କଂଗ୍ରେସର କୋଭିଡ୍‌ ଆକ୍ସନ ଗ୍ରୁପ୍‌
7:51 amApril 17, 2020 / 21

ଢେଙ୍କାନାଳ ଅଫିସ, ୧୭।୪ – କରୋନା ବିରୋଧୀ ଲଢ଼େଇରେ ସାମିଲ ହୋଇଛି ଢେଙ୍କାନାଳ ଜିଲା କଂଗ୍ରେସ। ପ୍ରଦେଶ କଂଗ୍ରେସ କମିଟିର ନିର୍ଦ୍ଦେଶକ୍ରମେ ଦଳପକ୍ଷରୁ ଜିଲାସ୍ତରୀୟ କୋଭିଡ୍‌-୧୯ ଆକ୍ସନ ଗ୍ରୁପ୍‌ ଗଠିତ ହୋଇଛି। ଡା. ତୁଷାରକାନ୍ତି ନାୟକଙ୍କୁ ଜିଲା ଅଧ୍ୟକ୍ଷ ଦାୟିତ୍ୱ ଦିଆଯାଇଛି। ସେହିପରି ଢେଙ୍କାନାଳ ପୌରାଞ୍ଚଳ ସଂଯୋଜକ ଭାବେ ଶିଳ୍ପୀ ହରିଚନ୍ଦନ, ସଦର ବ୍ଲକ ସଂଯୋଜକ ଭରତ ସାମଲ, ହିନ୍ଦୋଳ ବ୍ଲକ ପାଇଁ ପର୍ଶୁରାମ ଗଡନାୟକ, ଏନ୍‌ଏସି ପାଇଁ ରସାନନ୍ଦ ବେହେରା, ଓଡ଼ାପଡ଼ା ବ୍ଲକ ପାଇଁ କରୁଣାକର ବେହେରା, ଗଁଦିଆ ବ୍ଲକ ପାଇଁ ଶେଷଦେବ ମହାପାତ୍ର, କଙ୍କଡ଼ାହାଡ଼ ବ୍ଲକ ପାଇଁ ନଗେଶ ଚନ୍ଦ୍ର ପଣ୍ଡା, କାମାକ୍ଷାନଗର ଏନ୍‌ଏସି ପାଇଁ ମନୋଜ କୁମାର ସାହୁଙ୍କୁ ନିଯୁକ୍ତି ଦିଆଯାଇଛି। ପୂର୍ବରୁ କାମାକ୍ଷାନଗର ବ୍ଲକ ପାଇଁ ପ୍ରଭୁଦତ୍ତ ଭଟ୍ଟ, ପରଜଙ୍ଗ ବ୍ଲକ ପାଇଁ ରଣଜିତ ସାହୁଙ୍କୁ ଦାୟିତ୍ୱ ପ୍ରଦାନ କରାଯାଇଥିଲା। ଜିଲାରେ ଆରମ୍ଭ ହୋଇଥିବା କୋଭିଡ ହସ୍ପିଟାଲରେ ଆକ୍ରାନ୍ତଙ୍କ ଚିକିତ୍ସା, ଆଇସିୟୁ ଓ ଭେଣ୍ଟିଲେଟର ସୁବିଧା, ରୋଗୀଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିଙ୍କ ତୁରନ୍ତ ସ୍ବାସ୍ଥ୍ୟ ପରୀକ୍ଷା, ଶଟ୍‌ଡାଉନ କରାଯାଇଥିବା ଅଞ୍ଚଳରେ ନାଗରିକଙ୍କ ସୁବିଧା ପାଇଁ ସମସ୍ତ ବ୍ୟବସ୍ଥା କରିବାକୁ ଦଳ ପକ୍ଷରୁ ଦାବି କରାଯାଇଛି। ଜରୁରୀ ସମୟରେ ରୋଗୀମାନେ ଡାକ୍ତରଖାନାକୁ ଯିବା ଲାଗି ୧୦୮କୁ ଫୋନ୍‌ କଲେ ଜବାବ ମିଳୁ ନ ଥିବା ଦଳ ପକ୍ଷରୁ ପ୍ରଶାସନ ନିକଟରେ ଅଭିଯୋଗ ହୋଇଛି। ପ୍ରତି ଥାନା ସହିତ ୧୦ରୁ ୧୫ ଅଟୋରିକ୍ସା ଚାଳକଙ୍କୁ ସଂଯୋଗ କରାଗଲେ ୧୦୦କୁ ଡାଏଲ୍‌ କରି ରୋଗୀମାନେ ସୁବିଧା ପାଇପାରନ୍ତେ ବୋଲି ଦଳ ପକ୍ଷରୁ ପ୍ରସ୍ତାବ ଦିଆଯାଇଥିବା ଜିଲା ସଭାପତି ସୁରେଶ ଚନ୍ଦ୍ର ପାଣିଗ୍ରାହୀ, କମିଟି ସଂଯୋଜକ ରୁଦ୍ରପ୍ରକାଶ ଶରଣ ସୂଚନା ଦେଇଛନ୍ତି।