ମୁମ୍ବାଇ,୧୦-୧୦: ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ(ଏସ୍ବିଆଇ) ପକ୍ଷରୁ ବୁଧବାର ଏହାର ମାର୍ଜିନାଲ କଷ୍ଟ ଫଣ୍ଡ୍ସ ବେସ୍ଡ ଲେଣ୍ଡିଂ(ଏମ୍ସିଏଲ୍ଆର୍) ହାରକୁ ୧୦ ବେସିସ୍ ପଏଣ୍ଟ ହ୍ରାସ କରାଯାଇଛି। ସବୁ ବର୍ଗର ଋଣ ଉପରେ ଏହା ଲାଗୁ ହେବ। ଅପରପକ୍ଷରେ ବ୍ୟାଙ୍କ ଏହାର ୧ ଲକ୍ଷ ଟଙ୍କାରୁ କମ୍ ଜମା ଉପରେ ସୁଧ ପ୍ରଦାନ ହାରକୁ ୨୫ ବେସିସ ପଏଣ୍ଟ ହ୍ରାସ କରି ୩.୨୫% କରିଛି। ଚଳିତ ବର୍ଷ ଏପ୍ରିଲ ପରଠାରୁ ଏସ୍ବିଆଇ ଏମ୍ସିଏଲ୍ଆର୍କୁ ୬ ଥର ଲାଗି ହ୍ରାସ କରିଛି। ଅକ୍ଟୋବର ୧୦ଠାରୁ ଏହି ନିଷ୍ପତ୍ତି ଲାଗୁ ହେବ ବୋଲି ବ୍ୟାଙ୍କ ପକ୍ଷରୁ କୁହାଯାଇଛି। ଅପରପକ୍ଷରେ ଜମା ହାର ଉପରେ ପରିବର୍ତ୍ତିତ ନିୟମ ନଭେମ୍ବର ପହିଲାରୁ କାର୍ଯ୍ୟକାରୀ ହେବ। ଅକ୍ଟୋବର ୧ ପରଠାରୁ ରେପୋ ସଂଯୋଗୀ ରିଟେଲ ଋଣକୁ ବାଦ ବର୍ଷିକିଆ ଏମ୍ସିଏଲ୍ଆର୍ ୮.୧୫% ପରିବର୍ତ୍ତେ ୮.୦୫%କୁ ଖସିଛି। ପାର୍ବଣ ସମୟରେ ଗ୍ରାହକଙ୍କୁ ସୁବିଧା ପ୍ରଦାନ ଲାଗି ଏଭଳି ପଦକ୍ଷେପ ଘୋଷଣା କରାଯାଇଥିବା ବ୍ୟାଙ୍କ ପ୍ରକାଶ କରିଛି। ସେହିଭଳି ବ୍ୟାଙ୍କ ଏହାର ରିଟେଲ ଟର୍ମ ଜମା ଏବଂ ବଡ ଟର୍ମ ଜମା ହାର ଯଥାକ୍ରମେ ୧୦ ବେସିସ ପଏଣ୍ଟ ଏବଂ ୩୦ ବେସିସ ପଏଣ୍ଟ କମାଇଛି। ଗତ ସପ୍ତାହରେ ରିଜର୍ଭ ବ୍ୟାଙ୍କ ଏହାର ରେପୋ କମାଇବା ପରେ ଏସ୍ବିଆଇ ଏଭଳି ପଦକ୍ଷେପ ନେଇଛି। ସେହିଭଳି ବ୍ୟାଙ୍କ ଅକ୍ଟୋବର ପହିଲାରୁ ରେପୋ ସଂଯୋଗୀ ଋଣ ବ୍ୟବସ୍ଥା ଗ୍ରହଣ କରିଛି।
