ନୂଆଦିଲ୍ଲୀ,୨୭-୫: ୨୦୦୪ ପରଠାରୁ ଦେଶରେ ମ୍ୟୁଚୁଆଲ ଫଣ୍ଡ ଶିଳ୍ପରେ ଅଭିବୃଦ୍ଧି ଉଲ୍ଲେଖନୀୟ ରହିଛି। ନିର୍ବାଚନର ପ୍ରଭାବ ବର୍ତ୍ତମାନ ଶେୟାର ବଜାର ଉପରେ ପରିଲକ୍ଷିତ ହୋଇଛି। ଏଥିଯୋଗୁ ବଜାର କିଛି ମାସ ଧରି ଅସ୍ଥିର ରହିଛି। ତେବେ ସମ୍ପତ୍ତି ସୃଷ୍ଟି ଲାଗି ଆଗ୍ରହୀ ନିବେଶକ ନିଜର କାର୍ଯ୍ୟଧାରାକୁ ନିୟନ୍ତ୍ରିତ କରିବାର ଆବଶ୍ୟକତା ରହିଛି ବୋଲି ୟୁଟିଆଇ ଏଏମ୍ସି ଫଣ୍ଡ ମ୍ୟାନେଜର ତଥା ଗବେଷଣା ମୁଖ୍ୟ ବରିଷ୍ଠ ଉପସଭାପତି ସଚିନ୍ ତ୍ରିବେଦୀ ପରାମର୍ଶ ଦେଇଛନ୍ତି। ଦୃଢ ଆୟର ମାନ ରଖୁଥିବା ଷ୍ଟକ ବାଛିବା ପୁଞ୍ଜି ନିବେଶର କୌଶଳ ବୋଲି ସେ କହିଛନ୍ତି। ସେହିଭଳି ମଧ୍ୟମ ଏବଂ ଦୀର୍ଘ ମିଆଦି ଭିତ୍ତିରେ ଯେଉଁ ଷ୍ଟକ୍ର ଅଭିବୃଦ୍ଧି ରହିଥିବ ତାକୁ ବାଛିବା ଆବଶ୍ୟକ ବୋଲି ତ୍ରିବେଦୀ କହିଛନ୍ତି। ସେହିଭଳି ମ୍ୟୁଚୁଆଲ ଫଣ୍ଡର ନିବେଶ ଧାରାକୁ ଦେଖିଲେ ଜଣାଯିବ ଯେ, ୨୦୧୬ ଏପ୍ରିଲ ମାସ ବେଳକୁ ଏସ୍ଆଇପି ପ୍ରବାହ ୩୦୦୦ କୋଟି ଟଙ୍କା ଥିବା ବେଳେ ଏହା ୨୦୧୯ ମାର୍ଚ୍ଚରେ ୮୦୦୦ କୋଟି ଟଙ୍କା ଟପିଛି। ଏହି ହାରରେ ଦେଖିଲେ ଇକ୍ୟୁଟି ଏଏମ୍ୟୁକୁ ବାର୍ଷିକ ଏସ୍ଆଇପି ପ୍ରବାହର ଅବଦାନ ୧ଲକ୍ଷ କୋଟି ଟଙ୍କା ରହିବ ବୋଲି ସେ କହିଛନ୍ତି।
