ଭାରତର ବିଭିନ୍ନ ଅଞ୍ଚଳରେ ଭିନ୍ନ ଭିନ୍ନ ବିବାହ ପରମ୍ପରା ଦେଖିବାକୁ ମିଳେ। ମଧ୍ୟପ୍ରଦେଶ, ଛତିଶଗଡ଼ ଏବଂ ଝାଡ଼ଖଣ୍ଡ ଆଦି ରାଜ୍ୟର ଜଙ୍ଗଲରେ ବସବାସ କରୁଥିବା ଭୀଲ୍ ଜନଜାତି ସମ୍ପ୍ରଦାୟର ବିବାହ ପରମ୍ପରା ନିଆରା। ଏହିସବୁ ଜନଜାତିଙ୍କ ବିବାହରେ କନ୍ୟା ନିଜ ମଥାରେ ସିନ୍ଦୂର ଲଗାଇବା ବଦଳରେ ବର ତା’ର ହାତ ଆଙ୍ଗୁଠି ଧାରୁଆ ଅସ୍ତ୍ରରେ କାଟି ରକ୍ତର ଟିପା କନ୍ୟା ମଥାରେ ଲଗାଇଥାଆନ୍ତି। ଏହାଦ୍ୱାରା ଉଭୟ କନ୍ୟାବରଙ୍କ ମଧ୍ୟରେ ଜୀବନସାରା ପ୍ରେମସମ୍ପର୍କ ସୁଦୃଢ଼ ହୋଇଥାଏ ବୋଲି ଏହି ଜନଜାତି ସମ୍ପ୍ରଦାୟର ଲୋକେ ବିଶ୍ୱାସ କରନ୍ତି। ଭୀଲ୍ମାନେ ସାଧାରଣତଃ ସାହସିକତାକୁ ପସନ୍ଦ କରିଥାନ୍ତି। ତେଣୁ ସେମାନଙ୍କ ବିବାହରେ ଏଭଳି ପରମ୍ପରାକୁ ପ୍ରାଧାନ୍ୟ ଦିଆଯାଇଥାଏ। ମନରେ ସ୍ବାମୀ ଭାବେ ଗ୍ରହଣ କରିଥିବା ଭୀଲ୍ କନ୍ୟା ଜୀବନରେ ଅନ୍ୟ କାହାକୁ ବିବାହ କରନ୍ତି ନାହିଁ। ଭୀଲ୍ ସମ୍ପ୍ରଦାୟର ମହିଳାମାନେ ମଧ୍ୟ ଜଙ୍ଗଲରେ ଶିକାର କରିବାକୁ ପସନ୍ଦ କରନ୍ତି। ତେଣୁ ସେମାନେ ବୀର ଏବଂ ନିର୍ଭୀକ ଯୁବକଙ୍କୁ ପସନ୍ଦ କରିଥାନ୍ତି।
