ଢେଙ୍କାନାଳ ଅଫିସ,୩।୩ ସଂଶୋଧିତ ମୋଟର ଯାନ ଆଇନ ଲାଗୁ କରାଯିବା ପରେ ନିୟମ ଉଲ୍ଲଂଘନକାରୀଙ୍କ ପ୍ରତି କଠୋର ହୋଇଛି ଢେଙ୍କାନାଳ ଜିଲା ପୋଲିସ ଏବଂ ଆଞ୍ଚଳିକ ପରିବହନ ବିଭାଗ (ଆର୍ଟିଓ)। ଏହି ପରିପ୍ରେକ୍ଷୀରେ କଟକଣା ଜାରି ହେବାର ଦ୍ୱିତୀୟ ଦିନରେ ଆର୍ଟିଓ ପକ୍ଷରୁ ୫୨ ଯାନବାହନର ଚାଲାଣ କଟାଯାଇଛି। ଜରିମାନା ବାବଦକୁ ୪ଲକ୍ଷ ୮ହଜାର ଟଙ୍କା ଆଦାୟ କରାଯାଇଛି।
ଟ୍ରାଫିକ୍ ତଣ୍ଡକୁ ଡରୁନାହାନ୍ତି ଗାଡ଼ିଚାଳକ। ଦ୍ୱିତୀୟ ଦିନରେ ମଧ୍ୟ ସମାନ ଘଟଣା ଦେଖିବାକୁ ମିଳିଥିଲା ଢେଙ୍କାନାଳରେ। ଅନେକ ବାଇକ୍ ଚାଳକ ନିଜର ସୁରକ୍ଷାକୁ ବିପନ୍ନ କରି ଗାଡ଼ି ଚଳାଉଥିବା ଦେଖିବାକୁ ମିଳିଥିଲା। ବିନା ହେଲମେଟରେ ଗାଡ଼ି ଚଳାଉଥିବା ବେଳେ ୪୦ ଚାଳକ, ଗାଡ଼ି ଚଳାଇବାବେଳେ ମୋବାଇଲ ବ୍ୟବହାର କରୁଥିବା ୩ ଚାଳକ ଏବଂ ସିଟ୍ ବେଲ୍ଟ ବାନ୍ଧି ନ ଥିବା ଅଭିଯୋଗରେ ୫ଜଣ ଡ୍ରାଇଭରଙ୍କ ଚାଲାଣ କରାଯାଇଥିଲା। ସେହିପରି ଜଣେ ମଦ୍ୟପ ବାଇକ ଆରୋହୀ, ଗୋଟିଏ ଓଭରଲୋଡିଂ ଏବଂ ମାଲବାହୀ ଗାଡ଼ିରେ ଯାତ୍ରୀ ପରିବହନ କରୁଥିବା ୨ଟି ଗାଡ଼ିରୁ ଚାଲାଣ କଟାଯାଇଛି।
ଜିଲା ଆଞ୍ଚଳିକ ପରିବହନ ଅଧିକାରୀ ବସନ୍ତ କୁମାର ମାଝିଙ୍କ ନେତୃତ୍ୱରେ ମୋଟରଯାନ ନିରୀକ୍ଷକ ସମ୍ବିତ କୁମାର, ଅତିରିକ୍ତ ଆରଟିଓ ଦେବାଶିଷ ସ୍ବାଇଁ, ଜୁନିୟର ଏମ୍ଭିଆଇ ମାନସ ପୃଷ୍ଟି ପ୍ରମୁଖ ଯାନବାହନ ଯାଞ୍ଚ କରିଥିଲେ।
