ଛତ୍ରପୁର,୨୦ା୫(ଡି.ଏନ୍.ଏ.): ଆନ୍ଧ୍ରପ୍ରଦେଶ -ଗଞ୍ଜାମ ଜିଲା ସୀମାନ୍ତ ଗିରିଶୋଳା ତନଖି ଫାଟକରେ ଅନ୍ୟ ରାଜ୍ୟରୁ ଆସୁଥିବା ଗାଡ଼ି ଓ ଶ୍ରମିକଙ୍କ ୨୪ ଘଣ୍ଟିଆ ପଞ୍ଜୀକରଣ କରାଯାଉଛି। କୋଭିଡ୍ ପୋର୍ଟାଲରେ ଅନ୍ଲାଇନ୍ରେ ହେଉଥିବା ଏହି ପଞ୍ଜୀକରଣ ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ହେଉଛି। ଏହି ୨୪ ଘଣ୍ଟିଆ ପଞ୍ଜୀକରଣ କାର୍ଯ୍ୟ ଜିଲା ଶିକ୍ଷାଧିକାରୀ ଓ ଗଞ୍ଜାମ ଆର୍ଟିଓ ଅଫିସର ଅଧିକାରୀ, କର୍ମଚାରୀ ୩ଟି ସିଫ୍ଟରେ କରୁଛନ୍ତି। ଅନ୍ୟ ରାଜ୍ୟରୁ ଓଡ଼ିଶାର ଗଞ୍ଜାମ ଓ ଅନ୍ୟ ଜିଲାକୁ କେତେକ ଶ୍ରମିକ ଗାଡ଼ି ଓ ଚାଲିକି କିମ୍ବା ସାଇକେଲ ଯୋଗେ ଏହି ତନଖି ଫାଟକ ଦେଇ ଗଞ୍ଜାମ ଜିଲାକୁ ପ୍ରବେଶ କରିବାରେ ଲାଗିଛନ୍ତି। ଚାଲିକି ଆସୁଥିବା ଶ୍ରମିକଙ୍କୁ ନିକଟସ୍ଥ ହଳଦିଆପଦର ବସ୍ଷ୍ଟାଣ୍ଡକୁ ନିଆଯାଉଛି। ସେଠାରେ ଖାଦ୍ୟ ପ୍ୟାକେଟ୍ ଓ ପାଣି ଦେବା ପରେ ଶ୍ରମିକଙ୍କୁ ଗଞ୍ଜାମର ନିଜ ବ୍ଲକ ଓ ଜିଲାଗୁଡ଼ିକୁ ଗାଡ଼ି ଯୋଗେ ପଠାଯାଉଛି। ଏ ସମ୍ପର୍କରେ ଛତ୍ରପୁରସ୍ଥିତ ଜିଲା କୋଭିଡ୍ ସେଲ୍ ଓ ଆର୍ଟିଓ ଅଫିସରୁ ସୂଚନା ଦିଆଯାଇଛି। ଚଳିତ ମାସ ୨ ତାରିଖରୁ ଏହି ପଞ୍ଜୀକରଣ କାର୍ଯ୍ୟ ଓ ନିଜ ଅଞ୍ଚଳକୁ ଶ୍ରମିକମାନଙ୍କୁ ପଠାଯିବା ଜାରି ରହିଛି।
