ଆସିକା,୧୬ା୧(ଡି.ଏନ.ଏ.): କୋଟିନଡା ଥାନା ଅନ୍ତର୍ଗତ ବେଣିଆ ଗ୍ରାମରେ ରବିବାର ରାତିରେ ଘଟିଥିବା ଆକ୍ରମଣ ଓ ପ୍ରତିଆକ୍ରମଣ ଘଟଣାରେ ଉଭୟ ପକ୍ଷ ଥାନାରେ ଅଭିଯୋଗ କରିଛନ୍ତି। ଏ ନେଇ ପରସ୍ପର ବିରୋଧୀ ହତ୍ୟା ଉଦ୍ୟମ ମାମଲା ରୁଜୁ ହୋଇଛି। ପୋଲିସ ଗୋଟିଏ ପକ୍ଷର ୬ ଜଣଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଥିବା ଥାନା ଅଧିକାରୀ କୃଷ୍ଣଚନ୍ଦ୍ର ସାହା ସୂଚନା ଦେଇଛନ୍ତି। ବେଣିଆ ଗ୍ରାମର ଚନ୍ଦନ କାମ୍ପଙ୍କୁ ଛୁରାମାଡ଼ କରାଯାଇଥିବା ନେଇ ତାଙ୍କ ମା’ ନୟନୀ କାମ୍ପ ନୂଆଗାଁ ଗ୍ରାମର ଅଜୟ ବିଶ୍ୱାଳ ଓ ମଙ୍ଗୁଳୁ ପରିଡାଙ୍କ ବିରୋଧରେ ଅଭିଯୋଗ କରିଛନ୍ତି। ପୋଲିସ ଏହି ଅଭିଯୋଗକୁ ଭିତ୍ତି କରି କୋଟିନଡା ଥାନାରେ ନଂ.୯/୨୩ରେ ମାମଲା ରୁଜୁ କରିଛି ା ସେହିଭଳି ପ୍ରତି ଆକ୍ରମଣରେ ଗୁରୁତର ଆହତ ନୂଆଗାଁ ଗ୍ରାମର ମଙ୍ଗୁଳୁ ପରିଡାଙ୍କ ବାପା ବିପ୍ର ପରିଡା ଅଭିଯୋଗ କରିଛନ୍ତି ଯେ, ତାଙ୍କ ପୁଅ ଅନ୍ୟ ଜଣେ ସହଯୋଗୀଙ୍କ ସହ ବେଣିଆ ଗ୍ରାମକୁ ବ୍ୟକ୍ତିଗତ କାର୍ଯ୍ୟରେ ଯାଇ ଫେରୁଥିଲା ବେଳେ ସେଠାରେ ସଂଘବଦ୍ଧ ଆକ୍ରମଣ କରାଯାଇଥିବା ଅଭିଯୋଗ କରିଛନ୍ତି। ଏ ନେଇ ନଂ.୧୦/୨୩ରେ ମାମଲା ରୁଜୁ କରାଯାଇଛି ା ଏହି ମାମଲାରେ ପୋଲିସ ବେଣିଆ ଗ୍ରାମର ଦଇତାରି ବାରିକ, ପବିତ୍ର କାମ୍ପ, ଆଶିସ କୁମାର ସ୍ବାଇଁ, ଜଗନ୍ନାଥ କାମ୍ପ, ଚନ୍ଦନ ସ୍ବାଇଁ ଓ ଦିପୁ ଲେଙ୍କାଙ୍କୁ ଗିରଫ କରି କୋର୍ଟ ଚାଲାଣ କରିଛି ା ଅନ୍ୟ ଅଭିଯୁକ୍ତଙ୍କ ଠାବ ଲାଗି ପୋଲିସ ଉଦ୍ୟମ ଜାରି ରହିଥିବା କୁହାଯାଇଛି ା ଛୁରା ମାଡରେ ଆହତଙ୍କ ମା’ କରିଥିବା ମାମଲାର ଅଭିଯୁକ୍ତ ଚିକିତ୍ସାଧୀନ ଥିବାରୁ ସେମାନଙ୍କୁ ଗିରଫ କରାଯାଇପାରି ନ ଥିବା ପୋଲିସ କହିଛି। ଉଭୟ ପକ୍ଷ ନିଶାସକ୍ତ ଅବସ୍ଥାରେ ଥାଇ ପରସ୍ପର ମଧ୍ୟରେ ବଚସାରୁ ଆକ୍ରମଣ ଓ ପ୍ରତି ଆକ୍ରମଣ ହୋଇଥିବା ପୋଲିସ ତଦନ୍ତରୁ ଜଣାପଡିଛି ବୋଲି ଥାନା ଅଧିକାରୀ ସାହା ପ୍ରକାଶ କରିଛନ୍ତି। ସୂଚନା ଯୋଗ୍ୟ ରବିବାର ରାତ୍ର ପ୍ରାୟ ୮ଟାରେ ଉଭୟ ପକ୍ଷ ମଧ୍ୟରେ ମୁହାଁମୁହିଁ ଓ ବଚସାରୁ ବେଣିଆ ଗ୍ରାମର ଚନ୍ଦନଙ୍କୁ ଛୁରାମାଡ ହୋଇଥିଲା ବେଳେ ଚନ୍ଦନଙ୍କ ସମର୍ଥକଙ୍କ ପ୍ରତି ଆକ୍ରମଣରେ ମଙ୍ଗୁଳୁ ଓ ଅଜୟ ଗୁରୁତର ଆହତ ହୋଇଥିଲେ ା
