ଲଣ୍ଡନ,୩।୪ (ପି.ଟି)- ଇଂଲଣ୍ଡର ବର୍ମିଂହାମସ୍ଥିତ ଏଜ୍ବାଷ୍ଟନ ଷ୍ଟାଡିୟମ କୋଭିଡ୍-୧୯ ଟେଷ୍ଟିଂ ସେଣ୍ଟରରେ ପରିଣତ ହେବ ବୋଲି ଓ୍ବରଓ୍ବିକ୍ଶାୟାର କାଉଣ୍ଟି କ୍ରିକେଟ କ୍ଲବ (ଡବ୍ଲ୍ୟସିସିସି) ତରଫରୁ କୁହାଯାଇଛି। ଏଥିପାଇଁ ସରକାରଙ୍କୁ ଷ୍ଟାଡିୟମ ହସ୍ତାନ୍ତର କରାଯାଇଛି ବୋଲି କ୍ଲବ ପକ୍ଷରୁ ଶୁକ୍ରବାର ଘୋଷଣା କରାଯାଇଛି। ନ୍ୟାଶନାଲ ହେଲ୍ଥ ସର୍ଭିସ୍ (ଏନ୍ଏଚ୍ଏସ୍) କର୍ମଚାରୀମାନେ ଏହି ମହାମାରୀକୁ ରୋକିବା ପାଇଁ ଲଢେଇ ଜାରି ରଖିଥିବା ବେଳେ କ୍ଲବ ତରଫରୁ ଏହି ପଦକ୍ଷେପ ନିଆଯାଇଛି।
ଷ୍ଟାଡିୟମର କାର ପାର୍କିଂ ଏରିଆ ମେଡିକାଲ ଟେଷ୍ଟ ପାଇଁ ବ୍ୟବହୃତ ହେବ। ଏନ୍ଏଚ୍ଏସ୍ କର୍ମଚାରୀ ଷ୍ଟାଡିୟମ ରୋଡ ସେଣ୍ଟର ଦେଇ ଗାଡି ନେଇ ଯାଇପାରିବେ। ଉଲ୍ଲେଖଥାଉ କି, କାଉଣ୍ଟି କ୍ରିକେଟ କାର୍ଯ୍ୟକ୍ରମ ଓ କନ୍ଫରେନ୍ସ ଇ ଇଭେଣ୍ଟ ବିଜ୍ନେସ ସବୁ ମେ ୨୯ ତାରିଖ ପର୍ଯ୍ୟନ୍ତ ସ୍ଥଗିତ ରଖାଯାଇଛି। ଏହି କଷ୍ଟକର ସମୟ ମଧ୍ୟରେ ଆମ୍ କ୍ଲବର କର୍ମଚାରୀମାନେ ସ୍ଥାନୀୟ ସମୁଦାୟକୁ ସାହାଯ୍ୟ ସମର୍ଥନ କରିବା ପାଇଁ ବିଭିନ୍ନ ଉପାୟ ଅବଲମ୍ବନ କରୁଛନ୍ତି ବୋଲି ଡବ୍ଲ୍ୟୁସିସିସି ମୁଖ୍ୟ କାର୍ଯ୍ୟନିର୍ବାହୀ ନେଲ ସ୍ନୋବଲ କହିଛନ୍ତି। ଜନସାଧାରଣଙ୍କ ସ୍ବାସ୍ଥ୍ୟ ନେଇ ସମସ୍ତେ ଚିନ୍ତିତ। କେବଳ ୟୁନାଇଟେଡ କିଙ୍ଗ୍ଡମ୍ରେ ୩୩,୦୦୦ ଲୋକ ଏହି ଭାଇରସ୍ ଦ୍ୱାରା ସଂକ୍ରମିତ ହୋଇଛନ୍ତି। ଏମାନଙ୍କ ମଧ୍ୟରେ ରହିଛନ୍ତି ପ୍ରଧାନମନ୍ତ୍ରୀ ବୋରିସ ଜନସନ ଓ ପ୍ରିନ୍ସ ଚାଲର୍ସ। ପୂର୍ବରୁ ଚଳିତବର୍ଷ ପ୍ରାରମ୍ଭରେ ମୋରିଲବୋନ କ୍ରିକେଟ କ୍ଲବ (ଏମ୍ସିସି) ଐତିହାସିକ ଲଡର୍ସ ଷ୍ଟାଡିୟମକୁ ମଧ୍ୟ ପାର୍କିଂ ଓ ଷ୍ଟୋରେଜ୍ ପାଇଁ କୋଭିଡ୍-୧୯ ମୁକାବିଲ ପାଇଁ ଉତ୍ସର୍ଗ କରିଛି।
