ଗାଇସିଲେଟ, ୧୧ା୬(ଡି.ଏନ୍.ଏ): ବରଗଡ଼ ଜିଲା ଗାଇସିଲେଟ ବ୍ଲକ ବୁରୋମୁଣ୍ଡା ପଁଚେତ୍ ବଇଦପାଲି ଗଁାର ବିଧବା ମହିଲା ସତ୍ୟଭାମା ସାହୁ। ଆଏଜ୍କେ ୫ ବଛର ତଲେ ଆପ୍ନେ ନରହରି ସାହୁ ଆରପାରକେ ଚାଲିଯାଇଛନ୍। ଏନ୍ତାଥି ସତ୍ୟଭାମା ନିସାହା ହେଇ ନିଜର ନାବାଲକ ପୁଓର ସଂଗେ ଗୁଟେ ଭଂଗା ଦଦ୍ରା ଘରେ ରହିଆସୁଛନ୍।
ସୂଚନା ଅନ୍ସାରେ ବଇଦପାଲି ଗଁାର ସ୍ବର୍ଗତ ନରହରି ସାହୁ ଝନେ ନିହାତି ଗରିବ୍ ଲୋକ୍, ଜମିବାଡ଼ି ବଲି କିଛି ନାଇଁ। ପରିବାର କହେଲେ ମାଏକିନା ସତ୍ୟଭାମା ଆର ପୁଓ ସଞ୍ଜିବ(୯)। ନରହରି ବାହାର ରାଏଜ୍କେ ଦାଦନ ଖଟିଯାଇ ପରିବାର ଚଲଉଥିଲେ। ସେଥ୍ରୁ ଦୁଇପଏସା ଅଗଲେଇ ଗଁାରେ ୪ ଡିସିମିଲ ଡିହ ଘିନି ଝାଟି ମାଟିର କୁରିଆଟେ ତିଆରିଥିଲେ। ହେଲେ ଆଏଜ୍କେ ୫ ବଛର ତଲେ କେହେନ୍ସି କାରନ୍ରୁ ନରକରିକଁର ମୁରତୁ ହେଇଗଲା। ଏନ୍ତାଥି ମାଏକିନା ସତ୍ୟଭାମା ଆର ନାବାଲକ ପୁଓ ସଞ୍ଜିବ ଅସାହା ହେଇଗଲେ। ପରିବାରଟା ନିହାତି ଗରିବ୍ ହେଇଥିଲା ବେଲେ ସତ୍ୟଭାମା ଏହେଦେ ପରହର କାମବୁତା କରି ପୁଓର ପେଟ ପାଲୁଛନ୍। ସେ ପଁଚେତ୍ରୁ ମାସିକ ୫ଶହ ଟଁକା ବିଧବା ଭତା ଆର ୧୦ କେ.ଜି. ଚାଉଲ ପାଉଛନ୍ ସତ୍, ହେଲେ ସେଟା ଦୁଇ ମା’ପୁଓକୁ ନିଅଁଟ୍ ହେଉଛେ। ଏନ୍ତା ନିଅଁଟିଆ ପରିସ୍ଥିତିରେ ସେ ତାକର ଝାଟି ମାଟିର ଘରଟା ମରାମତି କରି ନାଇଁ ପାରବାର। ଯେନ୍ଥିରଲାଗି ଘରର କେତେ ପାଟି, ଚନ୍ଖା ଭାଂଗି ଯାଇଥିଲାବେଲେ ଆରକେତେ ଲେଦ୍ନେଇ ଯାଇଛେ। କଁାଥି ଦୁରବଲ ହେଇ କେତେ ଜାଗାରେ ଧସି ଗଲାନ, ଘରର ଛାଉନିର ବଡ଼ଭାଗି ଖପର ଭାଂଗିଯାଇଛେ। ଏନ୍ତାଥି ସେମାନେ ଛାଉନିରେ ଗୁଟେ ତାରପଲିନ ଢ଼ାପି ଘରେ ରହୁଛନ୍୍, ହେଲେ ଘରଟା କେତେବେଲେ ମାଡ଼ି ବସବା କିଛି କହି ନାଇଁହୁଏ। ମା’ପୁଓ ଉପେ ଶୂଇନ୍ ହେଇ ନିଜର ଜୀବନ୍କେ ପାଏନ୍ ଛଡ଼େଇ ସେ ଭଂଗା ଘରେ ରହୁଛନ୍। ଏନ୍ତାଥି ସତ୍ୟଭାମା ଉପେ ଶୂଇନ୍ ହେଇ ଗଣମାଧ୍ୟମ ଜରିଆରେ ଥାନୀୟ ପରଶାସନକେ ସରକାରୀ ଯୋଜନାରେ ପକାଘର ଖଁଡ଼େ ଯୁଗେଇ ଦେବାକେ ଗୁହାରି କରିଛନ୍।
