ନୟାଗଡ଼ ଅଫିସ/ଦଶପଲ୍ଲା,୨୩।୨(ଡି.ଏନ୍.ଏ.): ନୟାଗଡ଼ ଜିଲା ଦଶପଲ୍ଲା ସହର ହରିଡାବାରୀ ସତ୍ସଙ୍ଗ ବିହାର ସାହିରେ କଖାରୁ ଫୁଲ ଓ ଶାଗ ଖାଇ ରବିବାର ଗୋଟିଏ ପରିବାରର ୬ଜଣ ଅସୁସ୍ଥ ହୋଇଛନ୍ତି। ପରିବାରର ଶଙ୍କର୍ଷଣ ସାହୁ(୬୩), ମାଳତୀ ସାହୁ(୮୫), ରାଜେଶ ସାହୁ(୯),ପ୍ରତିମା ସାହୁ(୨୬), ରୀତା ସାହୁ(୨୦), ସୁଷମା ସାହୁ(୨୦) ପ୍ରମୁଖ ଅସୁସ୍ଥ ହୋଇ ଦଶପଲ୍ଲା ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି ।
ସୂଚନାନୁଯାୟୀ, ରବିବାର ମଧ୍ୟାହ୍ନରେ ଶଙ୍କର୍ଷଣଙ୍କ ପରିବାରର ସଦସ୍ୟମାନେ କଖାରୁ ଫୁଲ ଓ ଶାଗ ସମେତ ଭାତ ଖାଇଥିଲେ। କିଛି ସମୟ ପରେ ସେମାନଙ୍କର ମୁଣ୍ଡ ବୁଲାଇ ହେବା ସହ ତଣ୍ଟି ଶୁଖି ଯାଇଥିଲା। ଅସୁସ୍ଥତା ଅନୁଭବ ପରେ ପରିବାର ଲୋକେ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ। ଚିକତ୍ସା ପରେ ସ୍ବାସ୍ଥ୍ୟରେ ଉନ୍ନତି ଘଟିଥିବା ଡାକ୍ତର କହିଛନ୍ତି।
