ଭବାନୀପାଟଣା,୧୨।୬(ଡି.ଏନ୍.ଏ.): ବଁଚ୍ବାର ଲାଗି ହେଲେ ଯୁଝ୍ବାକେ ପଡ଼ବା। ସେଟା କୁଟୁମ ପୁଷ୍ବାର ଲାଗି ହେଉ କି ପେଟ ପାଲବାର ଲାଗି ହେଉ। ମୁନୁଷ୍ କେନ୍ନେ ଗୁପ୍ଚୁପ୍ ବିକି ନିଜର ପଁାଚ୍ ପରାନୀ କୁଟୁମ ପୁଷୁଛେ ତ ଆର କିଏ ଗୁପ୍ଚୁପ୍ ବିକି ନିଜର ପାଠପଢ଼ା ଅଭିଲାଶକେ ପୂରନ୍ କରବାର ଚେଷ୍ଟା କରୁଛେ। ଏନ୍ତା ଗୁଟେ ଘଟନା ଦେଖ୍ବାକେ ମିଲିଛେ ଭବାନୀପାଟଣା ବ୍ଲକ ଛେଲିଆମାଲ ପଁଚେତ୍ ପରିଆ ଗଁାରେ।
ସୂଚନା ଅନ୍ସାରେ ପରିଆ ଗଁାର କପିଳ ପଟେଲ(୪୬)। ପରିବାର କହିଲେ ମାଏକିନା କୁମୁଦିନୀ(୩୭), ଦୁଇ ପୁଓ ଦେବାନନ୍ଦ(୧୫), ଲୋଚନ(୧୦) ଆର ୭୦ ବଛ୍ରିଆ ବୁଢ଼ା ବାପ୍ ମୁନି ପଟେଲ। କପିଳ ରୋଗ୍ରେ ପଡ଼ଲାରୁ କୁମୁଦିନୀ ତାକର ସେବା ଯତନ୍ କରୁଛନ୍। ବଡ଼ ପୁଓ ଦେବାନନ୍ଦ(୧୫) ଚଲତି ବଛର ମାଟ୍ରିକ ପାସ୍ କରିଥିଲାବେଲେ ସାନପୁଓ ଗଁା ସ୍କୁଲରେ ପଢ଼ୁଛନ୍। ଏନ୍ତାଥି ପରିବାରକେ ଚଲବାରେ ବହୁତ ଅସବିଧା ହେଉଛେ। ଇଆଡ଼େ ପରିବାରଟା ନିହାତି ଗରିବ ହେଇଥିଲାବେଲେ ସରକାରୀ ସାହାଯ୍ ସାତସପନ ହେଇଛେ। ଯେନ୍ଥିରଲାଗି ଦେବାନନ୍ଦ ଗଁା ଗଁା ବୁଲି ଗୁପ୍ଚୁପ୍ ବିକି ପରିବାରର ପେଟ ପାଲୁଛନ୍। ଏନ୍ତାକି ଇ ଗରିବ୍ ପରିବାର ପାଖେ ରାଶନ କାର୍ଡ ଖଁଡ଼େ ନଁାଇଁନ। ପରିବାରଟା ମୂଲଦିନୁ ଜୀବନ୍ ଜୀବିକା ଲାଗି ଯୁଝୁଛନ୍। କପିଳ ରୋଗ୍ରେ ପଡ଼ଲା ଆଗରୁ ପନିପରିବା ବେପାର କରି କୁଟୁମ ପୁଷୁଥିଲେ। ହେଲେ ସେ ଗଲା ୫ ବଛର ହେଲା ରୋଗ୍ରେ ପଡ଼ଲାରୁ ପରିବାରଟା ଅସାହା ହେଇଯାଇଛନ୍। ଘରର ଏନ୍ତା ଥିତି ଦେଖି ଦେବାନନ୍ଦ ପରିବାର ଚଲାବାର ଲାଗି ଅଁଟା ଭିଡ଼ିଥିଲେ। ସେ ସ୍କୁଲରୁ ପାଠ୍ପଢ଼ା ସାରି ଫିରଲେ ବେଲବୁଡ଼େ ଗୁଟେ ଠେଲାଗାଡ଼ିଥି ଗଁା ଗଁା ବୁଲି ରାତି ୧୦ ବଜେ ତକ୍ ଗୁପ୍ଚୁପ୍ ବିକୁଛନ୍। ଇତାର ସଂଗେ ସେ ପାଠ୍ପଢ଼ା ଜାରି ରଖିଛନ୍ ଆର ଭବିଷତ୍ରେ ପୁଲିସ୍ ଚାକରି କରବାର ଆଶ୍ ରଖିଛନ୍। ଗୁପ୍ଚୁପ୍ ବିକି ସେ ପରିବାର ଚଲବାର ସଂଗେ ବାପର ଉଷୋକଷା, ଦୁଇ ଭାଇକର ପାଠ୍ପଢ଼ା ଖରଚ୍ ତୁଲଉଛନ୍। ଏତେ ଦୁଖେ ପରିବାରଟା ଚଲୁଥିଲେ ବି ଆଏଜ୍ତକ୍ ପରଶାସନର ନଜର ଇ ପରିବାର ଉପରେ ନାଇଁପଡ଼ି। ଦେବାନନ୍ଦ ନିଜେ ପାଠ୍ ପଢ଼ି ସରକାରୀ ଚାକିରି କରବାର ଆଶ୍ ରଖିଥିଲାବେଲେ ସାନ ଭାଇକେ ବି ପଢ଼େଇ ଭଲ ମୁନୁଷ୍ କରବାର ଲଖିଅ ରଖିଛନ୍। ସମାଜରେ ଯେନ୍ମାନେ ବଁଚ୍ବାର ରାହା ଖୁଜୁଛନ୍ ସେମାନକର ଲାଗି ଦେବାନନ୍ଦ ଗୁଟେ ଉଦାହରନ୍ ପାଲଟିଛନ୍।
