କେନ୍ଦୁଝର,୧ା୬(ସ୍ବ.ପ୍ର.): କଟକଣା ଅଭାବରୁ କେନ୍ଦୁଝର ସହରର ବିଭିନ୍ନ ଗଳି ରାସ୍ତାରେ ଭାରିଯାନ ଚଳାଚଳ ଜାରିରହିଛି। ଫଳରେ ଟ୍ରାଫିକ ସମସ୍ୟା ସୃଷ୍ଟି ହେବା ସହ ରାସ୍ତା, ଡ୍ରେନ୍ ଭାଙ୍ଗୁଛି। ସୋମବାର ଅଜନ୍ତା ଲଜ୍ ଗଳିରେ ଭାରୀଯାନ ଚଳାଚଳ ଯୋଗୁ ଅନେକ ଦୋକାନର ବିଦ୍ୟୁତ୍ ତାର ଛିଡ଼ିଯିବା ସହ ମିଟର ସବୁ ଉପୁଡି ପଡ଼ିଥିବାରୁ ବିଦ୍ୟୁତ୍ ସରବରାହ ବାଧାପ୍ରାପ୍ତ ହୋଇଛି। ସେହିପରି ଦୋକାନର ଡିସ୍ପ୍ଲେ ବୋର୍ଡ ଉପୁପଡ଼ିବାରୁ ଅସନ୍ତୋଷ ପ୍ରକାଶ ପାଇଛି। ଏକ ବଡ଼ ଧରଣର ଦୁର୍ଘଟଣା ବର୍ତ୍ତି ଯାଇଥିଲେ ହେଁ ଲୋକଙ୍କ କ୍ଷୟକ୍ଷତି ଘଟିଥିବା ଜଣାପଡ଼ିଛି। ଏନେଇ ଅଭିଯୋଗ ପରେ ଟାଉନ ଥାନା ପୋଲିସ ପହଞ୍ଚି ଅନୁଧ୍ୟାନ ଜାରି ରଖିଛନ୍ତି। ପ୍ରଶାସନର କୋହଳ ମନୋଭାବର ସୁବିଧା ନେଇ କେତେକ ବେପାରୀ ଆଳୁ, ପିଆଜ, ଲୁଗାପଟା, ମାଛ ଆଦି ବୋଝେଇ ଟ୍ରକ୍କୁ ଘରକୁ ନେଇ ଅନ୍ଲୋଡିଂ କରୁଥିବାରୁ ଏଭଳି ସମସ୍ୟା ଉପୁଜିଛି। ଏନେଇ କିଛିବର୍ଷ ତଳେ ପ୍ରଶାସନ ଉକ୍ତ ଗଳି ରାସ୍ତାରେ ଲୁହା ଗେଟ୍ ଲଗାଇବା ନିଷ୍ପତ୍ତି ନେଇଥିଲେ। ତେବେ ସହର ବାହାରେ ଗୋଦାମ ଘର ତିଆରି କରିବା ପାଇଁ ତିନି ମାସ କେତେକ ବ୍ୟବସାୟୀ ସମୟ ମାଗିଥିଲେ। ତେବେ ଇତିମଧ୍ୟରେ ପାଖାପାଖି ୩ ବର୍ଷ ବିତିଗଲାଣି। କିନ୍ତୁ ବ୍ୟବସାୟୀମାନେ ଗୋଦାମ ଘର ବାହାରେ ତିଆରି କଲେ ନାହିଁ। ସେହିପରି କଟକଣା ସତ୍ତ୍ୱେ ଦିନ ବେଳେ ଓ ଜନ ଗହଳି ସମୟରେ ମାଲ ବୋଝେଇ ଭାରିଯାନ ଚଳାଚଳ କରୁଥିବାରୁ ଅସନ୍ତୋଷ କୁହୁଳୁଛି।
