ଭୁବନେଶ୍ୱର, ୨୮।୧୧(କ୍ରୀଡ଼ା ପ୍ରତିନିଧି)- ହକି ବିଶ୍ୱକପ ଆୟୋଜନର ବର୍ଷପୂର୍ତ୍ତି ଅବସରରେ ଆସିଛି ଆଉ ଏକ ବଡ଼ ଖବର। ୨୦୨୩ ପୁରୁଷ ହକି ବିଶ୍ୱକପ ମଧ୍ୟ ଓଡ଼ିଶାରେ ଆୟୋଜନ ହେବ। ତେଣୁ ହକି ଉତ୍ସବ ପୁଣି ରାଜ୍ୟକୁ ଫେରିଛି। ୨୦୧୮ରେ ବିଶ୍ୱକପର ମ୍ୟାଚଗୁଡ଼ିକ କେବଳ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ହୋଇଥିଲା। ୨୦୨୩ରେ କିନ୍ତୁ ଭୁବନେଶ୍ୱର ଏବଂ ରାଉରକେଲାରେ ଏହି ମେଗା ପ୍ରତିଯୋଗିତା ଆୟୋଜନ ହେବ ବୋଲି ବୁଧବାର କଳିଙ୍ଗ ଷ୍ଟାଡିୟମରେ ଆୟୋଜିତ ଏକ ଭବ୍ୟ ସମାରୋହରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି। ‘୨୦୨୩ ବିଶ୍ୱକପ୍ ଓଡ଼ିଶାରେ ଆୟୋଜିତ ହେବ। ଆପଣମାନେ ଖୁସି ତ। ମୁଁ ବହୁତ ଖୁସି’ ବୋଲି ମୁଖ୍ୟମନ୍ତ୍ରୀ ଚିରାଚରିତ ଢଙ୍ଗରେ ଉପସ୍ଥିତ ଜନସାଧାରଣଙ୍କୁ ଏହି ଅବସରରେ ସମ୍ବୋଧନ କରି କହିଥିଲେ। ସେହିପରି ଓଡ଼ିଶା ସରକାର ଯେପରି ସମର୍ଥନ ଯୋଗାଇ ଦେଇ ଆସୁଛନ୍ତି ସେ ଦୃଷ୍ଟିରୁ ଦେଖିବାକୁ ଗଲେ ଭାରତର କ୍ରୀଡ଼ା ରାଜଧାନୀ ହଁି ଏହି ମେଗା ଇଭେଣ୍ଟ ଆୟୋଜନର ପ୍ରକୃଷ୍ଠ ସ୍ଥାନ ବୋଲି ହକି ଇଣ୍ଡିଆ ପକ୍ଷରୁ ପ୍ରକାଶ କରାଯାଇଛି। ମୁଖ୍ୟମନ୍ତ୍ରୀ ଏହି ମେଗା ଇଭେଣ୍ଟ ସମ୍ପର୍କରେ ଘୋଷଣା କରିବା ଅବସରରେ କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା, ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ, ଅନ୍ତର୍ଜାତୀୟ ହକି ଫେଡେରେଶନ ସଭାପତି ନରିନ୍ଦର ବାତ୍ରା, ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ହକି ଇଣ୍ଡିଆ ସଭାପତି ମହମ୍ମଦ ମୁସ୍ତାକ ଅହମ୍ମଦ, ହକି ପ୍ରମୋଶନ କାଉନ୍ସିଲ ଅଧ୍ୟକ୍ଷ ପଦ୍ମଶ୍ରୀ ଦିଲୀପ ତିର୍କୀ, କ୍ରୀଡ଼ା ସଚିବ ବିଶାଲ ଦେବ, କ୍ରୀଡ଼ା ନିର୍ଦ୍ଦେଶକ ଭିନିଲ କ୍ରିଷ୍ଣା ପ୍ରମୁଖ ଉପସ୍ଥିତ ଥିଲେ। କୋଚିଂ କ୍ୟାମ୍ପ ଚାଲିଥିବାରୁ ସମ୍ପ୍ରତି ଭୁବନେଶ୍ୱରରେ ଥିବା ଭାରତୀୟ ପୁରୁଷ ହକି ଦଳର ସଦସ୍ୟମାନେ ମଧ୍ୟ ଏହି ଅବସରରେ ଉପସ୍ଥିତ ଥିଲେ।
ଓଡ଼ିଶାରେ ପୁଣି ଥରେ ହେବ ପୁରୁଷ ହକି ବିଶ୍ୱକପ। ୨୦୨୩ରେ କେବଳ ଭୁବନେଶ୍ୱର ନୁହେଁ ରାଜ୍ୟର ହକି ଏନ୍ତୁଡିଶାଳ ଭାବେ ପରିଚିତ ସୁନ୍ଦରଗଡ ଜିଲାର ରାଉରକେଲାରେ ମଧ୍ୟ ବିଶ୍ୱକପ ଖେଳାଯିବ।#FIH #Hockey #HockeyIndia #MensHockeyWorldCup #KalingaStadium #Sundergarh #NaveenPatanaik #Bhubaneswar #Odisha #DharitriLive pic.twitter.com/2P8W03TVWG
— DharitriLive (@DharitriLive1) November 28, 2019
