କେନ୍ଦୁଝର, ୨୨।୪(ସ୍ବ.ପ୍ର./ଡି.ଏନ.ଏ.)-କେନ୍ଦୁଝର ପୋଲିସ ବୁଧବାର ଲକ ଡାଉନ ପାଇଁ ରାସ୍ତାରେ ପାଟ୍ରୋଲିଂ କରୁଥିବା ବେଳେ ଜଣେ ଖବରଦାତାଙ୍କୁ ଆକ୍ରମଣ କରାଯାଇଛି। ଏହାକୁ ନେଇ ଟାଉନ ଥାନାରେ ସେ ଲିଖିତ ଅଭିଯୋଗ କରିଛନ୍ତି। ସେ ତାଙ୍କ ଅସୁସ୍ଥ ଝିଅ ସହିତ କାର୍ରେ ମେଡିକାଲ ଯାଉଥିବା ବେଳେ ଡେଲି ମାର୍କେଟ ନିକଟରେ ପୋଲିସ ତାଙ୍କୁ ଅଟକାଇଥିଲା। ସେ ନିଜର ପରିଚୟ ଦେବା ସହ ଡାକ୍ତରଖାନା ଯାଉଥିବା କହିଥିଲେ ହେଁ ଜଣେ କନଷ୍ଟେବଳ ପ୍ରଥମେ ଗାଳି ଗୁଲଜ କରିଥିଲେ। ପରେ ଅନ୍ୟ ଜଣେ ଏସଆଇ ଆସି ଗାଳି ଗୁଲଜ କରିବା ସହ ଆକ୍ରମଣ କରିଥିବା ଅଭିଯୋଗ ହୋଇଛି। ଏନେଇ ଟାଉନ ଥାନା ଇନଚାର୍ଜ ଅମିତ ଭୂୟାଁ କହିଛନ୍ତି ଯେ, ଅଭିଯୋଗ ପାଇଛୁ। ରାସ୍ତାରେ ଡ୍ୟୁଟି ସମୟରେ ଯାଞ୍ଚ କରୁଥିବା ପୋଲିସ କର୍ମଚାରୀଙ୍କୁ ଉକ୍ତ ଖବରଦାତା ଆଶାଳୀନ ଆଚରଣ କରିବା ସହ ଆକ୍ରମଣ କରିଥିବା ନେଇ ଆଉ ଏକ ଅଭିଯୋଗ ମିଳିଛି। ଉଭୟ ଅଭିଯୋଗର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ଏଭଳି ଘଟଣାକୁ ପ୍ରେସ କ୍ଲବ ପକ୍ଷରୁ ନିନ୍ଦା କରି ଏହା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି କ୍ଳବ ସଭାପତି ସତ୍ୟ ନାରାୟଣ ମିଶ୍ର କହି କାର୍ଯ୍ୟାନୁଷ୍ଠାନ ଦାବି କରିଛନ୍ତି।
