ଛେଣ୍ଡିପଦା,୧୮।୨(ସ୍ବ.ପ୍ର.) – ପ୍ରତି ସୋମବାର ବ୍ଲକ କାର୍ଯ୍ୟାଳୟରେ ବିଭାଗୀୟ ଅଧିକାରୀ ଓ କର୍ମଚାରୀମାନେ ଉପସ୍ଥିତ ରହି ଜନସାଧାରଣଙ୍କ ଅଭିଯୋଗର ଶୁଣାଣି କରିବାକୁ ସରକାରୀ ନିର୍ଦ୍ଦେଶ ଥିଲେ ମଧ୍ୟ ତାହାକୁ ଅନୁଗୋଳ ଜିଲା ଛେଣ୍ଡିପଦା ବ୍ଲକରେ ଠିକ୍ ଭାବେ ପାଳନ କରାଯାଉ ନ ଥିବା ଅଭିଯୋଗ ହେଉଛି। ମାତ୍ର ୭/୮ ଜଣ କର୍ମଚାରୀଙ୍କୁ ଛାଡିଦେଲେ ଅନ୍ୟମାନେ ସୋମବାର ବ୍ଲକ କାର୍ଯ୍ୟାଳୟରେ ଉପସ୍ଥିତ ନ ଥିବାରୁ ଆସିଥିବା ବହୁ ସଂଖ୍ୟକ ଜନସାଧାରଣ ନିରାଶ ହୋଇ ଫେରିଯାଇଥିବାରୁ ଅସନ୍ତୋଷ ପ୍ରକାଶ ପାଇଛି।
ଅଭିଯୋଗରୁ ପ୍ରକାଶ ଯେ, ଛେଣ୍ଡିପଦା ପଞ୍ଚାୟତ ସମିତି କାର୍ଯ୍ୟାଳୟକୁ ସୋମବାର ବିଭିନ୍ନ ସମସ୍ୟା ନେଇ ଜନସାଧାରଣ ଆସିଥିଲେ। ଅଭିଯୋଗକାରୀମାନେ ସକାଳ ୧୦ଟାରୁ ଦିନ ୧ଟା ପର୍ଯ୍ୟନ୍ତ ଅପେକ୍ଷା କରି ରହିଥିଲେ ମଧ୍ୟ ଅଧିକାରୀମାନଙ୍କ ଦେଖା ମିଳି ନ ଥିଲା। ଦୁଇ ଚାରି ଜଣ କିରାଣି ଓ ଜଣେ ଯନ୍ତ୍ରୀଙ୍କୁ ଛାଡିଦେଲେ ଅନ୍ୟ ଅଧିକାରୀମାନଙ୍କୁ ନ ପାଇ ସେମାନେ ଅସନ୍ତୋଷ ବ୍ୟକ୍ତ କରିଥିଲେ। ଅଭିଯୋଗକାରୀମାନେ କହିଛନ୍ତି ଯେ, ବ୍ଲକ କାର୍ଯ୍ୟାଳୟକୁ କେଉଁ କର୍ମଚାରୀ ଠିକ୍ ସମୟରେ ଆସୁନାହାନ୍ତି। ନିଜ ସମସ୍ୟା ସମ୍ପର୍କରେ ଗୁହାରୀ କରିବାକୁ ଆସି ନିରାଶ ହେବାକୁ ପଡ଼ିଛି। ଅଧିକାଂଶ କର୍ମଚାରୀ ଆସି ନ ଥିବାବେଳେ କେତେକ ପ୍ରକୋଷ୍ଠରୁ ତାଲା ମଧ୍ୟ ଖୋଲାଯାଇ ନ ଥିଲା। ଅଧିକାରୀ ଓ କର୍ମଚାରୀମାନେ ସୋମବାର ବ୍ଲକ କାର୍ଯ୍ୟାଳୟରେ ଉପସ୍ଥିତ ନ ରହି ସରକାରୀ ନିୟମକୁ ଖୋଲାଖୋଲି ଉଲ୍ଲଙ୍ଘନ କରୁଛନ୍ତି। ଅଭିଯୋଗ ସମ୍ପର୍କରେ ବ୍ଲକ ଅଧ୍ୟକ୍ଷ ଅଶୋକ କୁମାର ପ୍ରଧାନ କହିଛନ୍ତି, ବ୍ଲକ ଅଧ୍ୟକ୍ଷ ଚାହିଁଲେ ବି କୌଣସି ଅଧିକାରୀ ଓ କର୍ମଚାରୀମାନଙ୍କ କିଛି କରିପାରିବେ ନାହିଁ। ଅନୁଗୋଳ ଉପଜିଲାପାଳ ବାସୁଦେବ ଶତପଥୀ କହିଛନ୍ତି, ସୋମବାର ବ୍ଲକ କାର୍ଯ୍ୟାଳୟରେ ବିଡିଓ ଉପସ୍ଥିତ ରହିବା କଥା। ଏ ନେଇ ବିଡିଓଙ୍କ ସହିତ ଆଲୋଚନା କରିବା ପରେ ମତାମତ ଦେବି।
