ନୂଆଦିଲ୍ଲୀ,୨୯ା୬(ପି.ଟି.): କଂଗ୍ରେସ ଏମ୍ପି ବିବେକ ତନ୍ଖା ଦଳର ଆଇନ ଓ ମାନବାଧିକାର ସେଲ୍ ମୁଖ୍ୟ ପଦରୁ ଇସ୍ତଫା ଦେବା ପରେ ସାଧାରଣ ସମ୍ପାଦକ ଦୀପକ ବାବରିଆ (ମଧ୍ୟପ୍ରଦେଶ ପ୍ରଭାରୀ) ଓ ଗୋଆ ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ଗିରିଶ ଚୋଦାନକରଙ୍କ ସମେତ ଅନେକ ନେତା ଶୁକ୍ରବାର ନିଜ ନିଜ ପଦ ଛାଡ଼ିଛନ୍ତି। ସେହିପରି ଦିଲ୍ଲୀ ପିସିସି କାର୍ଯ୍ୟକାରୀ ସଭାପତି ରାଜେଶ ଲିଲୋଥିଆ ଓ ତେଲେଙ୍ଗାନା ପିସିସି କାର୍ଯ୍ୟକାରୀ ସଭାପତି ପୁନମ ପ୍ରଭାକର ମଧ୍ୟ ଇସ୍ତଫା ଦେଇଛନ୍ତି। ସାରା ଦେଶରୁ ଦଳର ୧୨୦ ଜଣ ପଦାଧିକାରୀ ସେମାନଙ୍କ ଇସ୍ତଫାପତ୍ର ଏଆଇସିସିକୁ ପଠାଇଥିବା ଜଣାପଡ଼ିଛି।
ନିର୍ବାଚନରେ କଂଗ୍ରେସର ଶୋଚନୀୟ ପରାଜୟ ପରେ ଦଳର ଅଧ୍ୟକ୍ଷ ରାହୁଲ ଗାନ୍ଧୀ ଦେଇଥିବା ଇସ୍ତଫା ପ୍ରତ୍ୟାହାର କରି ନ ଥିବାବେଳେ କୌଣସି ରାଜ୍ୟସ୍ତରୀୟ ନେତା ନିଜକୁ ଦାୟୀ କରି ପଦ ଛାଡ଼ି ନ ଥିବା ନେଇ ଅସନ୍ତୋଷ ବ୍ୟକ୍ତ କରିଥିଲେ। ଏହାକୁ ନେଇ କଂଗ୍ରେସରେ ଏବେ ଇସ୍ତଫାର ସୁଅ ଛୁଟିବାରେ ଲାଗିଛି। କଂଗ୍ରେସର ସାଙ୍ଗଠନିକ ପୁନର୍ଗଠନ ପାଇଁ ରାହୁଲଙ୍କୁ କ୍ଷମତା ପ୍ରଦାନ ପାଇଁ ଇସ୍ତଫା ଦେଇଥିବା କେତେଜଣ ନେତା କହୁଛନ୍ତି। ଅନ୍ୟପକ୍ଷରେ ରାହୁଲ କଂଗ୍ରେସ ମୁଖ୍ୟ ଭାବେ ରହିବା ପାଇଁ ପ୍ରତିଶ୍ରୁତି ନ ଦେବା ପର୍ଯ୍ୟନ୍ତ ସେମାନେ ଇସ୍ତଫାପତ୍ର ପ୍ରତ୍ୟାହାର କରିବେ ନାହିଁ ବୋଲି ଆଉ କେତେଜଣ ନେତା ମତ ଦେଇଛନ୍ତି। ସେପଟେ ରାହୁଲ ଛତିଶଗଡ଼ର ଆଦିବାସୀ ନେତା ମୋହନ ମାର୍କମଙ୍କୁ ପିସିସି ସଭାପତି ଭାବେ ନିଯୁକ୍ତ କରିଛନ୍ତି। ମୁଖ୍ୟମନ୍ତ୍ରୀ ଭୁପେଶ ବାଘେଲଙ୍କ ସ୍ଥାନରେ ତାଙ୍କୁ ଅବସ୍ଥାପିତ କରାଯାଇଥିବା ଏଆଇସିସି ପକ୍ଷରୁ କୁହାଯାଇଛି।
