ଭୋପାଳ,୨୨।୪: ମଧ୍ୟପ୍ରଦେଶ ଦେବାସରେ ଘଟିଛି ଏକ ଅଭାବନୀୟ ଘଟଣା। ଏଠାରେ ଶିପ୍ରା ନଦୀରେ ଜଣେ ମହିଳାଙ୍କୁ ମଦ ପିଆଇ ବୁଡ଼ାଇ ହତ୍ୟା କରାଯାଇଛି। ଏହାର ଭିଡ଼ିଓ ଭାଇରାଲ ହେବା ପରେ ପୋଲିସ ଆରମ୍ଭ କରିଥିଲା ଖୋଳତାଡ଼। କିଛି ଦିନ ତଳେ ଜଣେ ଅଜଣା ମହିଳାଙ୍କ ମୃତ ଦେହ ପୋଲିସ ନଦୀ କୂଳରୁ ଉଦ୍ଧାର କରିଥିଲା। ମହିଳାଙ୍କ ସମ୍ପର୍କରେ ତଦନ୍ତ ଜାରି ରହିଥିବାବେଳେ ଭାଇରାଲ ହୋଇଥିବା ଭିଡ଼ିଓରୁ ହତ୍ୟାକାରୀଙ୍କର ସୂଚନା ମିଳିଥିଲା। ପପ୍ପି ବାଈ ନାମକ ଏହି ମହିଳାଙ୍କର ସୁରେଶ ନାମକ ଜଣେ ଯୁବକଙ୍କ ସହିତ ଅବୈଧ ପ୍ରେମ ସମ୍ପର୍କ ଥିଲା। ତେବେ ପପ୍ପି ବାଈ ସାମାଜିକ ସ୍ବୀକୃତି ଦାବି କରିବାରୁ ସୁରେଶ ତାଙ୍କୁ ମଦ ପିଆଇ ଏପ୍ରିଲ୍ ୧୯ରେ ଶିପ୍ରା ନଦୀରେ ଗାଧୋଇବାକୁ ନେଇ ଯାଇଥିଲେ। ସେଠାରେ ପପ୍ପିଙ୍କୁ ବୁଡ଼ାଇ ବୁଡ଼ାଇ ହତ୍ୟା କରିଥିଲେ। କୂଳରେ ଥିବା କେତେକ ଲୋକ ଏହାର ଭିଡ଼ିଓ କରିଥିଲେ। ପରେ ଏହାକୁ ସୋସିଆଲ୍ ମିଡ଼ିଆରେ ଅପଲୋଡ୍ କରାଯାଇଥିଲା। ପୋଲିସ ତଦନ୍ତ କରି ଅଭିଯୁକ୍ତ ସୁରେଶଙ୍କୁ ଗିରଫ କରିଥିବା ସ୍ଥାନୀୟ ଥାନା ଅଧିକାରୀ ଓ.ପି. ଅହୀର ସୂଚନା ଦେଇଛନ୍ତି।
