ଲଣ୍ଡନ,୨୪ା୩(ଏଏଫ୍ପି)-ଆୟର୍ଲାଣ୍ଡ ଫୁଟ୍ବଲ ମ୍ୟାନେଜର ମିକ୍ ମ୍ୟାକ୍କ୍ୟାର୍ଥି ଓ ତାଙ୍କ ସ୍ତ୍ରୀ ଫିଓନା ବ୍ରୋମ୍ଲିସ୍ଥିତ ନିଜ ବାସଭବନରେ ସେଲ୍ଫ ଆଇସୋଲେଶନରେ ଅଛନ୍ତି। ୬୧ବର୍ଷୀୟ ମ୍ୟାକ୍କ୍ୟାର୍ଥି କହିଛନ୍ତି ତାଙ୍କର ଦୁଇ ପଡୋଶୀ ପୀଡ଼ିତ ଥିବା କଣାପଡ଼ିବା ପରେ ସେ ଓ ତାଙ୍କ ସ୍ତ୍ରୀ ସେଲ୍ଫ ଆଇସୋଶେନରେ ରହିବାକୁ ନିଷ୍ପତ୍ତି ନେଇଥିଲେ। କରୋନା ଭାଇରସ୍ ଦ୍ୱାରା ପୀଡ଼ିତ ହୋଇ ଦେଶରେ ୩୩୫ ଜଣଙ୍କର ମୃତ୍ୟୁ ଘଟି ସାରିଲାଣି। ଭାଇରସ୍ର ସଂକ୍ରମଣକୁ ରୋକିବା ଲାଗି ସୋମବାର ବ୍ରିଟେନରେ ୩ ସପ୍ତାହ ପାଇଁ ଲକ୍ଡାଉନ୍ ଘୋଷଣା କରାଯାଇଛି। ମ୍ୟାକ୍କ୍ୟାର୍ଥି ଦ୍ୱିତୀୟ ଥର ପାଇଁ ଆୟର୍ଲାଣ୍ଡ ଫୁଟ୍ବଲ ଟିମ୍ର ମ୍ୟାନେଜର ହୋଇଛନ୍ତି। ୟୁରୋ ୨୦୨୦ ପ୍ଲେ-ଅଫ୍ର ପ୍ରଥମ ଲେଗ୍ ମ୍ୟାଚରେ ତାଙ୍କ ଦଳ ସ୍ଲୋଭେନିଆକୁ ଭେଟିବା କାର୍ଯ୍ୟକ୍ରମ ରହିଥିଲା। ତେବେ କରୋନା ଭାଇରସ୍ ସଂକ୍ରମଣ ଆଶଙ୍କାରେ ୟୁରୋ ୨୦୨୦ ଆସନ୍ତା ବର୍ଷକୁ ସ୍ଥଗିତ ରଖାଯାଇଛି। ପ୍ଲେ-ଅଫ୍ ମ୍ୟାଚଗୁଡ଼ିକ ଲାଗି କାର୍ଯ୍ୟସୂଚୀ ଜୁନ୍ରେ ଘୋଷଣା ହେବ। ସୂଚନାଯୋଗ୍ୟ, ଇଂଲଣ୍ଡରେ ଜନ୍ମ ଲାଭ କରିଥିବା ମ୍ୟାକ୍କ୍ୟାର୍ଥି ପୂର୍ବରୁ ଆୟର୍ଲାଣ୍ଡ ଫୁଟ୍ବଲ ଦଳର ଅଧିନାୟକ ଭାବେ ଦାୟିତ୍ୱ ନିର୍ବାହ କରିଛନ୍ତି। ଦେଶ ତରଫରୁ ୫୭ ଥର ପ୍ରତିନିଧିତ୍ୱ କରିଛନ୍ତି। ଆଇସୋଲେଶନରେ ଥିବାରୁ ଆମେ ଆମର ସନ୍ତାନ ଏବଂ ନାତି ନାତୁଣୀଙ୍କଠାରୁ ପୃଥକ୍ ରହିବାକୁ ପଡ଼ୁଛି। ଏହା ଖୁବ୍ ଯନ୍ତ୍ରଣା ଦାୟକ ବୋଲି ମ୍ୟାକ୍କ୍ୟାର୍ଥି କହିଛନ୍ତି।
