ଚିପିଲିମା, ୧୧।୨ (ଡି.ଏନ୍.ଏ.)-
ବିଗିଅଁାନ ଯୁଗ୍ରେ ବି ଅନେକ ଜାତି, ଧରମ୍, ସମାଜର ଲୋକ୍ ଅଁଧ୍ ବିଶୁଆସରେ ବଁାଧି ହେଇ ରହିଛନ୍। ଆଏଜ୍ ବି ଅନେକ ଲୋକ୍ ଫୁକାଝରା, ଗୁନିଗାରେଡ଼ି, ସାମାଜି ବାସଁଦ୍ ଲେଖେଁ ଅଁଧ୍ ବିଶୁଆସରେ ବିଶାସ୍ କରୁଛନ୍। ଏନ୍ତା ଗୁଟେ ତାଜା ଉଦାହରନ୍ ଦେଖ୍ବାକେ ମିଲିଛେ ସମ୍ବଲପୁର ଜିଲା ଧନକଉଡ଼ା ବ୍ଲକ ବିଶାଖିଣ୍ଡା ଗଁାରେ।
ସୂଚନା ଅନ୍ସାରେ ବିଶାଖିଣ୍ଡା ଗଁାର ଲକ୍ଷ୍ମଣ ଦୟାଲାଲ(୩୫) ଝନେ ଅଁଧ୍ ଆଏ। ସେ ବିହାଚୁରା ନାଇଁ ହେଇ। ଏନ୍ତାଥି ସେ ବୁଲି ବୁଲି ଭିଖ୍ ମାଗି ନିଜର ପେଟ୍ ପାଲୁଥିଲେ। ହେଲେ ଦିହିପା ଖରାପ ହେଲାରୁ ସେ ଦିନାକେତେ ହେଲା ସମ୍ବଲପୁର ଜିଲା ମୁଖିଆ ଡାକ୍ତରଖାନାରେ ଚିକିଛିତ ହେଉଥିଲେ। ଚିକିଛାଧିନ ଅବସ୍ତାରେ ରଇବାର ତାକର ମୁର୍ତୁ ହେଇଥିଲା। ଡାକ୍ତରଖାନା କତୁରପକ୍ଷ ଘଟନା ବାବ୍ଦେ ତାକର ପରିବାର ଲୁକ୍କୁ ଖବର ଦେଇଥିଲେ। ହେଲେ ଲକ୍ଷ୍ମଣ ଭିଖ୍ ମାଗି ଅଜାତିରେ ଖାନାପିନା କରୁଥିଲେ। ଇଥିରଲାଗି ପରିବାର ଲୋକ୍ ତାକର ଶବ ସତ୍କାର କରବାର ତ ଦୂରର କଥା ମଲା ମୁହୁଁ ବି ନାଇଁ ଚାହୁଁ ବଲି ରୋକ୍ଠୋକ୍ ମନା କରିଥିଲେ। ଜାତିଭାଇ ବି ଲକ୍ଷ୍ମଣକଁର ଶବକେ ଖଁଦ୍ ଦେବାକେ ମନା କରିଥିଲେ। ଏନ୍ତାଥି ଶାସନ ଥାନା ପୁଲିସ ଗଁାକେ ଯାଇ ଜାତିଭାଇକୁ ବୁଝାଶୁଝା କରି ନିରାଶ ହେଇଥିଲେ। ଶେଷେ ଘଟନା ବାବ୍ଦେ ଥାନୀଅ ସରପଁଚ୍ ତଥା ଆଇନଜୀବୀ ସୁଶୀଲ କୁମାର ବାବୁ ଖବର ପାଇ ପୁଲସର ସାହାଯ୍ରେ ସମ୍ବଲପୁର ରାଜଘାଟରେ ଲକ୍ଷ୍ମଣକଁର ଶବ ସତ୍କାର କରିଥିଲେ।
