ଜେନେଭା,୧୭।୫: କରୋନା ଭାଇରସ ଏବେ ମହାମାରୀର ରୂପ ନେଇ ସାରା ବିଶ୍ୱକୁ ତା’କବଳକୁ ନେଇ ଯାଇଛି। ଏଥିରୁ ମୁକ୍ତି ପାଇବା ପାଇଁ ପ୍ରାୟତଃ ସବୁ ବିକାଶଶୀଳ ଦେଶ ଭ୍ୟାକ୍ସିନ ପ୍ରସ୍ତୁତି କାମରେ ଲାଗି ଯାଇଛନ୍ତି। ଇତିମଧ୍ୟରେ ଓ୍ବାର୍ଲଡ ହେଲ୍ଥ ଅର୍ଗାନାଇଜେଶନ(ଡବ୍ଲୁଏଚ୍ଓ)କହିଛି ଏବେସୁଦ୍ଧା କରୋନାର ୮ଟି ଭ୍ୟାକ୍ସିନର କ୍ଲିନିକାଲ ଟ୍ରାଏଲ କରାଯାଇଛି। ଆହୁରି ମଧ୍ୟ୧୧୦ଟି ଭ୍ୟାକ୍ସିନ ବିଭିନ୍ନ ଦେଶରେ ପ୍ରସ୍ତୁତ ଚାଲିଛି। ସାଉଥ୍ ଚାଇନା ମର୍ଣ୍ଣିଂ ପୋଷ୍ଟର ସୂଚନା ଅନୁଯାୟୀ, ବିଶ୍ୱର ପ୍ରାୟ ସବୁ ଦେଶ କରୋନା ଭାଇରସର ମୂଳୋତ୍ପାଟନ ପାଇଁ ପ୍ରସ୍ତୁତି ଜାରି ରଖିଛନ୍ତି। ଆମେରିକା , ଚାଇନା ଓ ଜର୍ମାନୀ ଏ କ୍ଷେତ୍ରରେ ବିଶେଷ ଭୂମିକା ଗ୍ରହଣ କରିଛନ୍ତି। ଆମେରିକା ଓ ଚାଇନା ସମେତ ଆଉ କିଛି ଦେଶ ଭ୍ୟାକ୍ସିନ ପ୍ରସ୍ତୁତିକୁ ନେଇ ତାରିଖ ମଧ୍ୟ ଘୋଷଣା କରି ସାରିଛନ୍ତି। ଶନିବାର ଚାଇନାର ସ୍ବାସ୍ଥ୍ୟ ଅଧିକାରୀ ଝାଙ୍ଗ ଓ୍ବେନହୋଙ୍ଗ କହିଥିଲେ ୨୦୨୧ ମାର୍ଚ୍ଚ ମାସରେ କରୋନା ଭାଇରସକୁ ନଷ୍ଟ କରିବାକୁ ଭ୍ୟାକ୍ସିନ ପ୍ରସ୍ତୁତ ହୋଇଯାଇଥିବ। ତେବେ ଭ୍ୟାକ୍ସିନ ବିକଶିତ କରିବାକୁ ନେଇ ବହୁ ଅନିଶ୍ଚିତତା ଲାଗି ରହିଛି ବୋଲି ଚାଇନା କହିଛି। ମାର୍ସ ଓ ସାର୍ସ ସମେତ କରୋନା ଭାଇରସକୁ ଶେଷ କରିବାକୁ ଏପର୍ଯ୍ୟନ୍ତ କୌଣସି ଭ୍ୟାକ୍ସିନ ପ୍ରସ୍ତୁତ କରାଯାଇ ନାହିଁ। ଯଦି ଏଥିପାଇଁ ଗୋଟିଏ ବି ଭ୍ୟାକ୍ସିନ କାମ କରେ ତେବେ ଏହାବି ଆସନ୍ତା ବର୍ଷ ମାର୍ଚ୍ଚରୁ ଜୁନ୍ ପର୍ଯ୍ୟନ୍ତ ସମୟ ଲାଗିପାରେ ବୋଲି ଓ୍ବେନହୋଙ୍ଗ କହିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଫକ୍ସ ନ୍ୟୁଜ ଭର୍ଚୁଆଲ ଟାଉନ ହଲରେ କହିଥିଲେ, ଚଳିତ ବର୍ଷ ଶେଷ ବେଳକୁ ଆମକୁ ଭ୍ୟାକ୍ସିନ ମିଳିଯାଇପାରେ। ଏହିଭଳି ଆହୁରି କିଛି ଦେଶ ମଧ୍ୟ ଦାବି କରିଥିଲେ କି ଖୁବ୍ଶୀଘ୍ର କରୋନା ଭ୍ୟାକ୍ସିନ ଆସିଯାଇପାରେ।
