କେନ୍ଦୁଝର, ୨୦ା୩ (ସ୍ବ.ପ୍ର.)-କେନ୍ଦୁଝର ଜିଲାର ୨୦ନମ୍ବର ଜାତୀୟରାଜପଥର ବିଭିନ୍ନ ସ୍ଥାନରେ ଥିବା ଓଭର ବ୍ରିଜ ଉପରେ ଓ ଜନଗହଳିପୂର୍ଣ୍ଣ ଛକ ରାସ୍ତା ଗୁଡ଼ିକରେ ଲୋକ ତଥା ଯାତାୟାତ କରୁଥିବା ଗାଡିଚାଳକଙ୍କ ସୁବିଧା ପାଇଁ ଲକ୍ଷାଧିକ ଟଙ୍କା ବ୍ୟୟରେ ଉଜ୍ଜ୍ୱଳ ଆଲୋକ (ହାଇମାଷ୍ଟ) ତଥା ସିଗନାଲ ଲାଇଟ ବ୍ୟବସ୍ଥା କରାଯାଇଛି। ରକ୍ଷଣାବେକ୍ଷଣ ଅଭାବରୁ ଅନେକ ସ୍ଥାନରେ ଏହି ସବୁ ଲାଇଟ ଠିକ ଭାବେ ଜଳୁ ନ ଥିବା ଅଭିଯୋଗ ହେଉଛି । ଏହି ରାସ୍ତାର ପଳାଶପଙ୍ଗା ନିକଟ ଟାଙ୍ଗରାଣୀ ଗ୍ରାମ ନିକଟରେ ଝୁମ୍ପୁରା ପ୍ରବେଶ ରାସ୍ତାରେ ଥିବା ଲାଇଟ ଜଳୁ ନ ଥିବା ଅଭିଯୋଗ ହେଉଛି । ଫଳରେ ଲୋକ ମାନେ ରାତିରେ ବହୁ ଅସୁବିଧା ଭୋଗୁଛନ୍ତି । ଅନେକ ସମୟରେ ଗାଡି ଚାଳକ ମାନେ ରାସ୍ତା ଜାଣି ନ ପାରି ଝୁମ୍ପୁରା ବାଇପାସ ରାସ୍ତାରେ ଭୂଲରେ ପାର ହୋଇ ଯାଉଛନ୍ତି । ଫଳରେ ଲୋକମାନେ ପଥଭ୍ରଷ୍ଟ ହୋଇ ବହୁ ବାଟ ଆଗକୁ ଯାଇ ଫେରିବାକୁ ପଡୁଛି ବୋଲି କେତେକ ଚାଳକ ମତବ୍ୟକ୍ତ କରୁଛନ୍ତି । ସେହିପରି ରାତିରେ ଅନ୍ଧାରର ସୁବିଧା ନେଇ ମଦୁଆ ଟ୍ରକ ଡ୍ରାଇଭର ତଥା ଅସାମାଜିକ ଲୋକ ମାନଙ୍କର ଦୈରାତ୍ମ୍ୟ ବୃଦ୍ଧି ପାଉଥିବାବେଳେ ଲୁଟତରାଜ ଭଳି ଘଟଣା ଘଟିବା ଆଶଙ୍କା ରହୁଛି । ଏଣୁ ଏହାକୁ ମରାମତି କରିବାକୁ ସ୍ଥାନୀୟ ଲୋକ ଜିଲା ପ୍ରଶାସନ ତଥା ଏନଏଚଏଆଇ ପ୍ରଶାସନକୁ ଅନୁରୋଧ କରିଛନ୍ତି । ସେହିପରି ଏହି ରାସ୍ତାର ଅନେକ ଛକ ସ୍ଥାନରେ ଥିବା ସିଗନାଲ ଲାଇଟ ଗୁଡିକ ଦୁର୍ଘଟଣା ଘଟି ଭାଙ୍ଗିଯାଇଥିବା ବେଳେ ଅନେକ ସ୍ଥାନରେ ମରାମତି ଅଭାବରୁ ଜଳୁ ନାହିଁ। ସେସବୁ ସିଗନାଲ ଲାଇଟ ଗୁଡିକ ମରାମତି କରି କାର୍ଯ୍ୟକ୍ଷମ କରିବାକୁ ଦାବି ହେଉଛି।
