ମାଞ୍ଚେଷ୍ଟର,୧୦।୭(ପି.ଟି.)- ମଙ୍ଗଳବାର ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଇଥିବା ବିଶ୍ୱକପ୍ର ପ୍ରଥମ ସେମିଫାଇନାଲ ମ୍ୟାଚ୍ର ଭେନ୍ୟୁ ଓଲ୍ଡ ଟ୍ରାଫର୍ଡ ଷ୍ଟାଡିୟମକୁ ‘ନୋ ଫ୍ଲାଏ ଜୋନ୍’ରେ ପରିଣତ କରାଯାଇଥିଲା। ସୁରକ୍ଷା ତଥା ନିରାପତ୍ତା ଦୃଷ୍ଟିକୋଣରୁ ଏପରି କରାଯାଇଥିଲା ବୋଲି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ଅବଗତ କରିଥିଲା। ହେଡିଙ୍ଗଲେ ଭାରତ ଓ ଶ୍ରୀଲଙ୍କା ମଧ୍ୟରେ ମ୍ୟାଚ୍ ଖେଳାଯାଉଥିବା ଅବସରରେ ଏକ ପ୍ରାଇଭେଟ ପ୍ଲେନ୍ ଭାରତ ବିରୋଧୀ ବ୍ୟାନର ବହନ କରି ଷ୍ଟାଡିୟମ ଉପର ଦେଇ ଯାଇଥିଲା। ଏହି ଘଟଣା ପାଇଁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ବୋଲି କୁହାଯାଇଛି। ସ୍ଥାନୀୟ କର୍ତ୍ତୃପକ୍ଷଙ୍କ ସହ ଏ ନେଇ ସବିଶେଷ ଆଲୋଚନା କରିବା ପରେ ଏହି ନିଷ୍ପତ୍ତି ନେଇଛୁ ବୋଲି ଇସିବି ବିସିସିଆକୁ କହିଥିଲା।
ପୂର୍ବରୁ ଖେଳାଳିଙ୍କ ସୁରକ୍ଷା ନେଇ ବିସିସିଆଇ ତା’ର ଉଦ୍ବେଗ ପ୍ରକାଶ କରିଥିଲା। ଏ ନେଇ ମଧ୍ୟ ଇସିବି ଅନୁକୂଳ ମନୋଭାବ ପୋଷଣ କରିଥିଲା ବିସିସିଆଇ ମୁଖ୍ୟ କର୍ଯ୍ୟନିର୍ବାହୀ ରାହୁଲ ଜୋହରୀଙ୍କୁ ଆବଶ୍ୟକ ପଦକ୍ଷେପ ନିଆଯିବ ବୋଲି କହିଥିଲା। ମ୍ୟାଚ୍ ଦିବସରେ ଗୋଟଏ ଦିନ ପାଇଁ ଷ୍ଟାଡିୟମକୁ ‘ନୋ ଫ୍ଲାଏ ଜୋନ୍’ରେ ପରିଣତ କରାଯିବ ବୋଲି ଇସିବି କହିଥିଲ। ଶନିବାର ହେଡିଙ୍ଗ୍ଲେରେ ଖେଳାଯାଇଥିବା ଭାରତ- ଶ୍ରୀଲଙ୍କା ମ୍ୟାଚ୍ରେ ଏକ ପ୍ରାଇଭେଟ ପ୍ଲେନ୍ ‘ଇଣ୍ଡିଆ ଷ୍ଟପ୍ ମବ ଲିଞ୍ଚିଂ’ ଓ ‘ଜଷ୍ଟିସ୍ ଫର କାଶ୍ମୀର’ ଲେଖାଥିବା ଏକ ବ୍ୟାନର ବହନ କରି ଷ୍ଟାଡିୟମ ନିକଟ ଦେଇ ଯାଇଥିଲା। ଟୁର୍ନାମେଣ୍ଟରେ ଦ୍ୱିତୀୟଥର ପାଇଁ ଏଭଳି ଅଭାବନୀୟ ଘଟାଣା ଘଟିବା ପରେ ଆନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ବେଶ୍ ଅପଦସ୍ଥ ହୋଇଥିଲା। ଏହାପୂର୍ବରୁ ପାକିସ୍ତାନ- ଆଫଗାନିସ୍ତାନ ମ୍ୟାଚ୍ ଅବସରରେ ଏକ ବିମାନ ‘ଜଷ୍ଟିସ୍ ଫର ବାଲୋଚ୍ସ୍ତାନ’ ଲେଖାଥିବା ବ୍ୟାନର ବହନ କରି ଷ୍ଟାଡିୟମ ଉପରେ ଯାଇଥିଲା। ଏହି ମ୍ୟାଚ୍ ଅବସରରେ ପାକିସ୍ତାନ ଓ ଆଫଗାନିସ୍ତାନ ପ୍ରଶଂସକମାନେ ହାତାହାତୀ ମଧ୍ୟ ହୋଇଥିଲେ। ଏହି ବ୍ୟାନର ବହନ କରିବା ଘଟଣାରୁ ଏପରି ପରିସ୍ଥିତି ଉପଜୁଥିଲା ବୋଲି କୁହାଯାଇଥିଲା। ଆଇସିସି ଆଚରଣବିଧିର ଉଲ୍ଲଂଘନ କରୁଥିବାରୁ ଏପରି ରାଜନୈତିକ ସ୍ଳୋଗାନକୁ ବରଦାସ୍ତ କରାଯିବ ନାହିଁ ବୋଲି କୁହାଯାଇଥିଲା। ଉଲ୍ଲେଖଥାଉ କି, ସର୍ବସାଧାରଣଙ୍କ ସୁବିଧା ପାଇଁ ପ୍ରାଇଭେଟ ପ୍ଲେନ୍ ଉଡାଇବା ନେଇ କୌଣସି କଟକଣା ନାହିଁ। ପୁଣି ହେଡିଙ୍ଗ୍ଲେର ନିକଟରେ ଥିବା ବ୍ରାଡଫର୍ଡ ଅଞ୍ଚଳରେ ପାକିସ୍ତାନୀ ନାଗରିକ ଅଧିକ ସଂଖ୍ୟାରେ ରହିଥାନ୍ତି। ତେଣୁ ଏଭଳି ଅଭାନୀୟ ଘଟଣା ଘଟିଲା ବୋଲି ଅନୁମାନ କରାଯାଉଛି।
