ଝାରସୁଗୁଡା ଅଫିସ,୧୩ା୪-ରାଜ୍ୟ ପୋଲିସ ମହାନିର୍ଦ୍ଦେଶକ(ଡିଜିପି) ଅଭୟ ସୋମବାର ଦିନିକିଆ ଝାରସୁଗୁଡା ଗସ୍ତରେ ଆସିଥିଲେ। ଡିଜିପି ଅପରାହ୍ନ ୨ଟା ବେଳେ ଚାର୍ଟାର୍ଡ ବିମାନରେ ଆସି ଝାରସୁଗୁଡ଼ା ବିମାନ ବନ୍ଦରରେ ଓହ୍ଲାଇ ଥିଲେ। ସେଠାରୁ କାର ଯୋଗେ ଜିଲା ପୋଲିସ କାର୍ଯ୍ୟାଳୟକୁ ଆସି କରୋନା ମୁକାବିଲା ପାଇଁ ଜିଲା ପୋଲିସର ବିଭିନ୍ନ କାର୍ଯ୍ୟ ସମୀକ୍ଷା କରିଥିଲେ। ଏହାପରେ ଝାରସୁଗୁଡା ଥାନା ପରିଦର୍ଶନରେ ଯାଇଥିଲେ। ରେଳ ଷ୍ଟେଶନ ଛକ, ବସ୍ଷ୍ଟାଣ୍ଡ ଛକ ଓ କିଶାନ ଛକରେ ଡ୍ୟୁଟିରେ ଥିବା ପୋଲିସ କର୍ମଚାରୀଙ୍କ ସହିତ ରାସ୍ତାରେ ଆଲୋଚନ କରିଥିଲେ। ଡ୍ୟୁଟି ବେଳେ ପୋଲିସ କର୍ମଚାରୀମାନଙ୍କ ସୁବିଧା ଅସୁବିଧା ସମ୍ପର୍କରେ ସେ ପଚାରି ବୁଝିଥିଲେ। ସେଠାରୁ ବିମାନବନ୍ଦରକୁ ଯାଇ ଅପରାହ୍ନ ସାଢେ ୪ରେ ଭୁବନେଶ୍ୱର ଫେରି ଯାଇଥିଲେ। ଡିଜିପିଙ୍କ ଗସ୍ତ ସମୟରେ ଉତ୍ତରାଞ୍ଚଳ ଡିଆଇଜି ହିମାଂଶୁ ଲାଲ, ଝାରସୁଗୁଡା ଏସ୍ପି ଅଶ୍ୱିନୀ କୁମାର ମହାନ୍ତି ଓ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।
