ଗୋଆ, ୨।୬-ମେଘାଳୟ ଶିଲଂର ରିଡିମ ତ୍ଲାଙ୍ଗ୍ ଇଣ୍ଡିଆନ ସୁପରଲିଗ୍ର (ଆଇଏସ୍ଏଲ୍) ଏଫ୍ସି ଗୋଆ କ୍ଲବ ସହିତ ଚୁକ୍ତିବଦ୍ଧ ହୋଇଛନ୍ତି। ଫଳରେ ୨୫ ବର୍ଷୀୟ ତ୍ଲାଙ୍ଗ୍ ଆଗାମୀ ଆଇଏଓଏଲ୍ ସିଜନରେ କମଳା ରଙ୍ଗର ଜର୍ସିରେ ନଜରକୁ ଆସିବେ। ସେହିପରି ଗୋଆର ଏଏଫ୍ସି ଚାମ୍ପିୟନ୍ସ ଲିଗ୍ ଅଭିଯାନରେ ମଧ୍ୟ ତାଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିବ। ”ଆମେ ତ୍ଲାଙ୍ଗ୍ଙ୍କ ଉପରେ ନଜର ରଖି ଆସୁଥିଲୁ। ସେ ନର୍ଥଇଷ୍ଟ ୟୁନାଇଟେଡ ପକ୍ଷରୁ ଗତ ୨ ସିଜନ ଧରି ଆଇଏସଏଲରେ ପ୍ରଭାବୀ ପ୍ରଦର୍ଶନ କରି ଆସୁଥିଲେ। ତାଙ୍କ ବେଗ ଏବଂ ଦକ୍ଷତା ନିଶ୍ଚିତଭାବେ ଆମ ଦଳକୁ ଫାଇଦାରେ ରଖିବ“ ବୋଲି ଏଫସି ଗୋଆ ସଭାପତି ଅକ୍ଷୟ ଟଣ୍ଡନ ପ୍ରକାଶ କରିଛନ୍ତି। ଅନ୍ୟପକ୍ଷରେ ଗୋଆ ଦଳରେ ଯୋଗ ଦେଇଥିବାରୁ ସେ ଅତ୍ୟନ୍ତ ଖୁସି ବୋଲି ତ୍ଲାଙ୍ଗ୍ କହିଛନ୍ତି। ”ମୁଁ ସୁଯୋଗ ପାଇଲେ ଏଫସି ଗୋଆ ଖେଳ ଦେଖିଥାଏ। ମୁଁ ଏବେ ନିଜେ ‘ଗୌର’ ବାହିନୀର ସଦସ୍ୟ ହେବା ଜୀବନର ଅନ୍ୟତମ ଶ୍ରେଷ୍ଠ କ୍ଷଣ ବୋଲି ଭାବୁଛି। ନର୍ଥଇଷ୍ଟ ୟୁନାଇଟେଡ ସହିତ ମୁଁ ଖେଳକୁ ଉପଭୋଗ କରିଛି। ଏଠାରେ ମୁଁ ଉଚ୍ଚସ୍ତରରେ ଚ୍ୟାଲେଞ୍ଜର ସମ୍ମୁଖୀନ ହେବାକୁ ସୁଯୋଗ ପାଇବି। ଏହା ମୋ ପାଇଁ ସମ୍ମାନ ସଦୃଶ। ଭାବପ୍ରବଣ ଗୋଆ ସମର୍ଥକଙ୍କ ସମ୍ମୁଖରେ ଏବଂ ଭାରତୀୟ ଦଳର କେତେଜଣ ଶ୍ରେଷ୍ଠ ଖେଳାଳିଙ୍କ ସହ ଖେଳିବା ଅନନ୍ୟ ଅନୁଭୂତି ଆଣିବ“ ବୋଲି ତ୍ଲାଙ୍ଗ୍ କହିଛନ୍ତି। ୨୦୧୩ରେ ଶିଲଂଲାଜଂ ପକ୍ଷରୁ ଆଇ-ଲିଗ୍ ପଦାର୍ପଣ କରିଥିଲେ ଆଇ-ଲିଗ୍ରେ। ୨୦୧୮ରେ ସେ ନର୍ଥଇଷ୍ଟ ୟୁନାଇଟେଡ ସହିତ ଯୋଗ ଦେଇଥିଲେ। ତାଙ୍କ ଉପସ୍ଥିତିରେ ଦଳର ସନ୍ତୁଳନ ବଢ଼ିଆ ରହିଥିଲା। ଫଳରେ ଏହି ଦଳ ପ୍ରଥମଥରପାଇଁ ୨୦୧୮-୧୯ ସିଜନରେ ପ୍ଲେ-ଅଫ୍ରେ ପ୍ରବେଶ କରିଥିଲା। ଗତ ମାସରେ ସ୍ପେନର ଜୁଆନ ଫେରାଣ୍ଡୋଙ୍କୁ ଏଫସି ଗୋଆର ମୁଖ୍ୟ କୋଚ୍ ନିଯୁକ୍ତ କରାଯାଇଥିଲା। ସେ ତ୍ଲାଙ୍ଗ୍ ଙ୍କୁ ଆଣିବାକୁ ଆଗ୍ରହ ପ୍ରକାଶ କରିଥିଲେ। ଏଫସି ଗୋଆ ଏଏଫସି ଚାମ୍ପିୟନ୍ସ ଲିଗ୍ ଗ୍ରୁପ ପର୍ଯ୍ୟାୟରେ ପ୍ରଥମଥରପାଇଁ ଭାରତ ପକ୍ଷରୁ ପ୍ରତିନିଧିତ୍ୱ କରିବାକୁ ଯାଉଥିବାବେଳେ ତ୍ଲାଙ୍ଗ୍ କୋଚ୍ଙ୍କ ରଣନୀତିରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବା ଆଶା ରହିଛି।
