ଥିରୁଭାନନ୍ତପୁରମ୍,୨୯ା୧୨: ସେନାଧ୍ୟକ୍ଷ ଜେନେରାଲ ବିପିନ୍ ରାଓ୍ବତ୍ ନିଜ କାମ ଭିତରେ ସୀମିତ ରୁହନ୍ତୁ, ରାଜନେତାଙ୍କୁ ଶିକ୍ଷାଦେବା ବନ୍ଦକରନ୍ତୁ ବୋଲି କଂଗ୍ରେସର ବରିଷ୍ଠ ନେତା ପି. ଚିଦାମ୍ବରମ୍ ଶନିବାର କହିଛନ୍ତି। ରାଜନେତାମାନେ ସେନା ଅଧିକାରୀଙ୍କୁ କିଭଳି ସେମାନଙ୍କ କାର୍ଯ୍ୟ କରିବାକୁ ହୁଏ କୁହନ୍ତି ନାହିଁ ବୋଲି ସେ ପ୍ରକାଶ କରିଛନ୍ତି। ପ୍ରକାଶଥାଉ କି, ସିଏଏ ବିରୋଧୀ ହିଂସାରେ ସାମିଲ ଥିବା ଯୁବବର୍ଗଙ୍କୁ ଖରାପ ବାଟରେ ନେଉଥିବା ଲୋକ ନେତା ନୁହେଁ ବୋଲି ଜେନେରାଲ ରାଓ୍ବତ୍ ଗୁରୁବାର କହିଥିଲେ। ଚିଦାମ୍ବରମ କହିଛନ୍ତି, ସରକାର ଡିଜିପି ଓ ସେନା ଅଧିକାରୀଙ୍କୁ ସମର୍ଥନ ଲାଗି କହିବା ଲଜ୍ଜାର କଥା। ବିଶେଷକରି ସେନାବାହିନୀର ନେତୃତ୍ୱ ନେଉଥିବା ବ୍ୟକ୍ତି ନିଜ କାମରେ ସୀମିତ ରହିବା ଉଚିତ । ସେମାନେ ରାଜନେତାଙ୍କୁ କ’ଣ କରିବା, ନ କରିବା କଥା କହିବା ଅନୁଚିତ ବୋଲି କେରଳର ଥିରୁଭାନନ୍ତପୁରମ୍ରେ କଂଗ୍ରେସର ମହାର଼୍ୟାଲିକୁ ଉଦ୍ବୋଧନ ଦେଇ କହିଛନ୍ତି। ସିଏଏ, ଏନ୍ଆର୍ସି ସମ୍ପୂର୍ଣ୍ଣ ଅସାମ୍ବିଧାନିକ ଓ ବେଆଇନ, ଏହାକୁ ପ୍ରତ୍ୟାହାର କରାଯିବା ଦରକାର। ନଚେତ୍ କଂଗ୍ରେସ ଆନ୍ଦୋଳନ ଜାରିରହିବ ବୋଲି ଚିଦାମ୍ବରମ ପ୍ରକାଶ କରିଛନ୍ତି। ପ୍ରକାଶଥାଉ କି, ଏଆଇଏମ୍ଆଇଏମ୍ ମୁଖ୍ୟ ଆସାଦୁଦ୍ଦିନ ମଧ୍ୟ ପୂର୍ବରୁ ସେନାଧ୍ୟକ୍ଷଙ୍କୁ ରାଜନେତାଙ୍କ କଥାରେ ମୁଣ୍ଡ ନ ପୂରାଇ ନିଜ କାର୍ଯ୍ୟ ପରିସର ଭିତରେ ରହିବାକୁ ପରାମର୍ଶ ଦେଇଥିଲେ।
