ଭୁବନେଶ୍ୱର, ୨୩।୯(କ୍ରୀଡ଼ା ପ୍ରତିନିଧି)- ଓଡ଼ିଶା ଓମେନ୍ସ ଆଡ୍ଭେଞ୍ଚର କ୍ଲବ (ଓଡବ୍ଲ୍ୟୁଏସି) ଆନୁକୂଲ୍ୟରେ ରବିବାର ଏକ ମହିଳା ବାଇକ୍ ରାଲି ଆୟୋଜିତ ହୋଇଛି। ଏହି ରାଲି ମାଷ୍ଟରକ୍ୟାଣ୍ଟିନ ଛକରୁ ବାହାରି ରାମମନ୍ଦିର, ରୂପାଲି, ଆଚାର୍ଯ୍ୟବିହାର ଛକ ଦେଇ ରବୀନ୍ଦ୍ରମଣ୍ଡପଠାରେ ଶେଷ ହେଇଥିଲା। ମହାତ୍ମାଗାନ୍ଧୀଙ୍କ ୧୫୦ତମ ଜନ୍ମବାର୍ଷିକୀ ଉପଲକ୍ଷେ ଆୟୋଜିତ ଏହି ରାଲିରେ ପୁରୀ, କଟକ ଓ ଭୁବନେଶ୍ୱରରୁ ଶତାଧିକ ମହିଳା ଏହି ରାଲିରେ ଯୋଗ ଦେଇଥିଲେ। ରାଲି ମାଧ୍ୟମରେ ଆରୋହିମାନେ ଟ୍ରାଫିକ୍ ସଚେତନତା ସୃଷ୍ଟି କରିଥିଲେ। ଟ୍ରାଫିକ୍ ଡିସିପି ସାଗରିକା ନାଥ ପତାକା ଦେଖାଇ ଏହି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ବିଧାୟକ ଅନନ୍ତ ନାରାୟଣ ଜେନା ମୁଖ୍ୟ ଅତିଥିଭାବେ ଉପସ୍ଥିତ ଥିଲେ। ଓଡବ୍ଲ୍ୟୁଏସି ୧୯୯୨ରେ ପ୍ରତିଷ୍ଠାଲାଭ କରି ଓଡ଼ିଶାରେ ବିଭିନ୍ନ କାର୍ଯ୍ୟକ୍ରମମାନ କରି ଆସୁଛି। ଅନୁଷ୍ଠାନର ସମ୍ପାଦିକା ମଧୁସ୍ମିତା ଆଚାର୍ଯ୍ୟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ବାଇକ୍ ରାଲି ସଫଳତାର ସହ ସମ୍ପନ୍ନ ହୋଇଛି।
