ନୂଆଦିଲ୍ଲୀ,୧୭।୧୧: ରାଜଧାନୀ ଦିଲ୍ଲୀର ପ୍ରଦୂଷଣ ଏବେ ସମସ୍ତଙ୍କ ଚିନ୍ତାର କାରଣ ପାଲଟିଛି। ଏବେ ସେଠାରେ ଲୋକେ ଘର ବାହାରକୁ ବାହାରିବାକୁ ଭୟ କରୁଛନ୍ତି। କାରଣ ଦିଲ୍ଲୀର ବାୟୁ ପ୍ରଦୂଷଣର ମାତ୍ରା ୬ଶହ ଟପିଗଲାଣି। ଶନିବାର ଦିଲ୍ଲୀର ଅଧିକାଂଶ ଅଞ୍ଚଳରେ ଏୟାର କ୍ୱାଲିଟି ଇଣ୍ଡେକ୍ସ ଥିଲା ପ୍ରାୟ ୫୨୭। ଏହାକୁ ଦୃଷ୍ଟିରେ ରଖି ପାଣିପାଗ ବିଭାଗ ସ୍କାଇମେଟ ଏକ ରିପୋର୍ଟ ପ୍ରକାଶ କରିଛି। ଯେଉଁଥିରେ ଦିଲ୍ଲୀ ବିଶ୍ୱର ସବୁଠାରୁ ଅଧିକ ପ୍ରଦୂଷିତ ସହର ବୋଲି ଦର୍ଶାଯାଇଛି। ଏହି ତାଲିକାର ଦ୍ୱିତୀୟ ସ୍ଥାନରେ ରହିଛି ପାକିସ୍ତାନର ଲାହୋର ଓ ତୃତୀୟ ସ୍ଥାନରେ ରହିଛି ଉଜବେକିସ୍ତାନର ତାସକଂଦ। ତେବେ ମୁମ୍ବାଇ ଓ କୋଲକତା ଏହି ପ୍ରଦୂଷଣ ତାଲିକାର ଟପ୍ ୧୦ରେ ରହିଛନ୍ତି। ଏଥିରେ କୋଲକାତା ପଞ୍ଚମ ସ୍ଥାନରେ ଥିବା ବେଳେ ମୁମ୍ବାଇ ନବମ ସ୍ଥାନରେ ରହିଛି। ସୂଚନାଯୋଗ୍ୟ, କିଛିଦିନ ପୂର୍ବେ ଆଇକ୍ୟୁ ଏୟାର ଭିଜୁଆଲ ମଧ୍ୟ ଦିଲ୍ଲୀକୁ ସର୍ବାଧିକ ପ୍ରଦୂଷିତ ସହର ବୋଲି କହିଥିଲା। ତେବେ ଦିଲ୍ଲୀର ଏୟାର କ୍ୱାଲିଟିକୁ ଦେଖି ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ବିଭିନ୍ନ ସ୍ଥାନରେ ଏୟାର ପ୍ୟୁରିଫାୟାର ଲଗାଇବାକୁ ନିର୍ଦ୍ଦେଶ ଦେଇଛନ୍ତି।
