ଛତ୍ରପୁର, ୧୪।୪(ଡି.ଏନ୍.ଏ.): କରୋନା ଭୂତାଣୁ ସଂକ୍ରମଣକୁ ରୋକିବା ପାଇଁ ଗଞ୍ଜାମ ଜିଲା ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଉଛି । ଜିଲା ପ୍ରଶାସନ ପକ୍ଷରୁ ଗଠିତ ଟିମ୍ ବର୍ତ୍ତମାନ ସୁଦ୍ଧା ଜିଲାର ୭ ଲକ୍ଷ ୬୫ ହଜାର ୮୪୨ ଘରକୁ ଯାଇ ସର୍ଭେକରି ୩୨ ଲକ୍ଷ ୩୬ ହଜାର ୪୦୩ ବ୍ୟକ୍ତିଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିଛି। ଯେଉଁମାନଙ୍କଠାରେ ଜ୍ୱର, କାଶ ଆଦି ଫ୍ଲୁ ଦେଖାଦେଉଛି ଡାକ୍ତରଙ୍କୁ ନେଇ ଗଠିତ ରାପିଡ଼ ରେସପନ୍ସ ଟିମ ଉକ୍ତ ଘରକୁ ଯାଇ ଚିକିତ୍ସା କରୁଛନ୍ତି। ଡିଆର୍ଡିଏ ପକ୍ଷରୁ ଦିଆଯାଇଥିବା ସୂଚନା ଅନୁସାରେ ବର୍ତ୍ତମାନ ଜ଼ିଲାରେ ୬୦୨୯ଜଣ ଅନ୍ୟ ରାଜ୍ୟ ଫେରନ୍ତା ଓ ୧୦ ବିଦେଶ ଫେରନ୍ତା ହୋମ କ୍ୱାରାଣ୍ଟାଇନ୍ରେ ଅଛନ୍ତି। ସୋମବାର ୫୧ଟି ଗାଡି ଜବତ କରାଯାଇଥିବାବେଳେ ମାସ୍କ ପିନ୍ଧି ନ ଥିବା ନେଇ ୧୦୮ ଜଣଙ୍କଠାରୁ ଜରିମାନା ଆଦାୟ କରାଯାଇଛି।
