି ଗୁରୁତ୍ୱପୂର୍ଣ୍ଣ ପଦପଦବୀ ଖାଲି ପଡ଼ିଥିବାରୁ ଲାଗିରହିଛି ଅଚଳାବସ୍ଥା। କାମଚଳାରେ ହେଉଥିବା କାମ ହିତାଧିକାରୀଙ୍କୁ ସନ୍ତୁଷ୍ଟ କରିପାରୁ ନ ଥିବାବେଳେ ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି।
ଢେଙ୍କାନାଳ ଜିଲାରେ ପୋଲିସ ମୁଖିଆ ପଦବୀ ମାସେ ହେଲା ଖାଲିପଡ଼ିଛି। ସେହିପରି ୬ମାସ ହେବ ଜିଲା କାର୍ଯ୍ୟାଳୟରେ ଅତିରିକ୍ତ ଜିଲାପାଳ (ପ୍ରଶାସନ), ୨ବର୍ଷ ହେବ ଜିଲା ପର୍ଯ୍ୟଟନ ଅଧିକାରୀ ଏବଂ ଜିଲା ସୂଚନା ଓ ଲୋକସମ୍ପର୍କ ଅଧିକାରୀ (ଡିଆଇପିଆର୍ଓ) ପଦବୀରେ ସ୍ଥାୟୀ ନିଯୁକ୍ତି ଦିଆଯାଇନାହିଁ। ଭାରପ୍ରାପ୍ତ ଅଧିକାରୀମାନେ ଅତିରିକ୍ତ ଭାବେ ଏହି ଦାୟିତ୍ୱ ସମ୍ଭାଳୁଛନ୍ତି। ଜିଲାରେ ଦୁଇ ଅତିରିକ୍ତ ଜିଲାପାଳ ପଦବୀ ରହିଛି। ସେଥିରୁ ଗୋଟିଏ ରାଜସ୍ବ, ଅନ୍ୟଟି ପ୍ରଶାସନ। ଜୁନ୍ରୁ ଅତିରିକ୍ତ ଜିଲାପାଳ (ପ୍ରଶାସନ)ଙ୍କ ବଦଳି ହୋଇଯାଇଥିଲା। ରାଜସ୍ବ ବିଭାଗର ଅତିରିକ୍ତ ଜିଲାପାଳ ଏବେ ଏହି ଦାୟିତ୍ୱରେ ଅଛନ୍ତି। ସେହିପରି ମାସେ ତଳେ ଏସ୍ପିଙ୍କୁ ଭିଜିଲାନ୍ସ ବିଭାଗକୁ ବଦଳି କରିଦିଆଯାଇଥିଲା। ଦଶହରା ଓ ଲକ୍ଷ୍ମୀପୂଜା ପାଖେଇ ଆସୁଥିବା ବେଳେ ହଠାତ୍ ଏସ୍ପିଙ୍କୁ ବଦଳି କରାଯିବାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏବେ ଅନୁଗୋଳ ଏସ୍ପି ଢେଙ୍କାନାଳ ଦାୟିତ୍ୱରେ ରହିଛନ୍ତି। ପାର୍ବଣ ସମୟରେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେଲେ ପୋଲିସ ମୁଖିଆଙ୍କ ବିନା କିପରି ଏହାକୁ ନିୟନ୍ତ୍ରଣ କରିହେବ ତାକୁ ନେଇ ଏବେ ଚର୍ଚ୍ଚା ହେଉଛି। ସେହିପରି ଦୁଇବର୍ଷ ହେବ ଖାଲି ପଡ଼ିଥିବା ଜିଲା ପର୍ଯ୍ୟଟନ ଅଧିକାରୀ ଦାୟିତ୍ୱରେ ଅନୁଗୋଳ ଜିଲା ପର୍ଯ୍ୟଟନ ଅଧିକାରୀ ଦାୟିତ୍ୱ ତୁଲାଉଛନ୍ତି। ଆଗକୁ ପର୍ଯ୍ୟଟନ ଋତୁ ଆସୁଥିବାବେଳେ ବିଭାଗୀୟ ମୁଖିଆ ନ ଥିବା ନେଇ ଆଲୋଚନା ଜୋର୍ ଧରିଛି। ଜିଲା ସୂଚନା ଓ ଲୋକସମ୍ପର୍କ ବିଭାଗରେ ମଧ୍ୟ ଅନୁରୂପ ଅବସ୍ଥା। ଏଠାରେ ମଧ୍ୟ ଦୁଇବର୍ଷ ହେଲା ମୁଖ୍ୟ ପଦବୀ ଖାଲିପଡ଼ିଛି। ଜଣେ ଡେପୁଟି କଲେକ୍ଟର ଏହି ଦାୟିତ୍ୱରେ ସମ୍ଭାଳୁଛନ୍ତି। ଜିଲାରେ ବହୁ ଗୁରୁତ୍ୱପୂର୍ଣ୍ଣ ପଦବୀରେ ସ୍ଥାୟୀ ଅଧିକାରୀ ନ ଥିବାରୁ ବ୍ୟାପକ ସମସ୍ୟା ଦେଖାଦେଇଛି। ସରକାର ଏଥିପ୍ରତି ଦୃଷ୍ଟି ଦେଇ ସମସ୍ୟାର ସମାଧାନ କରିବାକୁ ସାଧାରଣରେ ଦାବି ହୋଇଛି।
ବହୁ ମାମଲା ପଡ଼ିରହିଛି
ଢେଙ୍କାନାଳ ଭଳି ପ୍ରମୁଖ ଜିଲାରେ ମାସେ ହେବ ଏସ୍ପି ପଦବୀ ଏବଂ ୬ମାସ ହେଲା ଗୋଟିଏ ଏଡିଏମ୍ ପଦବୀ ଖାଲି ପଡ଼ିବା ଦୁର୍ଭାଗ୍ୟର ବିଷୟ। ପାର୍ବଣ ସମୟରେ ଜିଲାରେ ପୋଲିସ ମୁଖିଆ ନ ରହିବା ଯୋଗୁ ଆଇନ ଶୃଙ୍ଖଳା ପରିସ୍ଥିତିକୁ କିଭଳି ଧ୍ୟାନ ଦିଆଯିବ ତାହା ସରକାର ଜାଣିବା କଥା। ଏଡିଏମ୍ ପଦବୀ ଖାଲି ପଡ଼ିଥିବା ଯୋଗୁ କୋର୍ଟ କାମ ହୋଇପାରୁନାହିଁ। ବହୁ ମାମଲା ମଧ୍ୟ ପଡ଼ିରହିଛି।
-ଭାବଗ୍ରାହୀ ପଣ୍ଡା, ଆଇନଜୀବୀ
ଜନପ୍ରତିନିଧି ଦୃଷ୍ଟି ନ ଦେବା ଦୁଃଖର ବିଷୟ
ଢେଙ୍କାନାଳ ଜିଲାରେ ଐତିହ୍ୟସମ୍ପନ୍ନ ଗଣପର୍ବ ଲକ୍ଷ୍ମୀପୂଜା ପାଳନ କରାଯାଉଥିବା ବେଳେ ଏସ୍ପି ପଦବୀ ଖାଲି ପଡ଼ିବା ଚିନ୍ତାର ବିଷୟ। ଯଦିଓ କୋଭିଡ୍ କଟକଣା ପାଇଁ ଏଥର ପୂଜା ନିରାଡମ୍ବରରେ ହେଉଛି, ତଥାପି ପାର୍ବଣକୁ ସୁଚାରୁରୂପେ ପରିଚାଳନା କରିବା ଲାଗି ଜିଲା ପୋଲିସ ମୁଖ୍ୟଙ୍କ ଗୁରୁଦାୟିତ୍ୱ ରହିଛି। ଜନପ୍ରତିନିଧି କିମ୍ବା ସରକାର ଏଥିପ୍ରତି ଦୃଷ୍ଟି ନ ଦେବା ଦୁଃଖର ବିଷୟ।
-ବିଶ୍ୱନାଥ ବେହେରା, ସଭାପତି ମିଳିତବଜାର ଲକ୍ଷ୍ମୀପୂଜା କମିଟି
ଆଇନଶୃଙ୍ଖଳା ବିଗୁଡୁଛି
ପ୍ରଶାସନିକ ତଥା ରାଜନୈତିକ ଦୃଷ୍ଟିକୋଣରୁ ଢେଙ୍କାନାଳର ଗୁରୁତ୍ୱ ଅଧିକ। ଏଠାରେ ବହୁ ଗୁରୁତ୍ୱପୂର୍ଣ୍ଣ ପଦପଦବୀରେ ଅଧିକାରୀ ଚୌକି ଖାଲିପଡ଼ିଛି। ଅନ୍ୟ ଜିଲାର ଏସ୍ପିଙ୍କୁ ଦାୟିତ୍ୱ ଦିଆଯାଇଛି। ଟ୍ରାଫିକ୍ ପରିଚାଳନାରେ ସମସ୍ୟା ହେଉଛି। ଲକ୍ଷ୍ମୀପୂଜା ପରିଚାଳନାରେ ସମସ୍ୟା ଉପୁଜୁଛି। ଆଇନଶୃଙ୍ଖଳା ବିଗୁଡୁଛି। ସରକାର ଏହାକୁ ଗୁରୁତ୍ୱର ସହ ବିଚାର କରିବା ଆବଶ୍ୟକ।
-ସୁଧାଂଶୁ କୁମାର ଦଳେଇ, ସମ୍ପାଦକ, ଜବାହର ଚୌକ ଲକ୍ଷ୍ମୀପୂଜା କମିଟି