ପାରାଦୀପ,୪ା୨(ସ୍ବ.ପ୍ର.): ଚୀନ୍ରୁ ସୃଷ୍ଟ କରୋନା ଭାଇରସ୍କୁ ନେଇ ଏବେ ବିଶ୍ୱବ୍ୟାପୀ ଆଲୋଡ଼ନ ସୃଷ୍ଟି ହୋଇଛି। ତେବେ କିପରି ଏହାର ପ୍ରତିକାରାତ୍ମକ ବ୍ୟବସ୍ଥା କରାଯିବ ସେ ନେଇ ପୁଣି ସୋମବାର ଜଗତ୍ସିଂହପୁର ଜିଲା ପ୍ରଶାସନ ପକ୍ଷରୁ ଏକ ସମୀକ୍ଷା ବୈଠକ ପାରାଦୀପ ସର୍କିଟ୍ ହାଉସ୍ଠାରେ ଅନୁଷ୍ଠିତ ହୋଇଛି। ଏଥିରେ ସ୍ବତନ୍ତ୍ର ଭାବେ ପାରାଦୀପରେ ଥିବା ତାରକା ହୋଟେଲ କର୍ତ୍ତୃପକ୍ଷଙ୍କୁ ଡକାଯାଇଥିଲା। ବିଶେଷକରି ହୋଟେଲ୍ରେ କରୋନା ଭାଇରସ ସମ୍ପର୍କରେ ସରକାରୀ ନିର୍ଦ୍ଦେଶାବଳୀ, ହୋର୍ଡିଂ ଲଗାଇବା ଏବଂ ଚୀନ୍, ହଂକଂ, ଥାଇଲାଣ୍ଡ, ସିଙ୍ଗାପୁର ଆଦି ଏସୀୟ ଦେଶରୁ ଆସୁଥିବା ନାଗରିକଙ୍କୁ ମେଡିକାଲ ଯାଞ୍ଚପରେ ଯାଇ ରହିବା ପାଇଁ ସୁଯୋଗ ଦେବାକୁ ନିର୍ଦ୍ଦେଶ ଦେଇଥିଲେ ଜିଲାପାଳ ସଂଗ୍ରାମ କେଶରୀ ମହାପାତ୍ର। ଏଥିସହ ପାରାଦୀପ ପୋର୍ଟରେ ଲାଗୁଥିବା ଜାହାଜ ସମ୍ପର୍କରେ ମଧ୍ୟ ସମୀକ୍ଷା କରାଯାଇଥିଲା। ବୈଠକ ପରେ ଜିଲାପାଳ ମହାପାତ୍ର କହିଥିଲେ, ଏବେ ସୁଦ୍ଧା ଜଗତ୍ସିଂହପୁର ଜିଲାରେ ସେପରି ସନ୍ଦିଗ୍ଧ କେହି ନାହାନ୍ତି। ଯେହେତୁ ପାରାଦୀପ ବନ୍ଦର ଅଛି ଏଠାକୁ ବିଦେଶୀ ନାଗରିକ ଆସିବେ। ସେଥିପାଇଁ ଆମ୍ଭେ ସତର୍କତା ପାଇଁ ଆଗୁଆ ପଦକ୍ଷେପ ନେଇଛୁ ଏବଂ ପାରାଦୀପ ବନ୍ଦର ମଧ୍ୟ ଖୁବ୍ ଭଲ ପଦକ୍ଷେପ ନେଇଛି। ଅଙ୍କରେଜ ଅଞ୍ଚଳରୁ ଜାହାଜର ନାବିକଙ୍କ ସମ୍ପର୍କରେ ଯାଞ୍ଚ କରାଯାଉଛି ବୋଲି ସେ କହିଥିଲେ। ବୈଠକରେ ବନ୍ଦର ଚିକିତ୍ସାଳୟର ସିଏମ୍ଓ ଡା. ପ୍ରହଲାଦ ପଣ୍ଡା, ଜିଲା ମୁଖ୍ୟ ଚିକିତ୍ସାଧିକାରୀ ଡା. ବିଜୟ ପଣ୍ଡା, ବିଜୁ ମେମୋରିଆଲ ହସ୍ପିଟାଲର ଡା. ବସନ୍ତ ରାଉତ ଓ ପୌର ନିର୍ବାହୀ ଅଧିକାରୀ ପ୍ରମୁଖ ଉପସ୍ଥିତ ଥିଲେ।
