ବିବାହ ସମୟରେ ଯୌତୁକ ଦେବା ନେବା କିମ୍ବା ଭୋଜିରେ ଖାଇବା ପିଇବାକୁ ନେଇ ଅନେକ ସମୟରେ ବରପକ୍ଷ ଓ କନ୍ୟାପକ୍ଷ ମଧ୍ୟରେ ଝଗଡ଼ା ଦେଖିବାକୁ ମିଳିଥାଏ। ହେଲେ ଗୋଟିଏ ନଡ଼ିଆ ପାଇଁ ଉଭୟ ପକ୍ଷ ଝଗଡ଼ା କରି ବିବାହ ବନ୍ଦ କରିବା ଘଟଣା ଶୁଣିଛନ୍ତି! ଏମିତି ଏକ ଘଟଣା ଦେଖିବାକୁ ମିଳିଛି ମଧ୍ୟପ୍ରଦେଶର ଗ୍ବାଲିଅରରେ। ଏଠାରେ ବେହଟ ଥାନା ଅଞ୍ଚଳରେ ନୀଲୁ ମାହୋର ଓ ପ୍ରଦୀପ ମାହୋରଙ୍କର ବିବାହ ଅନୁଷ୍ଠିତ ହେଉଥିଲା। ଶୋଭାଯାତ୍ରାରେ ବର ଆସିବା ପରେ ବିବାହ କାର୍ଯ୍ୟ ମଧ୍ୟ ସୁରୁଖୁରୁରେ ଚାଲିଥିଲା। ହେଲେ ବିବାହ କର୍ମ ଅଧା ହେବା ବେଳକୁ ନଡ଼ିଆ ଭଲ ନ ଥିବାରୁ ହଠାତ୍ ଆରମ୍ଭ ହୋଇଥିଲା ଝଗଡ଼ା। ବେଦି ଉପରେ କର୍ମ ପାଇଁ ଆସିଥିବା ନଡ଼ିଆକୁ ନେଇ ବରପକ୍ଷ କିଛି ଟିପ୍ପଣୀ ଦେବାରୁ ସେହି କଥାକୁ ନେଇ ପାଟିତୁଣ୍ଡ ଆରମ୍ଭ ହୋଇଯାଇଥିଲା। କଥା ଏମିତି ହୋଇଥିଲା ଯେ ଶେଷରେ ବିବାହ କର୍ମ ବନ୍ଦ କରିବାକୁ ପଡିଥିଲା ଓ ଘଟଣା ଯାଇ ପହଞ୍ଚତ୍ଥିଲା ଥାନାରେ। ତେବେ ଦୁଇପକ୍ଷଙ୍କ ଯୁକ୍ତି ଶୁଣିବା ପରେ ପୋଲିସ ଉଭୟ ପକ୍ଷଙ୍କୁ ବହୁ କଷ୍ଟରେ ବୁଝାଇବା ପରେ ପୁଣିଥରେ ବିବାହ କର୍ମ ଆରମ୍ଭ ହୋଇଥିଲା।
