ବନ୍ତଳା,୧୮ା୧(ଡି.ଏନ.ଏ.) – ଅନୁଗୋଳ ବନଖଣ୍ଡ ତାଳଚେର ରେଞ୍ଜ ଅଞ୍ଚଳରେ ନରହନ୍ତା ଦନ୍ତାକୁ ଟ୍ରାଙ୍କୁଲାଇଜ କରିବା ପାଇଁ ଶୁକ୍ରବାରଠାରୁ ଅପରେଶନ ଆରମ୍ଭ ହେବାକୁ ଥିଲେ ହେଁ ପ୍ରଥମ ଦିନରେ କାର୍ଯ୍ୟ ସେପରି କିଛି ଆଗେଇପାରି ନାହିଁ। କାରଣ ସାତକୋଶିଆ ଅଭୟାରଣ୍ୟ ଟିକରପଡାରେ ଥିବା କୁମ୍କୀ ହାତୀ ମହେନ୍ଦ୍ରକୁ ଅଣାଯାଇପାରି ନ ଥିବାରୁ ଏବେ ବିକଳ୍ପ ଯୋଜନାରେ ରହିଛି ବନ ବିଭାଗ।
ପ୍ରକାଶ ଯେ, ତାଳଚେର ଅଞ୍ଚଳରେ ୬ରୁ ଅଧିକ ଜୀବନ ନେଇଥିବା ଉକ୍ତ ନରହନ୍ତା ଦନ୍ତାହାତୀକୁ ଟ୍ରାଙ୍କୁଲାଇଜ କରିବାକୁ ବନ ବିଭାଗ ପକ୍ଷରୁ ନିଷ୍ପତ୍ତି ନିଆଯାଇଥିଲା। ଶୁକ୍ରବାର ଏହି ଅଭିଯାନରେ ହାତୀ ମହେନ୍ଦ୍ରକୁ ସାମିଲ କରିବାର ଥିଲା। ଏଥିପାଇଁ ବିଭାଗ ପକ୍ଷରୁ ସମସ୍ତ ପ୍ରସ୍ତୁତି କରାଯାଇଥିଲା। ସ୍ବତନ୍ତ୍ର ଭାବେ ଏକ ଟ୍ରକ୍ ଟିକରପଡାକୁ ପଠାଯାଇଥିଲା। କିନ୍ତୁ ମହେନ୍ଦ୍ର ମସ୍ତରେ ଥିବା ଯୋଗୁ ଅପରେଶନରେ ବାଧା ଓ କିଛି ଅଘଟଣ ଘଟାଇବା ଆଶଙ୍କା କରି ମହେନ୍ଦ୍ରକୁ ଆଉ ଆଣାଯାଇ ନ ଥିଲା। ମହେନ୍ଦ୍ରକୁ ଆଣିବା ପାଇଁ ସାତକୋଶିଆ ଏସିଏଫ ଶୁଭେନ୍ଦୁ ବେହେରା, ସରୋଜ କୁମାର ପଣ୍ଡା, ସାତକୋଶିଆ ପ୍ରାଣୀ ଡାକ୍ତର କିଶୋର କୁମାର ସାହୁ, ପୁରୁଣାକୋଟ ରେଞ୍ଜର ଗଜେନ୍ଦ୍ର ବେହେରା ଟିକରପଡାରେ ଉପସ୍ଥିତ ଥିଲେ। କିନ୍ତୁ ମହେନ୍ଦ୍ର ମସ୍ତ ଅବସ୍ଥାରେ ଥିବାରୁ ଉଚ୍ଚପଦସ୍ଥ ଅଧିକାରୀଙ୍କ ନିର୍ଦ୍ଦେଶକ୍ରମେ ତାକୁ ଅଭିଯାନରେ ସାମିଲ କରାଯାଇ ନାହିଁ। ଅନ୍ୟପକ୍ଷରେ ନରହନ୍ତା ଦନ୍ତାକୁ ଟ୍ରାଙ୍କୁଲାଇଜ କରିବା ପାଇଁ ବନ ବିଭାଗ ପକ୍ଷରୁ ବିକଳ୍ପ ଯୋଜନା ପ୍ରସ୍ତୁତ କରାଯାଇଛି। ଅନୁଗୋଳ ଡିଏଫଓ ଭି. କାର୍ତ୍ତିକ, ଏସିଏଫ୍ ବାସୁଦେବ ବେହେରା, ସାତକୋଶିଆ ପ୍ରାଣୀ ଡାକ୍ତର ସାହୁ, ଏସିଏଫ ପଣ୍ଡା, ତାଳଚେର ରେଞ୍ଜର ହିମାନି ନାୟକ, ଅନୁଗୋଳ ରେଞ୍ଜର ସତ୍ୟବ୍ରତ ପ୍ରଧାନଙ୍କ ସହିତ ୪୫ ଜଣ ବନ କର୍ମଚାରୀ ୮ଟି ଟିମ୍ ଗଠନ କରି ଉକ୍ତ ନରହନ୍ତା ଦନ୍ତାକୁ ଜଗିବା ସହିତ ଠିକଣା ସମୟକୁ ଅପେକ୍ଷା କରିଛନ୍ତି। ଏ ନେଇ ଅନୁଗୋଳ ଡିଏଫଓ ଭି. କାର୍ତ୍ତିକ କୁହନ୍ତି, ମସ୍ତ ଯୋଗୁ ମହେନ୍ଦ୍ରକୁ ଅପରେଶନରେ ସାମିଲ କରାଯାଇ ନାହିଁ। ବିକଳ୍ପ ଯୋଜନା ଚାଲିଛି। ବର୍ତ୍ତମାନ ହାତୀକୁ ଜଗିବା ସହିତ ଉପଯୁକ୍ତ ସମୟକୁ ଅପେକ୍ଷା କରାଯାଇଛି।
