ବ୍ରହ୍ମପୁର ଅଫିସ,୧୩ା୫-ଗଞ୍ଜାମ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଏହାକୁ ଦୃଷ୍ଟିରେ ରଖି ବ୍ରହ୍ମପୁରରେ ମାର୍କେଟ ତଥା ଦୋକାନ ଖୋଲିବା ନେଇ ରହିଥିବା ପୂର୍ବ ନିର୍ଦ୍ଧାରିତ ସମୟସୀମାରେ ପରିବର୍ତ୍ତନ କରାଯାଇଛି। ବ୍ରହ୍ମପୁର ମହାନଗର ନିଗମ(ବିଏମ୍ସି)ପକ୍ଷରୁ ଏନେଇ ମଙ୍ଗଳବାର ନୋଟିସ୍ ଜାରି କରାଯାଇଛି। ବିଏମ୍ସିର ନିର୍ଦ୍ଦେଶନାମା ପ୍ରକାରେ ଏଣିକି ସହରରେ ଗିପ୍ଟ ଶପ୍, ଲୁଗା ଦୋକାନ, ସୁନା ଗହଣା ଦୋକାନ, ଲେଡିଜ୍ କର୍ନର, ଇଣ୍ଟରନେଟ୍ କାଫେ, ମୋବାଇଲ ଦୋକାନ, ଜେରକ୍ସ ଶପ୍, ବୁକ୍ ଷ୍ଟୋର, ଷ୍ଟେଶ୍୍ନେରି, ଫଟୋ ଷ୍ଟୁଡିଓ, ଟେଲରିଂ ଶପ୍, ଇଲେକ୍ଟ୍ରାନିକ୍ସ ଶପ୍, ମୋବାଇଲ୍ ଫୋନ୍, ଗ୍ୟାରେଜ୍, ଇଲେକ୍ଟ୍ରୋନିକ୍ସ ଓ ଘରୋଇ ଉପକରଣ ଦୋକାନ ଅପରାହ୍ନ ୧ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ଖୋଲା ରହିବ। ଏଥିସହ ଇଲେକ୍ଟ୍ରୋନିକ୍ସ ଓ ଘରୋଇ ଉପକରଣ ଦୋକାନଗୁଡିକରେ ଏକ ସମୟରେ ସର୍ବାଧିକ ୫ ଗ୍ରାହକ ରହିବା ସହ ସିଙ୍ଗଲ ବ୍ରାଣ୍ଡ ଓ ମଲ୍ଟି ବ୍ରାଣ୍ଡ ଶୋରୁମ୍, ମାର୍କେଟ କମ୍ପ୍ଲେକ୍ସ ଓ ମଲଗୁଡିକରେ ସାମାଜିକ ଦୂରତ୍ୱ ରକ୍ଷା କରିବାକୁ ବିଏମ୍ସି ପକ୍ଷରୁ ନିର୍ଦ୍ଦେଶ ଦିଆଯାଇଛି। ଏହାବ୍ୟତୀତ ଇଲେକ୍ଟ୍ରୋନିକ୍ସ ରିପ୍ୟାରିଂ ଶପ୍, କୃଷି ଯନ୍ତ୍ରପାତି ବିକ୍ରି ଶପ୍, ହୋଟେଲ, ରେଷ୍ଟୁରାଣ୍ଟ, ଔଷଧ ଦୋକାନ, କ୍ଲିିନିକ୍, ହସ୍ପିଟାଲଗୁଡିକ ଖୋଲିବା ନେଇ ରହିଥିବା ସମୟସୀମା ଅପରିବର୍ତ୍ତିତ ଥିବା ବିଏମ୍ସି ପକ୍ଷରୁ ଜାରି କରାଯାଇଥିବା ନୋଟିସ୍ରେ ଦର୍ଶାଯାଇଛି। ଏହାକୁ ଖିଲାପକଲେ ଦୋକାନ ମାଲିକଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଆବଶ୍ୟକସ୍ଥଳେ ଦୋକାନ ତଥା ମଲକୁ ସମ୍ପୂର୍ଣ୍ଣ ସିଲ କରାଯିବ ବୋଲି ବିଏମ୍ସି ପକ୍ଷରୁ ଚେତାବନୀ ଦିଆଯାଇଛି।
