ଝାରସୁଗୁଡ଼ା ଅଫିସ/ଲଖନପୁର,୧୯।୧୦(ଡି.ଏନ୍.ଏ.) : ଝାରସୁଗୁଡ଼ା ଜିଲା ପଞ୍ଚାୟତ କାର୍ଯ୍ୟାଳୟ(ଡିପିଓ)ରେ କାର୍ଯ୍ୟରତ ମୁଖ୍ୟ କିରାଣି ବେଣୁଧର ଛଞ୍ଚାଣଙ୍କ ଘରେ ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଶନିବାର ଭିଜିଲାନ୍ସ ବିଭାଗ ପକ୍ଷରୁ ଚଢ଼ାଉ ଜାରି ରହିଛି। ଏହି ଚଢ଼ାଉ ଏକ ସଙ୍ଗେ ୪ଟି ସ୍ଥାନରେ ଚାଲିଛି। ଏଥିମଧ୍ୟରେ ଜିଲା ଡିପିଓ କାର୍ଯ୍ୟାଳୟ,ଝାରସୁଗୁଡ଼ାସ୍ଥିତ ବଢେଇମୁଣ୍ଡା ଶାନ୍ତିନଗର ୩ ମହଲା ବାସଭବନ, କୁଲାବିରା ବ୍ଲକ୍ ଅଇଁତାପଡ଼ା ଗ୍ରାମ ପୈତୃକ ବାସଭବନ, ସମ୍ବଲପୁର ଶାସନ ଥାନା ଅଧୀନ ଗୋଡ଼େସିଂହା ଗ୍ରାମ ଶ୍ୱଶୁରଘର ବାସଭବନ ରହିଛି। ଏହି ଚଢ଼ାଉ ସମ୍ବଲପୁର ଭିଜିଲାନ୍ସ ଏସ୍ପି ରବୀନ୍ଦ୍ର କୁମାର ପ୍ରଧାନଙ୍କ ନିର୍ଦ୍ଦେଶରେ ଚାଲିଛି। ଏଥିରେ ଝାରସୁଗୁଡ଼ା,ସମ୍ବଲପୁର,ରାଉରକେଲା ଭିଜିଲାନ୍ସ ବିଭାଗୀୟ ଅଧିକାରୀମାନେ ସାମିଲ ହୋଇଛନ୍ତି।
