କଣ୍ଟାପଡା,୨୨।୬(ଡି.ଏନ୍.ଏ.)-କଟକ ଜିଲା କଣ୍ଟାପଡାସ୍ଥିତ ବଟଗୋସେଇଁ ଗାଦୀ ନିକଟରେ ଥିବା ଏକ ପେଟ୍ରୋଲ ପମ୍ପରୁ ରବିବାର ଡକାୟତି ପାଇଁ ଯୋଜନା କରୁଥିବାବେଳେ ଓଲଟପୁର ପୋଲିସ ଚଢ଼ାଉ କରି ଆନ୍ତଃଜିଲା ଡକାୟତ ଗ୍ୟାଙ୍ଗର ୭ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ କଟକ ବାଦାମବାଡି ଥାନାସ୍ଥିତ ଖାନନଗରର ଗୁରୁସାହିର ଲୋକେନ ଗୁରୁ(୨୧), ବାଟବିନ୍ଧାଣୀ ସାହିର ରମେଶ ବେହେରା(୨୦), କଟକ ମଙ୍ଗଳାବାଗ ଥାନା ଥୋରିଆ ସାହିର ସୁବ୍ରତ ସାମଲ(୨୩), କେନ୍ଦ୍ରାପଡା ଜିଲା ଆଳି ଥାନାସ୍ଥିତ ଜୁଆଣିଆ ଗ୍ରାମର ବିଜୟ ଧଳ(୪୭), ଖୋର୍ଦ୍ଧା ଟାଉନ ଥାନା କୁମ୍ବିଲୋର ସଞ୍ଜୟ ବଡଜେନା(୨୬), ଯାଜପୁର ଟାଉନ ଥାନାସ୍ଥିତ ଖଣ୍ଡରା ଗ୍ରାମର ତୋଫାନ ଗୋଡି(୨୭) ଓ ଜଗତସଂହପୁର ଜିଲା ବିରିଡି ଥାନାସ୍ଥିତ ଦୋଗଛିଆର ସତ୍ୟ ରଞ୍ଜନ ବେହେରା (୨୧)। ଅନ୍ୟ ଜଣେ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡିଛି। ଗିରଫ ଅଭିଯୁକ୍ତଙ୍କଠାରୁ ବିଭିନ୍ନ ମାରଣାସ୍ତ୍ର ସହିତ ଗୋଟିଏ ଦେଶୀ ବନ୍ଧୁକ ଓ ୩ଟି ବାଇକ ଜବତ କରାଯାଇଛି। ଏ ନେଇ ଓଲଟପୁର ଥାନାରେ କେସ ନଂ ୫୮/୨୦ ରୁଜୁ ହୋଇଥିବା ସୋମବାର ଆୟୋଜିତ ଏକ ଖବରଦାତା ସମ୍ମିଳନୀରେ କଟକଜିଲା ଗ୍ରାମାଞ୍ଚଳ ଏସପି ପି.କେ ଜେନା ଦେଇଥିବା ସୂଚନା ଦେଇଛନ୍ତି।
