ପୁରୁଷୋତ୍ତମପୁର, ୭।୪(ଡି.ଏନ୍.ଏ.): କରୋନା(କୋଭିଡ-୧୯) ଭୂତାଣୁ ସଂକ୍ରମଣ ମୁକାବିଲା ଲାଗି ପ୍ରଶାସନ ପକ୍ଷରୁ ସମସ୍ତ ପ୍ରକାର ଉଦ୍ୟମ ଜାରିରହିଛି। ଏହି ପରିପ୍ରେକ୍ଷୀରେ ଗଞ୍ଜାମ ଜିିଲା ପୁରୁଷୋତ୍ତମପୁର ତହସିଲଦାର ଅରୁଣ କୁମାର ନାୟକ ଓ ଏନ୍ଏସି ନିର୍ବାହୀ ଅଧିକାରୀ ନାଗେଶ୍ବର ରାଓଙ୍କ ତତ୍ତ୍ୱାବଧାନରେ ମଙ୍ଗଳବାର ପୁରୁଷୋତ୍ତମପୁର ଅଗ୍ନିଶମ କର୍ମଚାରୀ ହାଇପ୍ରୋକ୍ଲୋରାଇଲ କେମିକାଲକୁ ସହରର ବିଭିନ୍ନ ରାସ୍ତା ଘାଟ, ସ୍ବାସ୍ଥ୍ୟ କେନ୍ଦ୍ର, ବଜାର ଆଦି ସ୍ଥାନରେ ଛିଞ୍ଚନ କରୁଛନ୍ତି। ଏହାସହ ଲୋକଙ୍କୁ ଏନ୍ଏସି ପକ୍ଷରୁ ମାସ୍କ, ସାନିଟାଇଜର, ହ୍ୟାଣ୍ଡ ୱାସ୍, ଗ୍ଳୋବ୍ସ ଆଦି ବଣ୍ଟନ କରାଯାଇଛି। ଛତ୍ରପୁର ଉପ ଜିଲାପାଳ ପ୍ରିୟରଞ୍ଜନ ପୃଷ୍ଟି ଏହି କାର୍ଯ୍ୟର ତଦାରଖ କରୁଛନ୍ତି। ବାହାରକୁ କେହି ନ ବାହାରି ନିଜ ଘରେ ରହି ସାମାଜିକ ଦୂରତା ବଜାୟ ରଖିବା ଲାଗି ସେ ଜନସାଧାରଣଙ୍କୁ ନିବେଦନ କରୁଛନ୍ତି। ଏଥିରେ ପୁରୁଷୋତ୍ତମପୁର ଥାନା ଏଏସ୍ଆଇ ରବୀନ୍ଦ୍ର ନାଥ ପାଣିଗ୍ରାହୀଙ୍କ ସମେତ ପୋଲିସ ଫୋର୍ସ, ଅଗ୍ନିଶମ ଅଧିକାରୀମାନେ ଉପସ୍ଥିତ ରହି ସହଯୋଗ କରୁଛନ୍ତି।
