ନୂଆପଡା ଅଫିସ,୨୮ା୬: ବିଦ୍ୟାଳୟଗୁଡିକରେ ଗୁଣାତ୍ମକ ଶିକ୍ଷାର ବିକାଶ ସକାଶେ ଅଭିଭାବକ ଏବଂ ଶିକ୍ଷକମାନଙ୍କ ଅବଦାନ ରହିବା ବାନଛନୀୟ। ଏମାନେ ଗୋଟିଏ ମୁଦ୍ରାର ଦୁଇ ପାର୍ଶ୍ୱ। ଶିକ୍ଷାଦାନକୁ ତ୍ୱରିତ କରିବାକୁ ଏଦୁହେଁ ଆଗକୁ ଆସିବା ଦରକାର ବୋଲି ଅଧିକାରୀମାନେ କହିଥିଲେ। ଶୁକ୍ରବାର ସ୍ଥାନୀୟ ଅଏଁଲାଜୁବା କ୍ଲଷ୍ଟରର ସାଇପଲା ଶାସ୍ତ୍ରୀ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟରେ ଅନୁଷ୍ଠିତ ଅଭିଭାବକ, ଶିକ୍ଷକ ସମ୍ମିଳନୀରେ ଜିଲାସ୍ତରୀୟ ଅଧିକାରୀମାନେ ଯୋଗଦେଇ ଉଦ୍ବୋଧନ ଦେଇ ଏହା କହିଥିଲେ। ଏଥିରେ ବିଦ୍ୟାଳୟ ପରିଚାଳନା କମିଟି ଅଧ୍ୟକ୍ଷ ଦେବେନ୍ଦ୍ର କୁମାର ସାହୁ ସଭାପତିତ୍ୱ କରିଥିବାବେଳେ ଜିଲା ଶିକ୍ଷାଧିକାରୀ ଲକ୍ଷ୍ମଣ କୁମାର ଭୋଇ ମୁଖ୍ୟଅତିଥି, ବ୍ଲକ ଶିକ୍ଷାଧିକାରୀ ଡ.ରେଶମଲାଲ ନାଏକ ମୁଖ୍ୟବକ୍ତା, ସ୍ଥାନୀୟ ସରପଞ୍ଚ ଚନ୍ଦ୍ରମଣୀ ତାଣ୍ଡି, ପ୍ରଧାନଶିକ୍ଷକ ଇନ୍ଦିରା ଗିରି, ସିଆରସିସି ଶରତ କୁମାର ପଣ୍ଡା, ଶାସ୍ବତ ପଣ୍ଡା ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ଅଭିଭାବକ ଏବଂ ଶିକ୍ଷକମାନଙ୍କ ବୈଠକ ବାରମ୍ବାର ନିୟମିତ ବ୍ୟବଧାନରେ କରାଗଲେ ବିଭିନ୍ନ ସମସ୍ୟା ସମୀକ୍ଷା କରାଯିବା ସହ ସମାଧାନ ହୋଇପାରିବ ବୋଲି ବକ୍ତାମାନେ ମତ ପ୍ରକାଶ କରିଥିଲେ । ଏହା ଯଦିବା ଏକ ପୁରୁଣା ବିଦ୍ୟାଳୟ ଏହାର ଗୃହ ନିର୍ମାଣ ତଥା ଆନୁଷଙ୍ଗିକ ବ୍ୟବସ୍ଥା ଉପରେ ଦୃଷ୍ଟି ଦେବାକୁ ଅଧିକାରୀମାନଙ୍କୁ ଅଭିଭାବକମାନେ ଅନୁରୋଧ କରିଥିଲେ। ସୂଚନାଯୋଗ୍ୟ ଯେ, ସେହିଭଳି ଶୁକ୍ରବାର ଜିଲାବ୍ୟାପି ସମସ୍ତ ପ୍ରାଥମିକ, ଉଚ୍ଚପ୍ରାଥମିକ ବିଦ୍ୟାଳୟରେ ଏକକାଳୀନ ବୈଠକ ହୋଇଥିଲା। ଅଧିକାରୀମାନେ ଏହି ବିଦ୍ୟାଳୟକୁ ପର୍ଯ୍ୟବେକ୍ଷଣରେ ଯାଇ କାର୍ଯ୍ୟକ୍ରମରେ ଯୋଗଦେଇ ତଦାରଖ କରିଥିଲେ। ଅଧିକାରୀମାନଙ୍କୁ ନିକଟରେ ପାଇ ଖୁସି ପ୍ରକଟ କରିଥିଲେ । ଏଥିରେ ଗାଁର ସମସ୍ତ ଅଭିଭାବିକା ଅଭିଭାବକ, ଶିକ୍ଷୟିତ୍ରୀ ଶିକ୍ଷକ, ପଞ୍ଚାୟତିରାଜ ପ୍ରତିନିଧିମାନେ ଯୋଗଦେଇଥିଲେ।