ଓଡ଼ିଶା ବାସ୍ତବିକ ବିଶ୍ୱ ହକିର ପ୍ରାଣକେନ୍ଦ୍ର ବୋଲି ପୁଣି ପ୍ରମାଣିତ ହୋଇଛି। ୨୦୨୩ ଶୀତଋତୁରେ ହକି ପ୍ରଶଂସକମାନେ ଉଭୟ ଭୁବନେଶ୍ୱର ଓ ରାଉରକେଲାରେ ହକି ରୋମାଞ୍ଚ ଉପଭୋଗ କରିବା ସୁଯୋଗ ପାଇବେ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଏଠାରେ ପ୍ରକାଶ କରାଯାଇପାରେ ଯେ, ୨୦୨୩ ହକି ବିଶ୍ୱକପ ଆୟୋଜନ ଦୌଡ଼ରେ ମାଲେସିଆ, ବେଲଜିୟମ ଓ ଭାରତ ରହିଥିଲେ। ବିଡିଂ ରାଉଣ୍ଡର ଏକାଧିକ ସିରିଜ ପରେ ଭାରତକୁ ପୁଣି ହକି ବିଶ୍ୱକପ ଆୟୋଜନ ଅଧିକାର ମିଳିଥିଲା। ଏହାପରେ ହକି ଇଣ୍ଡିଆ ଓଡ଼ିଶାକୁ ଭେନ୍ୟୁ ରୂପେ ଚୟନ କରିଥିଲା। ବିଶ୍ୱକପ ଆୟୋଜନ କରିବା ଯେ କୌଣସି ଦେଶପାଇଁ ଗୌରବର କଥା। ମାତ୍ର ଓଡ଼ିଶା ଏହାକୁ କ୍ରମାଗତ ଦ୍ୱିତୀୟଥର ଆୟୋଜନ କରିବାକୁ ଯାଉଛି। ହକି ବିଶ୍ୱକପର ଆଗାମୀ ସଂସ୍କରଣକୁ ଉଭୟ ଭୁବନେଶ୍ୱର ଓ ରାଉରକେଲାରେ ଆୟୋଜନ ପାଇଁ ମୁଖ୍ୟମନ୍ତ୍ରୀ ପ୍ରସ୍ତାବ ଦେଇଥିଲେ। ତାହା ଗୃହୀତ ହୋଇଥିଲା। ରାଉରକେଲା ପାନପୋଷ ସ୍ପୋଟର୍ସ ହଷ୍ଟେଲ ଭାରତୀୟ ହକିର ପ୍ରାଣକେନ୍ଦ୍ର। ଭାରତୀୟ ହକିକୁ ସୁନ୍ଦରଗଡ଼ର ଅବଦାନକୁ ଦୃଷ୍ଟିରେ ରଖି ରାଉରକେଲାରେ ଏହି ମେଗା ପ୍ରତିଯୋଗିତାର କେତେକ ମ୍ୟାଚ ଆୟୋଜନ ପାଇଁ ନିଷ୍ପତ୍ତି ନିଆଯାଇଛି। ଏହା ଦ୍ୱାରା ରାଉରକେଲା ଓ ସୁନ୍ଦରଗଡ଼ ବିଶ୍ୱ ହକି ମାନଚିତ୍ରରେ ସ୍ବତନ୍ତ୍ରସ୍ଥାନ ଅଧିକାର କରିପାରିବ।
ମୁଖ୍ୟମନ୍ତ୍ରୀ ସୁନ୍ଦରଗଡ଼ର ୧୭ଟି ହକି ଷ୍ଟାଡିୟମ(ଟ୍ରେନିଂ ସେଣ୍ଟର) ଅଷ୍ଟ୍ରୋଟର୍ଫର ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ଏହା ଏକବର୍ଷ ମଧ୍ୟରେ ସମ୍ପୂର୍ଣ୍ଣ ହେବ। ଏପରି ଭିତ୍ତିଭୂମି ୟୁରୋପିଆନ ହକି ଖେଳୁଥିବା ଦେଶରେ ମଧ୍ୟ ନାହିଁ ବୋଲି କୁହାଯାଉଛି। ଏହା ବ୍ୟତୀତ ମୁଖ୍ୟମନ୍ତ୍ରୀ ହକି ହାଇପରଫରମାନ୍ସ ସେଣ୍ଟର ଗୃହ ଭିତ୍ତିପ୍ରସ୍ତର ସ୍ଥାପନ କରିବା ସହ ଗ୍ରାସ୍ରୁଟ୍ ଡେଭ୍ଲପମେଣ୍ଟ ପ୍ରୋଗ୍ରାମର ଶୁଭାରମ୍ଭ କରିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ ୨୦୧୮ ହକି ବିଶ୍ୱକପ ଉପରେ ଏକ ‘କଫିଟେବୁଲ ବୁକ୍’ ରିଲିଜ୍ କରିଛନ୍ତି। ଏଫଆଇଏଚ୍ ସଭାପତି ନରିନ୍ଦର ବାତ୍ରା କହିଛନ୍ତି ଯେ, ”ହକିକୁ କ୍ରମାଗତ ସମର୍ଥନ ଦେଇ ଆସୁଥିବାରୁ ଏଫ୍ଆଇଏଚ ପକ୍ଷରୁ ମୁଁ ଓଡ଼ିଶା ସରକାର ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଗଭୀର କୃତଜ୍ଞତା ଜଣାଉଛି। ଏହାଦ୍ୱାରା ହକି କେବଳ ଦେଶରେ ନୁହେଁ ବିଶ୍ୱରେ ମଧ୍ୟ ସମୃଦ୍ଧ ହୋଇପାରିବ ବୋଲି ସେ କହିଛନ୍ତି।
